Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн къыдыхэлъыта­гъэу 2021-рэ илъэсым Мыекъуапэ игъогу Iахь 18-мэ гъэцэкIэжьынхэр ащыкIощтых.

Ахэм ащыщэу 5-р рес­публикэм икъэлэ шъхьаIэ къыпэблэгъэ псэупIэхэм ахэхьэх. IофшIэнхэм апэ­Iухьащт сомэ миллиони 190-м ехъу къатIупщыгъ. Урамэу Кольцовыр (Пионерскэмрэ Пролетарскэмрэ азыфагу) зэты­рагъэпсыхьагъ, чIыпIи 10-мэ непэ гъэцэкIэжьынхэр ащэкIох.

Гухэлъэу щыIэмкIэ, мы илъэсыр имыкIызэ джыри объектибл зэтырагъэ­псыхьащт. Ахэм къахеубытэх урамхэу Гаражнэм, Герценым, Димитровым, Госпитальнэм, Тульскэм, Кирпичнэм, Женя Поповым ыцIэ зыхьырэм, джащ фэдэу поселкэу Западнэм иурамхэу Новэм, Цент­ральнэм, Солнечнэм ягъогу Iахьхэр.

Мыхэр 2022-рэ илъэсым иплан къыдыхэлъытагъэх, ау графикым ыпэ итхэу мы илъэсым Iоф­шIэнхэр рагъэжьагъэх.

Ащ нэмыкIэу ахъщэу къагъэнэн алъэкIыгъэм ишIуагъэкIэ урамхэу Гоголымрэ Пушкинымрэ зы­щызэхахьэхэрэм дэжь щыт нэфрыгъуазэр 2021-рэ илъэсым шышъхьэIум и 1-м нэс агъэкIэжьынэу агъэнафэ. Джащ фэдэу мыщ къыхэхыгъэ мылъкумкIэ урамэу Прямоим ущызекIоныр нахь щынэгъончъэ ашIыщт.

Адыгеим и ЛIышъхьэу КъумпIыл Мурат зэхищэгъэ зэхэсыгъом мы гу­хэлъхэр къыщыраIотыкIы­гъэх.

— Лъэпкъ проектэу «Щынэгъончъэ ыкIи шэп­хъэшIухэм адиштэрэ гъогухэр» зыфиIорэм къы­дыхэлъытэгъэ лъэныкъо пстэури гъэцэкIэгъэным, къэгъэлъэгъон гъэнэфа­гъэхэм акIэхьэгъэным мэ­хьанэшхо иI. Хэхъо­ныгъэ тшIынымкIэ мы проектыр непэ зы амалышIоу щыт, арышъ, ар къызфэдгъэфедэн фае. Гъогухэм къатехъухьэрэ хъугъэ-шIагъэхэм япчъагъэ нахь макIэ шIыгъэныр, цIыфхэм япсауныгъэ ыкIи ящыIэныгъэ къэухъу­мэгъэныр ары мы IофшIэным зэфэхьысыжь шъхьаIэу фэхъун фаер, — къыIуагъ КъумпIыл Мурат.

Мы лъэпкъ проектым къыдыхэлъытагъэу графикым ыпэ итхэу 2022-рэ илъэсым телъытэгъэ гъогу чIыпIи 5 Тэхъутэ­мыкъое районым щагъэцэкIэжьынэу агъэнафэ. Автомобиль гъогоу «Тэ­хъутэмыкъуай — Козэт — Новэр — Яблоновскэр» зыфиIорэм къыхиубытэрэ километри 2,5-рэ зэтырагъэпсыхьащт, «Су­повский — Отрадный», «Инэм — БжыхьэкъоякIэр» зыфиIохэрэм, къуа­джэу Псэйтыку екIуа­лIэ­рэм ягъогу Iахьхэр агъэцэкIэжьыщтых. Афыпсыпэ екIолIэрэ гъогум игъэ­кIэжьын аухыгъ, метрэ 658-рэ зикIыхьэгъэ гъогу Iахьым асфальт тыралъхьагъ, тамыгъэхэр ты­ра­гъэуцуагъэх. Ащ сомэ миллиони 5,5-м ехъу пэ­Iуагъэхьагъ, IофшIэнхэр зыгъэцэкIагъэр пшъэдэ­кIыжьэу ыхьырэмкIэ гъу­нэпкъэ гъэнэфагъэ зиIэ обществэу «Фирмэу Тэ­хъутэмыкъое ДРСУ-р» ары.

(Тикорр.).