Саугъэтыр Мыекъуапэ къахьыжьыщт
Социальнэ сетеу «Instagram» зыфиIорэр къызфигъэфедэзэ, Урысыем и ЛIыхъужъэу, ГРУ-м испецназ ихэушъхьафыкIыгъэ бригадэ илейтенант шъхьаIэу Владислав Долониным ышэу Николай шъолъыр гъэIорышIэнымкIэ Гупчэм зыкъыфигъэзагъ. ЛIыхъужъым исаугъэт (бюст) къызщыхъугъэ къалэм къахьыжьыным пае чIыпIэ къыратыным къыкIэлъэIугъ.
Шъолъыр гъэIорышIэнымкIэ Гупчэм зэригъэунэфыгъэмкIэ, 2016-рэ илъэсым Свердловскэ шъолъырым Белоярскэ къэлэ псэупIэмкIэ къутырэу Малые Брусяны зыфиIорэм Урысыем и ЛIыхъужъ шIэжь саугъэт щыфагъэуцугъагъ. БэмышIэу дзэ частыр зэблахъугъ, чIыпIэр хэушъхьафыкIыгъэ кIэлэцIыкIу учреждением ратыжьыгъ. Мэлылъфэгъу мазэм Белоярскэ къэлэ псэупIэм иадминистрацие илIыкIо Николай къыфытеуагъ, Владислав исаугъэт къызыщыхъугъэ къалэм ыхьыжьынэу къыраIуагъ.
— Урысыем и ЛIыхъужъэу Владислав Долониным исаугъэт А. И. Макаренкэм ыцIэ зыхьырэ гурыт еджапIэу N 3-м дагъэуцонэу Мыекъопэ къэлэ администрацием зэзэгъыныгъэ дишIыгъ. Ар загъэуцукIэ, муниципальнэ гъэпсыкIэ зиIэ «Къалэу Мыекъуапэ» тарихъымкIэ ыкIи культурэмкIэ имыжъобгъухэм ахагъэхьащт, — къыIуагъ муниципалитетым ипащэ ипшъэрылъхэр зыгъэцэкIэрэ Сергей Стельмах.
Владислав Долониныр зэо-зэпэуцужь пчъагъэхэм ахэлэжьагъ. 1995-рэ илъэсым гъэтхапэм и 3-р ищыIэныгъэкIэ аужырэ мэфагъ. Иунагъо, игупсэхэм, иныбджэгъухэм лIыхъужъыныгъэшхоу зэрихьагъэр агу дахэкIэ къинэжьыгъ. Ежь Владислав хэкIодагъ, ау къулыкъу дэзыхьырэ нэбгырэ 28-р псаоу къыгъэнэжьыгъ.
Адыгеим и ЛIышъхьэ и Администрацие ыкIи АР-м иминистрэхэм я Кабинет, Мыекъопэ къэлэ администрациер Шъолъыр гъэIорышIэнымкIэ Гупчэм иIэпыIэгъухэу ЛIыхъужъым исаугъэт зыщагъэуцущт чIыпIэр агъэнэфагъ. Гурыт еджапIэу зыщеджагъэм мыжъобгъу къыщыфызэIуахыгъагъ, зыщеджэщтыгъэ классхэм ащыщым «ЛIыхъужъым ипартэ» щагъэпсыгъэу кIэлэеджэкIо анахь дэгъухэр дэсых. Джы Владислав Долониным исаугъэти гурыт еджапIэм дэтыщт. МэфэкI шIыкIэм тетэу Iоныгъом и 1-м ар къызэIуахыщт.
Шъолъыр гъэIорышIэнымкIэ Гупчэм игукъэкIыкIэ Владислав Долониным исаугъэт QR-кодым рапхыщт. МыекъуапэкIэ ар апэрэу агъэфедэщт. Ащ ишIуагъэкIэ, мобильнэ телефоным лIыхъужъыныгъэу кIалэм зэрихьагъэхэр зэрыт социальнэ сетым ихьанхэ алъэкIыщт. Нэужым нэмыкI саугъэтхэри, тарихъ чIыпIэхэри, республикэм издание зэфэшъхьафхэри рапхыщтых. Шъолъырым анахь мэхьанэ зиIэхэ чIыпIэхэм якъэбар Адыгеим щыпсэухэрэми, хьакIэу къакIохэрэми къин къащымыхъоу зэрагъэшIэн алъэкIыщт.
ДЕЛЭКЪО Анет.