Гъунэм нагъэсыгъ
Бжыхьэсэ лэжьыгъэм иIухыжьын тичIыгулэжьхэм гъунэм рафылIагъ. ПстэумкIэ гектар 107171-у халъхьагъэм щыщэу 90973-р аIожьыгъах. ГурытымкIэ зы коц гектарым центнер 47,5-рэ къырахы.
Хьэр гектар 12564-рэ хъущтыгъ, ар Iуахыжьыгъах. АР-м мэкъу-мэщымкIэ и Министерствэ тызэрэщигъэгъозагъэмкIэ, гурытымкIэ зы гектарым центнер 47,3-рэ къырахыгъ, тонн 58271-рэ аугъоижьыгъ. Анахьыбэу къизыхыгъэр, ар центнер 56-рэ, Кощхьэблэ ыкIи Красногвардейскэ районхэм ячIыгулэжьхэр ары.
Коцым пстэумкIи гектар 94380-рэ рагъэубытыгъагъ. БлэкIыгъэ илъэсым аIожьынэу халъхьэгъагъэм нахьи ар гектар минитIум ехъукIэ нахьыб. Ащ щыщэу гектар 78295-р Iуахыжьыгъ, гурытымкIэ лъытагъэу, центнер 47,6-рэ зы гектарым къеты, тонн 372474-рэ къаугъоижьыгъах.
Анахьыбэу къызщырахырэр Красногвардейскэ районыр ары. Коц гектар 13850-у ащ щырапхъыгъагъэм 11427-р хагъэкIыгъ, гурытымкIэ лъытагъэу, центнер 54,5-рэ гектарым къеты.
Ащ ыуж ит Кощхьэблэ районыр. Коц гектар 14641-у ащ ичIыгулэжьхэм халъхьэгъагъэм щыщэу 13377-р Iуахыжьыгъах, гурытымкIэ центнер 53,7-рэ гектарым къырахы.
МакIэу къафэнагъ ыкIи анахьыбэ къизыхыхэрэм ащыщых Шэуджэн районым ичIыгулэжьхэри. Гектар 14370-рэ ахэм коцым рагъэубытыгъагъ, аIожьыгъэр 13500-рэ мэхъу, гурытымкIэ лъытагъэу, центнер 51-рэ зы гектарым къеты.
Чылапхъэ ашIыщт рапс гектар 8357-у республикэм щырапхъыгъагъэм щыщэу 7753-р Iуахыжьыгъ, гурытымкIэ центнер 20 ащ къырахы.
ЧIыгулэжьхэм къызэраIорэмкIэ, ом ымыгъэохъухэмэ, мэфэ заулэкIэ бжыхьасэхэм яIухыжьын аухыщт.
ХЪУТ Нэфсэт.