УФ-м и Президентэу Владимир Путиным «линие занкIэу» иIагъэм цIыфхэм Iофыгъоу къырахьылIагъэхэр дэгъэзыжьыгъэнхэм фытегъэ­псыхьэгъэ унашъохэр Правительствэм фишIыгъэх.

КIэлэцIыкIоу илъэси 3 — 7 зыныбжьхэм мазэ къэс ахъщэ тын афэгъэкIогъэным фэгъэ­хьыгъэ унашъоу блэкIыгъэ илъэ­сым къыщегъэжьагъэу кIуачIэ зиIэр шъолъырхэм зэращагъэцакIэрэр шышъхьэIу мазэр къи­мыхьэзэ ауплъэкIун фае.

Хьыкум приставхэм чIыфэ зытелъым ар къызыIахыжькIэ, цIыфыр зэрыпсэун ылъэкIыщт ахъщэ анахь макIэм къыщымыкIэу мазэм къыфагъэнэнэу къызщиIорэ зэхъокIыныгъэхэр УФ-м и Гражданскэ кодекс ыкIи «Исполнительнэ производствэм фэгъэхьыгъ» зыфиIорэ федеральнэ хэбзэгъэуцугъэм афа­шIыгъэх. Урысыем и Гупчэ Банк къыхагъэлажьэзэ ар пхыры­щыгъэ зэрэхъурэр илъэсэу тыз­хэтым ичъэпыогъу мазэ къимыхьэзэ ауплъэкIунэу унашъо афишIыгъ.

Бизнес цIыкIум ыкIи гурытым ащылажьэхэрэм фэгъэ­кIо­тэнхэр къызщыдэлъытэгъэ кредитхэр къызIэкIэгъэхьэгъошIу афэхъунхэм фытегъэпсыхьэгъэ IофшIэнхэр зэшIуахынхэу ащ къыкIэлъыкIорэ шэкIогъу мазэм нэс пIалъэу аритыгъ.

Джащ фэдэу субъектхэм япащэхэм илъэсым зэ нэмыIэми цIыфхэм «зэдэгущыIэгъу занкIэхэр» адашIынхэу Президентым ариIуагъ. «Линие зан­кIэм» цIыфэу зыкъыщыфэз­гъэзагъэхэм гумэкIыгъоу къа­Iэ­тыгъэхэм Урысые народнэ фронтыр ахэплъэнышъ, Iофхэм язытет Кремлым, УФ-м ими­нистрэхэм я Кабинет е нэмыкIэу ахэм афэгъэзэгъэ ведомствэхэм, шъолъырхэм япащэхэм алъагъэIэсынэу фигъэзагъ.