Зэпахырэ уз щынагъоу коронавирусым пэуцужьыгъэным фэшI Кощхьэблэ районым щыпсэухэу илъэс 60-м къехъугъэ нэбгырэ 500-м нахьыбэм вакцинэр зыхарагъэлъхьагъ. Ащ нэмыкIэу уз гъэтIылъыгъэ зиIэу ыкIи зипсауныгъэ тещыныхьэрэ нэбгырэ 656-мэ прививкэ арагъэшIыгъ.

ЗэкIэми ашIэ вирусыр зэрэмэхъаджэр ыкIи ар хэти къыпыхьаным ищынагъо зэрэщыIэр. Анахьэу илъэс 60-м къе­хъугъэхэр ыкIи уз гъэтIылъыгъэ зиIэхэр мы Iофым яшъыпкъэу къекIолIэнхэ фае, зэпахырэ уз щынагъор къапымыхьаным фэшI игъом вакцинэр зыхарагъалъхьэмэ, япсауныгъэ къаухъумэн алъэкIыщтэу врачхэм аIо.

Вакцинэр зыхязыгъэлъхьагъэхэм ащыщ къуаджэу Кощхьаблэ иефэндэу Даут Амэрбый. БэмышIэу ащ къоджэ­дэсхэм закъыфигъэзагъ.

— Быслъымэн лъапIэхэр, сикъоджэгъу­хэр, синыбджэгъухэр! Непэ зэкIэми сыкъышъоджэ, мы уз цIапIэу мы дунэе­шхор зэIэзыгъэхьагъэм, зыгъэсымэджагъэм, мыхъо-мышIэшхо къытэзышIэрэм узэрэпэуцужьын плъэкIыщт закъоу вакцинэу къежьагъэмкIэ шъу­къызэкIэмы­кIонэу, сышъолъэIу. Сэ сшъхьэкIэ бэмышIэу вакцинэр зыхязгъэлъхьагъ. БэшIагъэу ащ сыфэягъ, ау гъэрекIо коронавирус узыр сиIагъэти, мэзих мыхъоу сашIы мыхъунэу врачхэм къысаIуи, сежагъ. Джы мары уахътэр къэси, прививкэ язгъэшIыгъ, зыпари ащ щынагъо хэлъэп, зыпари къысэузыгъэп, Тхьэм ишыкуркIэ. Тызщыгугъырэ закъор Алахьталэр ары, ащ ихьатыркIэ мы вакцинэр зыхяжъугъэлъхьан фае. Шъуиунагъохэм узынчъагъэ арылъынэу тыфай, шъузэщыгушIукIэу, шъуиIахьылхэм, шъуигъу­нэгъухэм шъузэщымыщынэжьэу шъупсэунэу тыфай. Вакцинацие зыпшIыкIэ, тыдэ укIощтми, цIыфхэм аIапэ уубытыщтми, умыщынэу упсэущт. Марджэ хъун, вакцинациеу къэралыгъор къызыкIэлъэIурэр яжъугъэшI. Шъушъхьэ, шъуиунагъо къэшъуухъумэх. Алахьталэм гукIэгъу къытфишIын зэкIэми. Тхьэм ыIомэ, уз мэхъа­джэри кIодыжьын, ащи тытекIон.