Гъэмэфэ мазэхэм республикэм ис кIэлэцIыкIу 2220-мэ загъэпсэфыщт ыкIи япсауныгъэ агъэпытэщт. ЯтIонэрэ чэзыум лагерьхэм кIэлэцIыкIу нэбгырэ 740-мэ джырэкIэ защагъэпсэфы. Пандемием ыпкъ къикIыкIэ санитарнэ-эпидемиологическэ шапхъэхэр нахь агъэлъэшыгъэх.

АР-м IофшIэнымрэ социальнэ хэхъоныгъэмрэкIэ и Министерствэ къызэрэщаIуагъэмкIэ, санитарнэ шапхъэхэм атетэу Iоф ашIэмэ ыкIи ошIэ-дэмышIэ Iофхэм республикэм къыщызэIуахыгъэ кIэлэцIыкIу зыгъэпсэфыпIэхэр зэрэфэхьазырхэр ведомствэм ипащэу Мырзэ Джанбэч мы мафэхэм ыуплъэкIугъэх.

Мы илъэсым лагерьхэм япрограммэ зэблахъугъ, кIэлэцIыкIу­хэм яшIэныгъэхэм зыщахагъэхъорэ, япсауныгъэ зыщапсыхьэрэ Iофтхьабзэу зэхащэхэрэр зэхъокIыгъэх. Мыгъэ кIэлэцIыкIухэр зэхэтхэу зекIо ащэхэрэп, ащ ычIыпIэ тарихъ-краеведческэ зэIукIэхэр афызэхащэх.

ДЕЛЭКЪО Анет.