УФ-м и Федеральнэ ЗэIукIэ ФедерациемкIэ и Совет и Тхьаматэ игуадзэу Николай Журавлевыр Адыгэ Республикэм икъэлэ шъхьаIэ тыгъуасэ щыIагъ. Вице-спикерым IофшIэгъу зэIукIэгъу заулэ иIагъ, джащ фэдэу мэхьанэшхо зиIэ социальнэ ыкIи промышленнэ псэуа­лъэхэм ащыщхэр къыплъыхьагъэх.

Николай Журавлевыр Адыге­им и ЛIышъхьэу КъумпIыл Му­рат зыIокIэм, республикэм со­циальнэ-экономикэ хэхъоныгъэ ышIыным иIофыгъохэм, ин­вестициехэмкIэ нахь хъопсагъо хъуным, джащ фэдэу фе­деральнэ хэбзэгъэуцугъэр на­хьы­шIоу гъэпсыгъэнымкIэ шъо­лъырым ипащэхэм предложениеу къахьыгъэхэм атегущы­Iагъэх.

Мы мэфэ дэдэм Н. Журавлевым Адыгэ къэралыгъо университетым иректорэу Мамый Даутэ зэIукIэгъу дыриIагъ. Шъо­лъырым гъэсэныгъэм хэхъоныгъэ щишIыным ыкIи федеральнэ программэхэр республикэм щыгъэцэкIэгъэнхэм яIофыгъохэр ары анахь шъхьаIэу ахэр зытегущыIагъэхэр.

Парламентарием Мыекъуапэ ипромышленнэ псэуалъэхэм ащыщхэри къыплъыхьагъэх.

— Адыгеим социальнэ-экономикэ хэхъоныгъэ ышIыным иунэе программэ шIуагъэу къы­тырэр шъолъырми, цIыфхэми зэ­хашIэн фае. Псауныгъэр къэу­хъумэгъэным, гъэсэныгъэм ыкIи культурэм алъэныкъокIэ фэIо-фашIэхэр цIыфхэм зэрифэшъуашэу афэгъэцэкIэгъэнхэр, промышленнэ къыдэгъэкIыным хэгъэхъогъэныр, инвестиционнэ проектыкIэхэр гъэпсыгъэнхэр пшъэрылъ шъхьаIэх. ЦIыфхэм ящыIэкIэ-псэукIэ нахьышIу шIыгъэным а пстэури фэIорышIэ, — къыхигъэщыгъ Николай Журавлевым.