Медицинэ ыкIи социальнэ IофышIэхэм амыгъэфедэгъэ отпускхэм апае ыкIи ком­пенсацие фэдэу аIэкIагъэхьа­нэу а ахъщэ тедзэр шъолъыр­хэм атырагощэнэу Урысые Федерацием и Правительствэ унашъо ышIыгъ.

Пандемием епхыгъэу гумэкIыгъо лъэхъаным пшъэрылъэу яIэхэмкIэ анахь мэхьанэшхо зиIэ IофшIэнхэр зыгъэцэкIэгъагъэхэм 2020-рэ илъэсым кIэ­гъэгушIу нэшанэ зиIэ ахъщэ аратыгъагъ.

А гухэлъхэм апэIуагъэхьанэу сомэ миллиони 7,4-рэ фэдиз ахъщэ тедзэу Адыгэ Респуб­ликэм къыфыхагъэкIыгъ. Ащ фэгъэхьыгъэу къыIуагъ Адыгэ Республикэм ыцIэкIэ Къэралыгъо Думэм идепутатэу Влади­слав Резник. Урысые Федерацием и Федеральнэ ЗэIукIэ бюджет ассигнованиехэр атегощэгъэнхэмкIэ и Комиссие къызыдырегъэштэ нэуж УФ-м и Правительствэ ахъщэ къы­хэкIыгъэным фэгъэхьыгъэ унашъор ыштагъ.

«Пандемием иапэрэ мафэхэм къащыублагъэу къэралы­гъом ипащэ, УФ-м и Прави­тельствэ, Федеральнэ ЗэIукIэм ренэу IэпыIэгъу къызэрэтатырэр зэхэтэшIэ. Экономикэмрэ социальнэ лъэныкъомрэкIэ Iоф­тхьэбзэ гъэнэфагъэхэр рахъу­хьагъэх, ащ къыхеубытэх сабый­хэр зэрыс унагъохэм, гъот макIэ зиIэ цIыф куп гъэнэфагъэхэм ахъщэу аратыщтыр. Анахьэу, Iо хэлъэп, а ахъщэр зыIэкIэхьащтхэр зыпсэ емыблэжьхэу чIыпIэ зэжъу лъэхъаным зипшъэрылъхэр зыгъэцэкIэгъэхэ медицинэ ыкIи социальнэ IофышIэхэр ары. Тэ типшъэрылъыр — игъом ыкIи икъоу зэкIэми атефэрэ ахъщэр аIэкIэдгъэхьаныр ары», — къы­Iуагъ Адыгеим и ЛIышъхьэу КъумпIыл Мурат.

Урысые Федерацием и Къэралыгъо Думэ идепутатэу Владислав Резник къызэрэхигъэщыгъэмкIэ, непи медицинэ ыкIи социальнэ IофышIэхэм Iофышхо, Iоф къин зэшIуахы. Ар врачхэм, гурыт медицинэ IофышIэхэм, IэпыIэгъу псынкIэм иводительхэм, социальнэ фэIо-фашIэхэм ягъэцэкIэн фэгъэзэгъэ организацие зэфэшъхьафхэм ащылажьэхэрэм афэгъэхьыгъэу щыт. Мафэ къэс чIыпIэ гумэкIыгъо ахэр итых, къафэгъэзэгъэ сыма­джэхэм афэгумэкIыхэзэ яIоф­шIэгъу уахътэ макIо.

«Ахэм ащыщыбэхэм отпускыр зылIэужыгъор ащыгъупшэжьыгъ. Федеральнэ мылъкоу къафыхагъэкIыгъэм ишIуагъэ къэкIощт медицинэ ыкIи социальнэ IофышIэхэм амыгъэфедэгъэ отпускхэм ыкIи компенсациехэм атефэгъэ ахъщэр икъоу аIэкIэхьажьынымкIэ. Бюджет ас­сигнованиехэр атегощэгъэнхэмкIэ Парламентым и Ко­мис­сие Правительствэр игъусэу мы илъэсми шъолъырхэм, Адыгеири зэрахэтэу, ямедицинэ ыкIи ясоциальнэ IофышIэхэм мылъку IэпыIэгъу тедзэ къа­ратыщт. Непэрэ охътэ гумэ­кIыгъом ар ящыкIэгъэ дэдэу щыт», — къы­Iуагъ Владислав Резник.

Шъугу къэтэгъэкIыжьы: 2020-рэ илъэсым медицинэм иIофышIэхэм амыгъэфедэгъэ отпускхэм апае сомэ миллион 30-м ехъу ахъщэ тедзэу къафыхагъэкIыгъагъ, джащ фэдэу социальнэ IофышIэхэм апае — сомэ миллиони 4 фэдиз.