Мыекъопэ къэралыгъо технологическэ университетым и Медицинэ институт ипащэу НэмытIэкъо Хьазрэт коронавирусым пэуцужьырэ прививкэм фэгъэхьыгъэ шIошIэу иIэр къыреIотыкIы:

— 2002-рэ илъэсым нэс коронавирусым уз хьылъэхэр къыхэкIыхэу алъытэщтыгъэ. 2020-рэ илъэсым мэзэем и 11-м псауныгъэр къэухъу­мэгъэнымкIэ Дунэе организацием зэпахырэ узым официальнэу цIэ фаусыгъ, коронавирусыкIэм къыхэкIэу COVID-19-кIэ еджагъэх.

Узым шIэхэу зызыкIиушъомбгъугъэр ыпэрапшIэу цIыфхэм ашIошъ зэрымыхъоу, пэшIорыгъэшъэу зэрэзыфэмысакъыжьыхэрэр, ищыкIа­гъэр зэрамыгъэцакIэрэр ары. Пандемием игумэкIыгъохэр, сымаджэхэм япчъагъэ зэрэхахъорэр, цIыфхэр зэрилIыкIыхэрэр мафэ къэс къэбар жъугъэм иамалхэм къащаIо. Арэу щытми, ар зышIошъ мыхъухэрэр бэу къахэкIых, узым нахь зеушъомбгъу.

«Вирусым зызэблехъу зэпыт, вакцинэр штаммыкIэхэр къемыжьэзэ къаугупшысыгъ, сыдым пае прививкэ зязгъэшIыщта, ишIуагъэ къэкIощтэп», — зыIохэрэр къахэкIы. Ар тэрэзэп! Вирусым зызэрэзэблихъурэр шъыпкъэ, непэрэ мафэм ехъулIэу ар зэфэшъхьафитф мэхъу. Ау прививкэм зыщызыухъумэхэрэм къагурымыIорэр зы — вирусым зызэблехъуми, ахэм апэшIуекIорэ антителахэр цIыфым иIэнхэ фае.

ШIэхэу зэпахырэ узым тыпэшIуекIоным пае, пэшIорыгъэшъ Iофтхьабзэхэр дгъэцэкIэнхэр ищыкIагъ, ыпэрапшIэу вакцинэр зыхядгъэлъхьан фае. Непэрэ мафэм ехъулIэу COVID-19-м пэшIуекIорэ вакцинищ щыI, ахэр «Спутник В», «Эпивак» ыкIи «Ковивак». Узыр къыппымыхьанымкIэ ахэм яшIуагъэ къэкIо.

Республикэм щыпсэухэрэм зафэзгъазэ сшIоигъу: узым зеушъомбгъуфэ шъуемыжэу, зэфэхьысыжь тэрэзхэр шъушIы, вакцинэр зыхяжъу­гъалъхь.