Мы илъэсыр къызихьагъэм къыщегъэжьагъэу Адыгеим машIом уцугъо 377-рэ зыкъыщиштагъ, гъэрекIо мыщ фэдэ лъэхъаным – хъугъэ-шIэгъэ 573-рэ агъэунэфыгъагъ. Мыгъэ машIом зыкъызэриштагъэр процент 34-кIэ нахь макI. Псы объектхэм машIо къыщыхъугъэу 4 агъэунэфыгъ, гъэрекIо елъытыгъэмэ ар проценти 10-кIэ нахь макI.

Мы пчъагъэхэр къыIуагъэх.Урысыем ошIэ-дэмышIэ Iоф­хэмкIэ и Министерствэ ипащэ игуадзэу Андрей Гурович ыкIи УФ-м и МЧС граждан зыухъу­мэжьынымкIэ ыкIи цIыфхэм якъэухъумэнкIэ и Департамент ипащэу Олег Мануйло Адыгеим къызэкIохэм.

Урысыем ошIэ-дэмышIэ Iоф­хэмкIэ и Министерствэ и ГъэIо­рышIапIэ ахэр щыIагъэх. ГъэIорышIапIэм ипащэхэм гущыIэгъу афэхъугъэх, непэрэ мафэм ехъулIэу гумэкIыгъохэу яIэхэм, ахэм ядэгъэзыжьын атегущыIагъэх. Урысыем и МЧС хэхъоныгъэхэр ышIынхэм пае ашIэнхэ фаехэр къаIуагъэх.

ГъэIорышIапIэм тапэкIи чанэу Iоф зэришIэщтым, рес­публикэм щыпсэухэрэ цIыфхэм ящынэ­гъончъагъэ зэрэпылъыщтым, ошIэ-дэмышIэ Iоф къэ­хъумэ лъэтемытэу зэрэнэсыщтхэм ицыхьэ зэрэтелъыр Андрей Гуровым къыIуагъ.

Урысыем ошIэ-дэмышIэ Iоф­хэмкIэ и Министерствэ и Гъэ­IорышIапIэ ипресс-къулыкъу къызэрэщаIуагъэмкIэ, пэшIорыгъэшъ IофшIэнхэр зэрагъэцакIэхэрэм, цIыфхэм гущыIэгъу зэрафэхъухэрэм ишIуагъэкIэ машIом зыкъызэриштэрэ пчъагъэр нахь макIэ хъугъэ.

(Тикорр.).