КIэлэцIыкIухэу еджапIэм чIэс­хэм ыкIи мыгъэ чIэхьащтхэм зэтыгъо ахъщэ тынэу къэкIощт шышъхьэIу мазэм къафэкIощтым пае лъэIу тхылъыр бэдзэогъум и 15-м къыщегъэжьагъэу птын плъэкIыщт.

Ахъщэр шышъхьэIум и 16-м къатынэу рагъэжьэщт. УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ иминистрэу Антон Котяковым къызэриIуагъэмкIэ, нахьыбэм а мэфэ дэдэм къафэ­кIощт. Ны-тыхэм сабыйхэр илъэсыкIэ еджэгъум зэрэфагъэхьазырыщтхэр афэгъэпсын­кIэгъэныр ары къызыпкъырыкIыхэрэр.

КIэлэцIыкIу зэрыс унагъохэм мыщ фэдэ IэпыIэгъу ятыгъэным кIэщакIо фэхъугъэр УФ-м и Президентэу Владимир Путиныр ары. Мэлылъфэгъу мазэм джэпсалъэу къы­шIыгъэм ар къыщиIуагъ ыкIи ифэшъошэ унашъохэр УФ-м и Правительствэ фишIыгъэх.

Унагъом гъотэу иIэм емылъытыгъэу еджа­пIэм кIорэ е мыгъэ чIэхьащт зэрысхэм зэкIэми къафэкIощт, сабый пэпчъ сомэ мини 10 къыфатIупщыщт. Илъэсихым зыныбжь шIокIыгъэхэ кIэлэцIыкIухэм къащегъэжьагъэу, мыгъэ еджапIэр къэзыухыгъэу, ау бэ­дзэогъум и 2-м нэс джыри илъэс 18 мыхъу­гъагъэхэм анэсыжьэу къыхэфэщтых.

Зэтыгъо ахъщэ тыныр къызтефэхэрэм лъэIу тхылъыр къэралыгъо фэIо-фашIэхэм япортал щатын алъэкIыщт. Мыщ дэжьым нэмыкI зыпари агъэхьазырынэу ищыкIагъэп.

Джащ фэдэу ПенсиехэмкIэ фондым иотделение рахьылIэми хъущт, ау ащ паспортыр, СНИЛС-р, кIэлэцIыкIур къызэрэхъугъэр къэ­зыушыхьатырэ тхылъыр ыкIи банкым исчетэу къызэрагъэхьащтыр игъусэнхэ фае.