Республикэм санитарнэ-эпидемиологие лъэныкъомкIэ иIофхэм язытет ыкIи коронавирусым зимыушъомбгъунымкIэ Iофтхьабзэхэу агъэцэкIэщтхэм щатегущыIагъэх Адыгеим и ЛIышъхьэу КъумпIыл Мурат тхьамэтагъор зыщызэрихьэгъэ зэхэсыгъоу республикэ оперштабым иIагъэм.

Ащ хэлэжьагъэх Адыгэ Рес­публикэм псауныгъэм икъэухъу­мэнкIэ иминистрэу Мэрэтыкъо Рустем, Роспотребнадзорым Адыгэ РеспубликэмкIэ и ГъэIорышIапIэ ипащэу Сергей Завгороднер.

ЦIыфхэр жъугъэу зыхэлэ­жьэхэрэ культурнэ, спорт Iоф­тхьабзэхэр, джэгухэр ыкIи нэмыкIхэу санитарнэ шапхъэхэр зымыгъэцэкIэхэрэ цIыфхэр зыхэ­лажьэхэрэр пIэлъэ гъэнэфагъэкIэ Адыгеим къыщызэтыраIэжэщтых.

Мыщ къыхимыубытэхэрэр Адыгэ Республикэм икъэралыгъо хабзэ икъулыкъухэм, чIыпIэ зыгъэIорышIэжьыным икъулыкъу­хэм ыкIи ахэм къяпхыгъэхэ учреждениехэм зэхащэхэрэ Iоф­тхьабзэхэр ары. Мы къэтпчъы­гъэ Iофтхьабзэхэм ахэлэжьэнхэ фитхэр узыр зыпэкIэкIыгъэхэм иммунитет зэряIэр е вакцинацие зызэрарагъэшIыгъэр, е ПЦР-тестэу Iофтхьабзэм ыпэкIэ мэфи 3-м нахьыбэ темышIэу къаIэ­кIэхьажьыгъэр (отрицательнэу щытхэр) къэзыушыхьатыхэрэ сертификатхэр зиIэхэр ары.

Шъугу къэдгъэкIыжьын: рес­публикэм ихьакIэщхэм арысынхэу къакIохэрэ туристхэми джащ фэдэ шапхъэхэр игъо афалъэгъущтых (мыщ къыхимыубытэ­хэрэр илъэс 16-м нэс зыныбжьхэр ары).

ФэIо-фашIэхэм ягъэцэкIэн фэгъэзагъэхэм ашIэн фае

Оперштабым ышIыгъэ уна­шъом тегъэпсыхьагъэу цIыфхэм яфэIо-фашIэхэм ягъэцэкIэн фэгъэзэгъэ предприятиехэмрэ организациехэмрэ 2021-рэ илъэ­сым бэдзэогъум и 19-м ехъу­лIэу яIофшIапIэ дэкIын фитхэр илъэс­ныкъом нахьыбэ темышIагъэу узыр къызэутэлIагъэхэр е коронавируснэ инфекциякIэм пэшIуе­кIорэ прививкэр зышIыгъэхэр ыкIи ахэр къэзыушыхьатыхэрэ сертификатхэр зиIэхэр ары.

Илъэс 65-м шIокIыгъэхэ IофышIэхэу узым ыуж иммунитет зимыIэхэр ыкIи вакцинацие зымыкIугъэхэм пэIудзыгъэ шIыкIэм тетэу е нэмыкI шIыкIэхэр къафагъотыхэзэ цIыфхэм ахэмыхьэхэу Iоф арагъэшIэщт.

