ШIэныгъэлэжьэу Цуекъо Алый «Адыгэмэ алъэ­къуа­цIэхэмрэ ятамыгъэхэмрэ» зыфиIорэ тхы­лъыр 2015-рэ илъэсым Мыекъуапэ къыщыдигъэкIыгъ.

Тхылъыр цIыфхэр зыгъэгу­мэкIыхэрэ лъэпкъ лъэкъуацIэхэм ятхыкIэрэ лIакъохэм ята­мыгъэхэмрэ афэгъэхьыгъ. Илъэ­си 10 Iоф зыдишIэгъэ тхылъыр еджакIохэм ашIогъэшIэгъон. Адыгэ унагъо пэпчъ ащ фэдэ тхылъ иIэн фаеу зылъытэрэмэ адетэгъаштэ.

— ЦIыфыбэ тхылъым къызэ­рэкIэупчIэрэр сигуапэ, ау ащэфынэу аIуагъэми тучанхэм ачIэ­лъыжьэп, — къытиIуагъ Цуекъо Алый. — Тхылъым ия 3-рэ едзыгъо сэгъэхьазыры. Хэхъо­ныгъэу ащ фэсшIыгъэр макIэп. Лъэшэу сафэраз лъэкъуацIэхэм якъэIуакIэ, тамыгъэхэм ятеплъэ сыугъоихэ зэхъум IэпыIэгъу къысфэхъугъэхэм.

ХыIушъом щыпсэурэ шапсы­гъэхэм алъэкъуацIэхэм ятхыкIэ ехьылIагъэу Цуекъо Алый телефонкIэ къыфытеох, лIакъохэм ятамыгъэхэм якъэбархэр къыфаIуатэх. Мыекъуапэ, Кощхьэблэ районым, нэмыкIхэм ащы­псэурэмэ тхылъым хэхъоныгъэхэр фашIыхэ ашIоигъу. Зы лIа­къом итамыгъэхэр зэфэмыдэхэу къызэрэхэкIырэм, лIакъом тамыгъэ заулэ иIэнэу зэрэхъугъэм, фэшъхьафхэм авторым уащегъэгъуазэ.

Гум къео тиныбжьыкIэхэм ащыщхэм, анахьэу спортсменхэм, культурэм иIофышIэхэм, адыга­бзэкIэ алъэкъуацIэ тэрэзэу къытаIон амылъэкIэу къызэ­рэхэкIырэр. Бзэр — псэ.

Лъэ­къуацIэм лIакъор къырыошIэжьы.

Цуекъо Алый тхылъыр къы­зыдегъэкIым ыуж адыгэхэм яунэ ихьапIэхэм, щагу дэхьапIэхэм лIакъохэм ятамыгъэхэм ясурэтхэр атырашIыхьагъэх. Анахьэу къыхэдгъэщмэ тшIоигъор автома­шинэ пэпчъ пIоми хъунэу лIа­къом итамыгъэ исурэт зэрэщытетлъагъорэр ары.

Лъэпкъ шIэжьыр, адыгабзэм изэгъэшIэнрэ игъэфедэнрэ щы­Iэныгъэм щыпхырищыхэзэ, авторым зэгъэпшэнхэр уегъэшIых. Тхылъым икъыдэгъэкIын ахъщэу тефэщтыр, нэмыкI зэхэщэн Iоф­хэр къыдэтэлъытэх. IэкIыб къэралхэм арыс тилъэпкъэгъухэр тхылъым къызэрэкIэуп­чIэхэрэр къыхэдгъэщызэ, лъэпкъ шIэжьым изыкъегъэIэтын Цуекъо Алый зэрэпылъыр IофшIэгъэ дэгъоу тэлъытэ. Тхылъыр шIэхэу къы­хаутынэу тэгугъэ.