Къушъхьэм екIурэ гъогум шъущысакъ!
Адыгеим щыкIогъэ ощхышхохэм апкъ къикIыкIэ къушъхьэ цакIэр къыгоугъ.
Поселкэу Каменномостскэм узэрэдэкIэу хъугъэ-шIагъэр къыщыхъугъ. Автогъогоу «Мыекъуапэ — Гъозэрыплъ» зыфиIорэм ия 45-рэ километрэ къыщеохыгъэ мыжъо зэхэлъым транспортыр зэрыкIорэ гъогур зэфишIыгъ.
Адыгэ Республикэм хэгъэгу кIоцI IофхэмкIэ и Министерствэ ипресс-къулыкъу къызэритырэмкIэ, гъогу-патруль къулыкъум инаряд тедзэхэм, гузэжъогъу къулыкъухэм а чIыпIэм Iоф щашIэ. Гъогум игъэкъэбзэни ыуж ихьагъэх.