Урысые Федерацием и Президентэу Владимир Путиным видеоконференцие шIыкIэм тетэу УФ-м и Правительствэ хэтхэм зэIукIэу адишIыгъагъэм Урысыем и Правительствэ ивице-премьерэу Татьяна Голиковам къэралыгъом ипащэ къыщыфиIотагъ коронавирусымкIэ Урысыем иIофхэм язытет фэгъэхьыгъэу.

Татьяна Голиковам къызэриIуагъэмкIэ, нэбгырэ мини 100-м телъытагъэу вакцинэ зыхязыгъэлъхьагъэхэм япчъагъэкIэ зиIофхэр анахь тэрэзэу къыхагъэщыгъэр шъолъыр 11. Ахэм Адыгеир ащыщ.

Ковидым зимыушъомбгъуным пае прививкэ ягъэшIыгъэнхэм ыкIи санитар-эпидемиологие шапхъэхэр мыукъо­гъэнхэм Адыгеим и ЛIышъхьэу КъумпIыл Мурат ренэу ынаIэ атырегъэты.

Ащ пае Адыгэ Республикэм имуниципальнэ образованиехэм вакцина­циемкIэ пункт 32-рэ къащызэIуахыгъ. ЦIыфхэу шIоигъоныгъэ зиIэхэм япчъагъэ зэрэхахъорэм къыхэкIэу Мыекъуапэ имобильнэ пункт Iоф зэришIэщт сы­хьат пчъагъэр нахьыбэ ашIыгъ. Бэдзэогъум и 20-м къыщегъэжьагъэу сменитIоу, пчыхьэм сыхьатыр 8-м нэс ащ Iоф ышIэщт. ПстэумкIи вакцинацием пае республикэм бригадэ 35-мэ Iоф щашIэ, ахэм ахэтых врач-терапевтхэр, вакцинэр ахэзылъхьэрэ гурыт медицинэ IофышIэхэр, джащ фэдэу вакцинэр зыхалъхьагъэхэр зытхыхэрэр.

Зэпыу имыIэу а Iофыр рекIокIыным пае гъэучъыIэлъэ оборудованиер къащэфыгъ, вакцинациер зыщыкIорэ пункт­хэр зэкIэ ащкIэ зэтырагъэпсыхьагъэх.

ПстэумкIи республикэм вакцинэ 90986-рэ къыIэкIагъэхьагъ. Нэбгырэ мин 79-рэ фэдизмэ апэрэ прививкэр афашIыгъ, планым елъытыгъэмэ, ар зэ­рэхъурэр процент 37-рэ, зэкIэмкIи рес­публикэм къыIэкIэхьэгъэ вакцинэр пштэмэ, ащ ипроцент 86,6-рэ. Анахьэу вакцинациемкIэ апэ ишъыгъэхэр «силовой структурэкIэ» заджэхэрэм ащылажьэхэрэр ары — проценти 100, гъэ­сэныгъэ зыщарагъэгъотырэ орга­низациехэм яIофышIэхэм — процент 92-м ехъу, къулыкъушIэхэм — процент 74-рэ фэдиз.

Адыгэ Республикэм и ЛIышъхьэ ипресс-къулыкъу