Зэпахырэ узэу COVID-19-м илъэсым ехъурэ зэрэдунаеу гумэкIыгъо­шхом хэтэу ыIыгъыгъ. Мы илъэсым иапэрэ мазэхэри ащ фэдагъэх. «IэпыIэгъу псынкIэм» мэкъэшхо пыIукIэу урамым рычъэ зыхъукIэ, «псаоу сымэджэщым нагъэсына шъуIуа?» цIыфхэм аIощтыгъ. Нагъэ­сыгъэу хъужьыгъэхэри щыIэх, амыгъэхъужьышъугъэхэри къахэкIыгъэх.

Джы мэзэ зытIум узыр тIэкIу зэкIакIуи, цIыфхэм аIотэжьыгъэу аIозэ, джыри нахь щынэгъуахэу къыгъэзэжьыгъ, быузэ «IэпыIэгъу псынкIэу» чъэхэрэри къежьэжьыгъэх.

Сымэджагъэр бэдэд, унэгъо псаухэр сымэджэщым чIэлъхэу, зихьадэ зымыгъэежьышъу­гъэхэри, зыгъэтIылъыжьын зы­мылъэкIыгъэхэри къэхъугъэх. Ащ тетэу тхьамыкIагъор зынэсыгъэр макIэп. Иунэгъо шъыпкъэ имыхьагъэми, игъунэгъу, иIахьыл, иблагъ, инэIуас —хэт­ми зыгорэм нэсыгъ. Псаоу къэнагъэхэми джыри зыкъэ­зымышIэжьыгъэхэр ахэтых. Уз гъэтIылъыгъэу сымаджэхэм яIэ­хэр къэбырсырыгъэх. Сымэ­джэ­гъабэхэм аIоу зэхэпхыщт: «Ащ фэдэ уз ятIонэрэу сщэчыжьы­шъущтэп, Тхьэм хэти ар къыферэмыхь. Прививкэ сшIымэ ар къысэмынэсыщтмэ, сшIыщт».

Джыри нахь пхъэшахэу узым къыгъэзэжьыгъ, нахь лъэшэуи къызэкIэблэжьыгъ. Врачхэм къызэраIорэмкIэ, джы ар нахь гъэунэфыгъуай ыкIи къамышIэзэ пкъышъолым шъобжышхо рехы. БлэкIыгъэ илъэсым узыр къырыпшIэнэу, IэубытыпIэ пшIы­нэу зыгорэущтэу зыкъигъэлъагъощтыгъэмэ, джы нахь шъэфрытхъо хъугъэ. ЕтIанэ нэжъ-­Iужъмэ (илъэс 60-м ехъугъэмэ) яузэу ар алъытэщтыгъэмэ, джы къежьэгъэкIэ штаммым нахь ныбжьыкIабэ егъэсымаджэ.

Ары гур зыгъэкIодырэр.

Сыда адэ хэкIыпIэу щыIэр? Къэралыгъо пащэхэм «вакцинэр зыхяжъугъэлъхьан фай» аIо. Обществэм хэт цIыф зырызхэм «зыхяжъугъалъхьэ хъухэщтэп» аIо. ГъэшIэгъоныр — врачхэм ыкIи къэралыгъо пащэхэм «зы­хяжъугъалъхь, сыда пIомэ нэмыкI амал узым фытиIэп, апэрэ уахътэм ащ теIэзэнымкIэ къы­хэтхыгъэ IэзакIэмкIэ джы непэрэ штаммхэм тапэуцужьын тлъэкIырэп. ЦIыфхэр! IэпыIэгъу шъукъытфэхъу, шъори шъузы­фэхъужь, нэмыкIрэ хэкIыпIэ щыIэпышъ, вакцинэр зыхяжъугъалъхь!» аIо. Ахэм уямыдэIоу, сыдми «зыхязгъэлъхьащтэп, шъори зыхяшъумыгъалъхь» зы­Iохэрэм, нэмыкI хэкIыпIэ къыппэзымыгъохыхэрэм сыдэущтэу уядэIущт?

Уиунэ уимыкIэу, зыпари къы­пхэмыхьэу, цIыф умылъэгъоу ущыIэщтмэ, зыхямыгъалъхьэми хъункIи хъун, ау ащ тетэу цIыфыр сыдэущтэу щыIэщт, псэущт?

«Зыхяшъумыгъалъхь» зыIо­хэрэм яхьылIагъэу джыри къэпIон хъумэ, ягуIакIэ, якууакIэ гум джэнджэш къырегъахьэ. Ахэм янахьыбэр хабзэм фэмыразэхэр е ащ ыIорэм цыхьэ фэзымышIыхэрэр ары. Ахэр по­литикэм дехьыхых пIон плъэ­кIыщт. Шъыпкъэ, хабзэм иIорэ ишIэрэ зэтемыфэхэу къыхэкIы. Ар зыгъэфедэхэу, цIыфхэр зыгъэдаIохэрэри щыIэх. Узыр щымыIэу, ар къаугупшысыгъэу ахэм янахьыбэм аIо. Ау сыдэущтэу къэуугупшысынышъ, цIыф мин пчъагъэ бгъэлIэщта?

Арэу щытми, «цIыфыр щызыгъаIэрэр гугъэр ары» аIошъ, вакцинэр зыхябгъэлъхьанышъ, нахьышIум ущыгугъэу упсэущт…

Сихъу Гощнагъу.