Наркотик зыхэлъ веществохэр къашIыщтыгъ

АР-м хэгъэгу кIоцI IофхэмкIэ и Министерствэ наркотикхэм хэбзэнчъэу ягъэзекIон лъыплъэрэ отделым Тэхъутэмыкъое районымкIэ иподразделение иIофышIэхэм Iофтхьэбзэ зэхэтэу зэрахьагъэхэм яшIуагъэкIэ, хэбзэнчъэу Iоф зышIэщтыгъэ нарколабораториер къычIагъэщыгъ.

ГъэбылъыгъэкIэ Iоф зышIэщтыгъэ лабораториер къатитIоу зэтет унэе унэу поселкэм дэтым хэтыгъ. Апэрэ къатым синтетикэм хэшIыкIыгъэ наркотикыр къыщыдагъэкIыщтыгъ. Ащ пае хэушъхьафыкIыгъэ Iэмэ-псымэхэр, жьыкъэщапIэр ыкIи Iэхэр къэзыухъу­мэхэрэ пкъыгъохэр, реактивхэр, къэмланэхэр, нэ­мыкI­хэри къызфагъэфедэщтыгъэ. Джащ фэдэу пластмассэм хэшIыкIыгъэ канистрэхэр къаIахыгъэх. Ахэм арытыгъэхэр экспертхэм агъэунэфы.

Полицием иIофышIэхэм къызэраIорэмкIэ, лабораторием Iэмэ-псымэу чIэтыгъэхэм нафэ къызэрашIырэмкIэ, мыхъущт веществохэр мыщ къыщагъэхьазырыщтыгъ.

Синтетикэм хэшIыкIыгъэ наркотикэу къыдагъэкIыгъэр ятIонэрэ къатым къэмланэмэ ащаратакъощтыгъэ. Следственнэ-оперативнэ купхэм грамм 200-м ехъурэ наркотик лъэпкъэу «соль» зыфиIорэр ащ къыщагъотыгъ. Хэбзэгъэуцугъэм къызэригъэнафэрэмкIэ, ар бзэджэшIэгъэ хьылъэхэм ахалъытэ.

Ежь нарколабораториер зычIэтыгъэ унэм илъэс 24-рэ зыныбжь кIалэу Къырым Республикэм щыщыр къыщаубытыгъ. ЗэрагъэунэфыгъэмкIэ, кIэлэ ныбжьыкIэм хэбзэнчъэу бизнес ыгъэпсын гухэлъ иIэу лабораториер зычIэтыгъэ унэр бэджэндэу ыштэгъагъ.

Следствием зэрилъытэрэмкIэ, наркотик зыхэлъ веществоу къыдагъэкIыщтыгъэр гъэбылъыпIэ чIыпIэхэм ащагъэтIылъызэ IуагъэкIыщтыгъ.

Iэмэ-псымэу къаIахыгъэхэр зэкIэ АР-м хэгъэгу кIоцI IофхэмкIэ и Министерствэ епхыгъэу Iоф зышIэрэ эксперт гупчэм агъэхьыгъэх. Илъэс 24-рэ зыныбжь кIалэм ылъэныкъокIэ уголовнэ Iоф къызэIуахыгъ. Санкцием истатья къызэригъэ­нафэрэмкIэ, анахь пшъэдэкIыжь инэу опсэуфэ хьапсым чIэсынэу кIалэм тыралъхьан алъэкIыщт.

Гъогогъу 13-рэ агъэпцIагъэх

Адыгеим иполицие къыIэкIэхьэгъэ къэбархэмкIэ, Iудзыгъэ шIыкIэр къызфагъэфедэзэ гъэпцIакIохэм тхьамафэм къыкIоцI бзэджэшIэгъэ 13 зэрахьагъ, зэрарыр сомэ миллионитфым кIахьэ.

Хъугъэ-шIэгъи 5-у агъэунэфыгъэмкIэ, гъэпцIакIохэм IэубытыпIэ ашIыгъэр банкым икартэ е ащ илъ ахъщэм гумэкIыгъо горэ къыпыкIыгъэу ары. КъыжъугурыIон ыкIи шъушIэн фае, шъуикартэ илъ ахъщэр щынэгъончъэу щытынымкIэ пшъэдэкIыжь зыхьырэр банк за­къор ары. Арышъ, банкым иIофышIэу ыIозэ шъумышIэрэ горэ шъуителефон къытеомэ, шъумыщт ыкIи ыIорэр шъушIошъ шъумыгъэхъу. ШъуадэмыгущыIэу псынкIэу телефоныр жъугъэтIылъыжь, нэужым банкым шъу­теуи къэбар шъыпкъэр зэжъугъашIэ.

ЕтIани корпоративнэм ехьыщыр номерхэмкIэ 8-495-…, 9-499…, 8-800…-кIэ цIыфхэм афытеохэзэ бэрэ агъапцIэх.

Джащ фэдэу мы аужырэ мазэхэм интернет-площадкэхэр, сайт зэфэшъхьафхэр къызфагъэфедэхэзэ зэкъодзакIохэм гъэпцIагъэ зыхэлъ бзэджэшIагъэхэр зэрахьэх.

