Урысыем щынэгъончъэнымкIэ и Совет и Секретарэу Николай Патрушевым Адыгеим щызэ­хищэгъэ зэхэсыгъом хэлэжьагъэх УФ-м и Президент иполномочнэ лIыкIоу Къыблэ федеральнэ шъолъырым щыIэ Владимир Устиновыр, ЮФО-м хэхьэрэ шъолъырхэм япащэхэр, федеральнэ ведомствэхэм ащыщхэм ялIыкIохэр. Iофтхьабзэм хэлэжьагъ Адыгэ Республикэм и ЛIышъхьэу КъумпIыл Мурат.

Iофыгъо шъхьаIэу къэзэрэугъоигъэхэр зытегущыIагъэхэр къэралыгъом и Къыблэ хэхьэрэ шъолъырхэм экологием ылъэны­къокIэ ящынэгъончъагъэ къэу­хъу­мэгъэныр ары. Мыщ фэгъэ­хьыгъэу къэгущыIагъ Владимир Устиновыр. Ащ къызэрэхигъэщыгъэмкIэ, тыкъэзыуцухьэрэ дунаир къэухъумэгъэным епхыгъэ гумэкIыгъохэр непэ Iофыгъо шъхьаIэу щытых. 2025-рэ илъэ­сым нэс телъытэгъэ экологие щынэгъончъэным и Стратегиеу УФ-м и Президент зыкIэтхэжьыгъэр къэралыгъом щагъэцакIэ. БлэкIыгъэ илъэсым лъэпкъ про­ектэу «Экологием» къыдыхэ­лъы­тагъэу Къыблэ федеральнэ шъолъырым хэхьэрэ субъектхэм региональнэ программэ 36-рэ агъэцэкIагъ.

— Ау гумэкIыгъоу щыIэр макIэп. Прокуратурэм, Росприроднадзорым, министерствэхэм ячIыпIэ къулыкъухэм къызэратырэмкIэ, чIыопсым зэрарэу рахырэм ренэу хэхъо. 2020-рэ илъэсым ар сомэ миллиард 1,5-м ехъугъ, экологием зэрарэу рахыгъэр зэкIэмкIи сомэ миллиарди 10-м кIахьэ, — къыIуагъ Владимир Устиновым.

УФ-м и Президент иполномочнэ лIыкIоу Къыблэ федеральнэ шъолъырым щыIэм эко­логием ылъэныкъокIэ гу­мэкIыгъо шъхьаIэхэм къэзэрэу­гъоигъэхэм анаIэ тыраригъэ­дзагъ. Ахэр: чIыопс ыкIи тех­но­геннэ ошIэ-дэмышIагъэхэр, шапхъэхэм адиштэрэ зашъохэрэ псыр зэрафимыкъурэр, къэлэшхохэм жьыр зэращышIоир, пыдзэфэ пытэхэр зыщыратэ­къурэ чIыпIэхэу хэбзэнчъэу къы­зэIуахыхэрэр, нэмыкIхэри. Къэралыгъо экологическэ уплъэ­кIуным ыкIи лъыплъэным икъу фэдизэу шIуагъэ къамытэу Вла­димир Устиновым ылъытагъ.

Николай Патрушевым къы­зэриIуагъэмкIэ, Урысые Федерацием лъэпкъ щынэгъончъэнымкIэ и СтратегиякIэкIэ тыкъэ­зыу­цухьэрэ дунаир къэухъумэгъэныр, чIыопс къэкIуапIэхэр къы­зэтегъэнэгъэнхэр пшъэрылъ шъхьаIэу щытых.

Экологием епхыгъэ гумэкIыгъохэр дэгъэзыжьыгъэхэ зымыхъукIэ, цIыфхэм щыIэкIэ-псэу­кIэ амалэу яIэри нахь дэй хъун зэрилъэкIыщтыр зэхэсыгъом къыщаIуагъ. Ащ дакIоу мы пшъэ­рылъхэм язэшIохынкIэ щысэшIу къэзыгъэлъэгъорэ шъолъырхэри щыIэх.

— Экологие щынэгъончъэныр шъолъырым щыгъэпытэгъэнымкIэ, псыр ыкIи жьыр нахь къабзэ шIыгъэнхэмкIэ амал тедзэ­хэм зэхэсыгъом тащытегущы­Iэщт. Мы лъэныкъом къэралыгъор лъыплъэн зэрэфаем дакIоу, экологическэ гъэсэныгъэм, культурэм ахэдгъэхъоным тыпылъын фае, — къыIуагъ Николай Патрушевым зэфэхьысыжьхэр къышIызэ.

Специалистхэм зэралъытэ­рэмкIэ, Адыгеим экологием ылъэныкъокIэ Iофхэм язытет зыпкъ ит. Лъэпкъ проектэу «Экологием» илъэныкъуи 4-мэ республикэр ахэлажьэ: «Псы къабзэр», «Мэзхэм якъэухъу­мэн», «Зыми фэмыдэ псы объ­ектхэр къэухъумэгъэнхэр», «Пы­дзафэхэм ягъэзекIон фэ­гъэзэгъэ комплекснэ отраслэм изэхэщэн».

— Экологическэ системэхэм атегъэуагъэм ренэу зэрэхахъо­рэр зэхэтэшIэ, арышъ, чIыопсыр къэухъумэгъэн зэрэфаер къыдэтлъытэзэ экономикэм хэхъоныгъэ едгъэшIын фае. Экологием изытет зыфэдэм цIыфхэм япсауныгъи бэкIэ елъы-тыгъ. Арышъ, Адыгеим къэралыгъо политикэмкIэ ипшъэрылъ шъхьаIэу къэнэжьых тыкъэзыуцухьэрэ дунаир къэухъумэгъэныр, шапхъэу щыIэхэр гъэцэ­кIэгъэнхэр, — къыIуагъ Iофтхьа­бзэм зэфэхьысыжьхэр къыфи­-шIызэ КъумпIыл Мурат. АР-м и ЛIышъхьэ ипресс-къулыкъу