Къурыжъ Светлан, къэралыгъо статистикэмкIэ Федеральнэ къулыкъум Краснодар краимкIэ ыкIи Адыгэ РеспубликэмкIэ и ГъэIорышIапIэ ипащэ игуадз.

- КоронавирусыкIэу дунаир зэлъызыкIугъэм пэшIуекIорэ вакцинэр сэ сыгукIэ сыфаеу, семыхъырэхъышэжьэуи  зыхязгъэлъхьагъ. Сэ сизакъоп, тиколлектив хэтэу, ипсауныгъэ къыфидэу, врачхэм Iизын къызэратыгъэхэм зэкIэми прививкэр ашIыгъ. Нахьыбэрэхэм тызэгъусэу тызэдакIуи тшIыгъэ.

Сэ сшъхьэкIэ вакцинэм сигъэсымэджагъэп, зязгъэшIыгъэм ыужырэ мафэм макIэу сIэ узыгъэ, тIэкIу сыгъэретынчъэ фэдагъ, ау ар чэщ-зымафэкIэ текIыгъ. СиIофшIэгъухэми прививкэ ужым язытет сылъыплъагъ, сыкIэупчIагъ. СызэрэщагъэгъозагъэмкIэ, хэпшIыкIэу зэхэзышIагъэ ахэтэп.

Къыхэзгъэщымэ сшIоигъор зыпари коллективым хэт зэретымыгъэзырэр, IофшIапIэм IудгъэкIынэу зыми зэретымыIуагъэр ары. Дунаим техъухьэрэр, узыр зэрэмыуцурэр, уахътэ тешIэ къэсми къызэрэзэкIаблэрэр, ащ пэшIуекIорэ вакцинэу къаугупшысыгъэр зыхэмылъхьэмэ оркIи уиIахьыл-гупсэхэмкIи зэрэмышIур къагурыIуагъэу, ежьхэм яшIоигъоныгъэкIэ прививкэр арагъэшIыгъ.

Сэ сишIошIыкIэ, мы уз мэхъаджэм узэребэнын плъэкIыщт хэкIыпIэ закъоу непэ щыIэр вакцинэр ары. Ащ иягъэ къызэрэмыкIощтыр, тхьамыкIагъо къыхьынэу щынагъо къэзытырэр коронавирусыр арэу зэрэщытыр цIыфхэм къагурыIонышъ, зыщаухъумэнэу сыфай.