Мыщ фэдэ бзэджэшIагъэхэр нахьыбэу зыщагъэунэфыгъэр къалэу Мыекъуап ары. Анахь хъугъэ-шIэгъэ инхэм ащыщ бэмышIэу республикэ гупчэм щызэрахьагъэр. Илъэс 51-рэ зыныбжь хъулъфыгъэм сомэ миллионищ фэдиз шIуатыгъугъ. ГъэпцIакIохэр хъулъфыгъэм фытеохи, финанс учреждением иIофышIэхэу ышIошъ агъэхъугъ ыкIи икартэ илъ ахъщэр щынэ­гъончъэу ухъумэгъэным фэшI ышIэн фаехэр къыра­Iуагъ. ГъэпцIакIохэм ялъэIу зафегъэцакIэм, ащ икартэ илъыгъэ ахъщэу сомэ миллиони 3 фэдиз хъурэр рахыгъ.

Мыщ фэдэ шIыкIэмкIэ Мыекъуапэ щыпсэурэ бзылъфыгъэр агъэдели сомэ миллионым ехъу шIуатыгъугъ. ГъэпцIакIохэм бзылъфыгъэм ышъхьэ «зэIагъахьи», тIогъогогъо сомэ мин 200, нэужым сомэ мин 626-рэ ясчет афыригъэхьагъ.

Мыщ фэдэ щысэхэр бэу къэпхьын плъэкIыщт. Полицием иIофышIэхэм цIыфхэм закъыфегъазэ сакъыныгъэ къызхагъэфэнэу, амышIэрэ цIыфхэм цыхьэ афамышIынэу.

Анахь чанхэр къыхагъэщыгъэх

Хэбзэ рэхьатныгъэр къэухъумэ­гъэ­нымкIэ Iоф зы­шIэрэ студент отрядэу «Абаго» зыфиIоу Адыгэ къэра­лы-гъо университетым епхыгъэм иIоф­шIэн зыщызэфа­хьысыжьыгъэ Iоф­тхьа­бзэм АР-м хэгъэгу кIоцI Iоф­хэмкIэ и Министерствэ наркотикхэм ягъэ­зекIон лъыплъэрэ отделым икъулыкъу­шIэ­хэр хэлэжьагъэх.

Ведомствэм иподразделение ыцIэкIэ Iофтхьабзэм хэлэжьагъ полицием иподполковникэу Агъыржьэнэкъо Аслъан.

Министерствэм илIыкIо студентхэм закъыфигъа­зэзэ къыIуагъ хэгъэгу кIоцI къулыкъумрэ Адыгеим хэбзэ рэхьатныгъэр къыщыухъумэгъэнымкIэ отрядхэмрэ зэгъусэу зэрэзэдэлажьэхэрэм ишIогъэшхо къызэрэкIорэр. Наркоманием пэуцужьыгъэным ныбжьыкIэхэм яIахьышIу зэрэхашIыхьэрэм фэшI студент отрядэу «Абаго» зыфиIорэм хэт активистхэм рэзэныгъэ гущыIэхэр афигъэзагъ.

Нэужым АР-м хэгъэгу кIоцI IофхэмкIэ и Министерствэ наркотикхэм ягъэзекIон лъыплъэрэ отделым икъулыкъушIэхэм Iофтхьабзэхэм язэхэщэнкIэ яшIуагъэ къязыгъэкIыгъэ анахь студент чанхэм ведомственнэ рэзэныгъэ тхылъхэр аратыгъэх. Ахэр: Владислав Тамазовыр, Андрей Летута, Анастасия Лутай, Дарья Дачковар, Хьакурынэ Джэнэт, ХъутIыжъ Дамир, Гъом­лэшк Эльдар, Шэуджэн Батыр, СтIашъу Бислъан, нэмыкIхэри.

ЫпкIэ хэлъэу атыжьын алъэкIыщт

Росгвардием игъэIорышIапIэу Адыгэ Республикэм щыIэм цIыфхэм закъыфегъазэ Iашэхэр, шхончхэр, къэорэ пкъыгъохэр ыпкIэ хэлъэу атыжьынхэмкIэ программэм чанэу хэлэжьэнхэу.

Къыхэгъэщыгъэн фае, хэбзэнчъэу агъэфедэрэ Iашэр ежь-ежьырэу затыжьыкIэ, уголовнэ пшъэдэкIыжь ара­гъэхьыщтэп.

Зэхэубытэгъэ программэу «Профилактика правонарушений» зыфиIоу Адыгэ Республикэм иминистрэхэм я Кабинет ыухэсыгъэм къыделъытэ хэбзэнчъэу агъэфедэрэ Iашэр е нэмыкI къэорэ пкъыгъохэр цIыфым ежь ишIоигъоныгъэкIэ зитыжьыкIэ, шIухьафтынэу сомэ мини 100 ратынэу.

Росгвардием игъэIорышIапIэу Адыгеим щыIэмрэ АР-м хэгъэгу кIоцI IофхэмкIэ и Министерствэрэ зэгъусэхэу зэрахьэгъэ узыгъэгъозэрэ пэшIорыгъэшъ Iофтхьабзэм ишIуагъэкIэ 2020-рэ илъэсым авиационнэ пкъыгъо 24-рэ, зы гранат, зы автомат, машIокIэ орэ Iашэу 10 ыкIи сомэ мин 27-м ехъу зыосэ щэ 29-рэ къатыжьыгъэх.

Хэбзэнчъэу жъугъэфедэрэ Iашэр къэшъутыжьыным фэшI хэгъэгу кIоцI къулыкъум идежурнэ частэу рес­публикэм имуниципальнэ образованиехэм ащыIэхэм е Росгвардием игъэIорышIапIэу Адыгеим щыIэм илицензионнэ подразделениехэм яофисхэу зэкIэ районхэм ащыIэхэм ахэр яшъухьылIэнхэ шъулъэкIыщт.

Къэзыгъэхьазырыгъэр КIАРЭ Фатим.