«НепэкIэ мэхьанэшхо иIэу щыт узым земыгъэушъомб­гъугъэным. Прививкэхэмрэ санитарнэ-эпидемиологие шапхъэ­хэмрэ дэх имыIэу, джащ фэдэу Роспотребнадзорым къыгъэуцурэ пшъэрылъхэр дгъэцакIэхэмэ ары ныIэп шэпхъакIэхэм ягъэнэфэн щыдгъэзыен зытлъэкIыщтыр», — къыIуагъ Адыгеим и ЛIышъхьэ ащ фэгъэхьыгъэу. КъумпIыл Мурат министерствэхэм ыкIи ведомствэхэм яIэшъхьэтетхэм, муниципалитетхэм япащэхэм пшъэрылъ афишIыгъ вакцинациер зэрэкIорэр ашъхьэкIэ ауплъэ­кIунэу ыкIи цIыфхэм ащ епхыгъэ гурыгъэIон IофшIэныр адызэрахьанэу.

Ащ нэмыкIэу цIыфхэр зэпэчыжьэнхэ зэрэфаер, нэгуи­хъохэр агъэфедэнхэр укъуагъэ мыхъунхэм пае цIыфхэр жъу­гъэу зыщызэхэхьэхэрэ чIыпIэхэм, предприятиехэм уплъэкIун Iоф­шIэныр ащагъэлъэшыщт.

Туристхэри шэпхъэ гъэнэфагъэхэм къа­хеубытэх

Адыгеим эпидемиологие лъэ­ныкъомкIэ Iофхэр нахь дэй зэрэщыхъугъэхэм къыхэкIэу туристхэми ыпшъэкIэ зигугъу къэтшIыгъэхэ Iофтхьабзэхэр адызэрахьащтых. Бэдзэогъум и 19-м къыщегъэжьагъэу хьакIэщ­хэм ахэр арытIысхьанхэ зы­хъукIэ иммунитетыр къэзыгъэшъыпкъэжьырэ тхылъхэр аIахынхэ фаеу хъущт: прививкэмкIэ, узэу пэкIэкIыгъэмкIэ сертификатхэр, джащ фэдэу мэфищым нахьыбэ темышIагъэу ПЦР-тестым фэхъугъэхэ кIэуххэри аштэщтых. Зыныбжь илъэс 16-м шIомыкIыгъэхэм ащ фэдэ документхэр къырахьылIэнхэр ищыкIагъэу щытэп.

Туристическэ отраслэм иIофышIэхэми ахэр япхыгъэу щытых, джащ фэдэу спортивнэ комплексхэу, фитнес-гупчэхэу е нэмыкI организациехэу цIыфхэм яфэIо-фашIэхэр зыгъэцакIэхэрэм ащылажьэхэрэми, ахэм къякIуа­лIэхэрэми ащ фэдэ шапхъэхэр агъэцэкIэнхэ фае. ЦIыфхэм ягъэшхэн фэгъэзэгъэ заведениехэми яIофшIэн нахь пхъэшагъэ хэлъэу ауплъэкIущт, ахэм ащылажьэхэрэм афэгъэхьыгъэу шэпхъэ тедзэхэр щыIэщтых.

Бэдзэогъум и 12-м ехъулIэу АдыгеимкIэ COVID-19-р нэбгырэ 15454-мэ къяузыгъ. Ащ щыщэу нэбгырэ 567-мэ яIазэх, агъэ­хъужьыгъэр нэбгырэ 14620-рэ. Госпитальхэм пIэкIор 470-рэ сымаджэхэм апае ачIагъэу­цуагъ, стационар шIыкIэм тетэу нэбгырэ 395-мэ яIазэх.

Адыгэ Республикэм псауныгъэм икъэухъумэнкIэ и Министерствэ къызэритыгъэмкIэ, нэбгырэ мин 65-мэ прививкэр афашIыгъ, ахэм ащыщэу ковидыр къызэутэлIагъэр нэбгырэ 207-рэ, процент 0,3-рэ ар мэхъу. Коронавирусыр хьылъэу зыпэкIэкIыгъэ ахэм зи ахэтэп. АР-м и ЛIышъхьэ ипресс-къулыкъу