Урысыем псэупIэ-коммунальнэ хъызмэтымкIэ и Министерствэ ипащэ игуадзэу Максим Егоровымрэ Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевымрэ Мыекъуапэ щызэтырагъэпсыхьэрэ псэуалъэхэм ащыIагъэх.

Апэрэ объектэу зэкIолIагъэ­хэр урамхэу Пушкиным ыцIэ зыхьырэмрэ Краснооктябрьскэмрэ зыщызэолIэхэрэ чIыпIэм щыт скверыр ары. Къэралыгъо программэу «ШэпхъэшIухэм адиштэрэ къэлэ щыIакIэр гъэ­псыгъэныр» зыфиIорэм къыды­хэлъытагъэу мыр зэтырагъэ­псыхьагъ. ЗэкIэмкIи ащ сомэ миллиони 7 пэIуагъэхьагъ, ащ щыщэу миллиони 6-р феде­ральнэ бюджетым къыхэхыгъ.

Максим Егоровым чIыпIэр къыплъыхьагъ, шэпхъэшIухэм адиштэу IофшIэнхэр зэрэщызэхащагъэхэр хигъэунэфыкIыгъ. ЛъэсрыкIо гъогухэр ашIыгъэх, урамыр къэзыгъэнэфырэ ыкIи хэкIыр зыратэкъорэ пкъыгъохэр, тIысыпIэхэр агъэуцугъэх.

— Объектым иархитектурнэ теплъэ къэлэ паркым дэгъоу дештэ. Мыщ дэт фонтаныр зэрэгъэпсыгъэр лъэшэу сыгу рихьыгъ. Мы аужырэ илъэсхэм къалэм нахь дахэу зызэрэзэрихъокIыгъэр нэрылъэгъу, федеральнэ проектхэри зэри­фэшъуашэу щагъэцакIэх. Джащ фэдэу проектэу «Псы къабзэр» шIуагъэ къытэу республикэм щагъэцакIэ, жъы хъугъэ унэхэм арысхэр гъэкощыгъэнхэмкIэ IофшIэнышхо щызэшIуахы. Мы лъэныкъомкIэ Адыгеим и Правительствэ къэгъэлъэгъоны­шIу­хэр иIэх, — къыхигъэщыгъ Мак­сим Егоровым.

— БлэкIыгъэ илъэсым мы программэм къыдыхэлъытагъэу сомэ миллион 60-м ехъу тедзэу къытIэкIэхьагъ. Мы илъэсми арэущтэу щытынэу тыщэгугъы, — къыIуагъ шъолъыр Мини­стерствэм ЖКХ-мкIэ и ГъэIорышIапIэ ипащэу Ныбэ Руслъан.

Нэужым Мэздахэ узэрэдэ­кIоещт чIыпIэм къэзэрэугъоигъэ­хэр екIолIагъэх. Объектым къы­пэIулъ чIыпIэм изэтегъэ­псыхьан сомэ миллиони 7-м ехъу пэIуагъэхьагъ, мылъкур зэкI пIоми хъунэу республикэ бюджетым къытIупщыгъ. Мэз­дахэ узэрэдэкIоещт лъэоир ин­весторхэм яахъщэкIэ зэтырагъэпсыхьагъ. Джащ фэдэу чъыги 155-рэ щагъэтIысыгъ. ЦIыфхэм зызщагъэпсэфын алъэ­кIыщт чIыпIэхэр, лъэсрыкIо гъо­гухэр агъэпсыгъэх.

Мыекъопэ къэлэ админист­рацием ыгъэхьазырырэ заявкэмкIэ Мэздахэ ышъхьагъкIэ чIыпIэхэр зэтырагъэпсыхьанхэу агъэнафэ.

Общественнэ чIыпIэу зэтырагъэпсыхьащтхэр ежь цIыфхэм къыхахын амал яI. Мыекъуапэ щыпсэурэ нэбгырэ мин 23-м ехъу мэкъэтыным хэлэжьагъэх. Зэфэхьысыжьхэм адиштэу чIыпIитIу къыхахыгъ: урамэу Чкаловым ыцIэ зыхьырэм тет унэу N 65-р ыкIи Комсомольскэмрэ Краснооктябрьскэмрэ зыщы­зэхахьэхэрэр. Ахэм апэIухьащт мылъкур игъом къаIэкIахьэмэ 2022-рэ илъэсым зэтырагъэ­псыхьащтых.