Зэнэкъокъум ащытекIуагъ

СССР-м и ЛIыхъужъэу Ан­дыр­хъое Хъусен ишIэжь фэгъэ-хьыгъэ зэнэкъокъухэр Мые­къуапэ щыкIуагъэх.

Спорт бэнэным илъэныкъоу панкратионымкIэ Адыгеим Iоф щызышIэрэ хьыкум приставым текIоныгъэр къыдихыгъ.

Iофтхьабзэм кIэщакIо фэхъугъэх Урысыем панкратионымкIэ и Федерацие, Адыгэ Рес­публикэм физическэ культурэмкIэ ыкIи спортымкIэ и Комитет, хьыкум приставхэм я Федеральнэ къулыкъу АдыгеимкIэ и Гъэ­IорышIапIэ, ДОСААФ-м ишъолъыр къута- мэу республикэм щыIэр.

Урысыем ишъолъыр 27-мэ къарыкIыгъэ спортсмен 300-м ехъу зэнэкъокъум хэлэ­жьагъ. Адыгеим икомандэ къэзгъэлъэгъуагъэхэм ащыщ хьыкум приставхэм я Федеральнэ къулыкъу АдыгеимкIэ и ГъэIорышIапIэ иIофышIэу Едыдж Анзор. Ащ дэгъу дэдэу зыкъыгъэлъэгъуагъ, текIоныгъэр къыдихыгъ.

ГъэIорышIапIэм икъулыкъушIэхэр Анзор фэгушIох, тапэкIи гъэхъэгъэшIухэр ышIынхэу фаIо.

Зэрарыр къыпщыныгъ

Теуцожь районым щыпсэурэ бзылъфыгъэм ыпкъ къикIыкIэ гъогум къытехъухьэгъэ хъу­гъэ-­шIагъэм зэрарэу къызди­хьыгъэр ащ къыпщынын зэрэ­фаем епхыгъэ Iофэу къызэ­Iуахыгъэр хьыкум при­ставхэм зэхафыгъ.

Теуцожь район хьыкумым унашъоу ышIыгъэмкIэ, бзылъфыгъэм сомэ мин 200 къы­пщынын фэягъ.

ПIалъэу къыфагъэуцугъэм ехъулIэу чIыфэр къыпщыныгъэп, ащ къыхэкIыкIэ пшъэдэ­кIыжьыр нахь агъэлъэшыгъ, къызэкIигъэ­кIожьын фэе ахъщэм сомэ мин 14 хэ­хъуагъ.

Ащ ыуж бэ тыримыгъашIэу бзылъфыгъэм ахъщэр къытыжьыгъ, къызэIуахыгъэ Iофыри зэфашIыжьыгъ.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу