Бэдзэогъум и 14-м къыдэкIыгъэ «Адыгэ макъэм» Хьахъурэтэ Свет­ланэ итхыгъэу «Ора сянэр?» зыфиIоу къихьагъэм фэгъэ­хьыгъэу мы мафэхэм тхыгъэ къытIукIагъ.

Ар Тэхъутэмыкъое районым (зыщыщ къуа­джэр къытхыгъэп) щыпсэурэ Давтян Маринэ къытфаригъэхьыгъ.

— Непэ «Адыгэ макъэм» къыхиутыгъэ тхыгъэм сыгу ыгъэбырсырыгъ, — къетхы Маринэ. — Хьахъурэтэ Светланэ истатьяхэм сигуапэу сяджэ, сыгу рехьых. Сэ си­лъэп­къыкIэ сыермэл, сянэ адыг, адыгэ классми сыщеджагъ, адыгабзи, урысыбзи, ермэлыбзи сэшIэх, сянэ ыбзэ шIу сэлъэгъу.

«Адыгэ макъэр» бэшIагъэу къисэтхыкIы. IофшIапIэу сызыIутым гъэзетыр зыдэсхьэу, сыгу рихьыгъэ статьям сакъыфеджэу къыхэ­кIы. Ащ пыдзагъэу Маринэ гъэзетым ­икIэт­хэн, ар къизытхыкIырэр нахьыбэ хъуным пае шIэгъэн фаехэм ягугъу къешIы, Хьахъу­рэтэ Светланэ итхыгъэ тегущыIэнхэр игъоу ­елъытэ.

Шъыпкъэ, Маринэ изакъоп, тхыгъэр бэмэ агу рихьыгъ. Рассказ ыIоу тыримытхагъэми, автобиографическэ рассказ фэдэу,гур ыгъэгумэкIэу, узэлъиштэу ар гъэпсыгъэ. Хъугъэ-шIагъэр ямышIыкIэу щытэп, ащ фэдэ щыIэныгъэм хэмыхъухьэу пIон плъэ­кIыщтэп. Ау Светэ авторым ыгу ихъыкIырэ-ишIыкIырэр благъэу къытихьылIэн, сюжетым тэри тыхищэн, игумэкI къытлъигъэ­Iэсын ылъэкIыгъ. Унагъо имыхьэгъэ пшъэшъэ ныбжьыкIэм къыIэкIалъхьэгъэ сабыим ыгу фэузы. Ау чIыпIэу зэрытым елъыты- гъэу, сабыир ыштэн, ыпIун зэримылъэ­кIыщтыри дэгъоу къызыгурэIоми, Сашэ (са-быим) епхыгъэ гупшысэр къыдэоежьызэ илъэсыбэ кIуагъэ…

Сихъу Гощнагъу.