Кощхьэблэ районым ит псэупIэу Натырбые игурыт еджапIэу N 8-м ипащэу Мамыщ Эдуард коронавирусым пэуцужьырэ вакцинэр зыхязыгъэлъхьагъэхэм ащыщ.

Ипсауныгъэ изытет зыпкъ итынымкIэ, тапэкIи узым пэшIуекIон амал иIэнымкIэ ащ ишIогъэшхо къэкIощтэу елъытэ.

— БлэкIыгъэ илъэсым шэкIогъум ковидыр къыспыхьагъ ыкIи, шъып-къэу пIощтмэ, къин сигъэлъэгъугъ. Тхьэм ишыкуркIэ медицинэ Iэпы­Iэгъум, Iэзэгъу уцхэм яшIуагъэкIэ сипсауныгъэ зэтеуцожьыгъ, ау узым къыздихьыгъэхэм непи тIэкIу сагъэгумэкIэу къыхэкIы. Мы илъэсым имэкъуогъу мазэ вакцинэр зыхяз­гъэлъхьагъ, сэ сизакъоп, сишъхьэгъу­си ары. КIэлэегъэджэ сэнэхьатым си­IофшIэн зэрепхыгъэр, цIыфхэм, кIэ­лэеджакIохэм сахэтын, садэгущыIэн зэрэфаер къыдэплъытэхэмэ, мы лъэ­бэкъоу сшIыгъэр зэрэтэрэзым щэч хэлъэп. Арышъ, прививкэ зябгъэшIыныр сэркIэ шIокI зимыIэ пшъэрылъэу щыт. НэмыкI къэралыгъохэм вакцинэр икъу фэдизэу аIэкIэлъэп, афи­къурэп, тэ тищыкIагъэр зэкIэ тиI, тыз­хэдэни щыI. Ар цIыфхэм къагурыIоным, игъом вакцинациер акIуным мэхьанэшхо иIэу сэлъытэ. Непэрэ мафэм ехъулIэу Урысыем щы­псэурэ нэбгырэ миллион пчъагъэмэ прививкэ зарагъэшIыгъ, ау коллективнэ иммунитет тиIэным пае а къэ­гъэлъэгъоным джыри хэгъэхъогъэн фае. Арышъ, пстэуми зэгуры­Iоныгъэ, зыкIыныгъэ тазыфагу илъэу вакцинацием тыхэжъугъэлажь, тэри, къытпэблэгъэ цIыфхэми япсауныгъи, ящыIэныгъи къэтэжъугъэухъум. Ары непэ хэкIыпIэ закъоу щыIэр, — еIо Мамыщ Эдуард.