Тэхъутэмыкъое районымкIэ автомобиль гъогоу «Инэм — БжыхьэкъоякIэр» зыфи­Iорэм итранспорт зэхэкIыпIэ ишIын лъагъэ­кIуатэ, 2023-рэ илъэсым нэс ар аухынэу агъэнафэ.

— Транспорт зэхэкIыпIэм ишIуагъэкIэ хы ШIуцIэ Iушъом кIорэ цIыфхэм зэпачырэ гъогоу А-146-у «Краснодар — Верхнебаканский» зыфиIорэр нахь нэкIы хъущт.

Псэуалъэм ишIын поселкэм дэсхэри ежэх, сыда пIомэ мэшIоку гъогум изэпычын нахь IэшIэх ыкIи щынэгъончъэ хъущт, — еIо КъумпIыл Мурат.

АР-м и ЛIышъхьэ къызэри­IуагъэмкIэ, IофшIэнхэр шап­хъэхэм адиштэхэу, пIалъэм блэ­мыкIэу ашIых. 2023-рэ илъэ­сым аухынэу агъэнафэ.

Гъогу зэхэкIыпIакIэр федеральнэ бюджетым къыхэхыгъэ ахъщэмкIэ ашIы. Мы илъэсым мыщ пэIухьащт сомэ миллиард 1,1-р къатIупщыгъ.

АдыгеимкIэ мэхьанэшхо иIэу щыт транспорт зэхэкIыпIакIэхэр шIыгъэнхэм. Ахэм яшIуа­гъэкIэ автомобильхэр нахьышIоу гъогухэм ащызекIохэ ­хъущт, гъогурыкIонымкIэ шап­хъэхэри къыдалъытэщтых. Экономикэм ихэхъоныгъэкIи, цIыф­хэм ящыIэкIэ-псэукIэ нахьышIу шIыгъэнымкIи гъогухэм яхэхъоныгъэ ишIогъэшхо къэ­кIощт.

ДЕЛЭКЪО Анет.