Ощх зэпымыоу щыIагъэхэм апкъ къикIыкIэ Тэхъутэмыкъое районым ит къуаджэу БжыхьэкъоякIэ пхырыкIырэ псыхъоу Афыпс къыдэкIыгъ. Бэдзэогъум и 6-м пчыхьэм сыхьатыр 9-м адэжь коммерцием емыпхыгъэ садоводческэ товариществиплIымэ ар акIэуагъ. Ахэм ащыщых «Берег Афипса» зыфиIорэм дэт унэ 46-р ыкIи щагу 51-р, «Приречнэм» иунэгъуитIу ыкIи щагуищ, «Красная Звезда» зыфиIорэм изы ун, зы щагу. Зы бзылъфыгъэ хэкIотагъэ псы къызыкIэогъэ унэм къыращыжьыгъ.

Граждан ухъумэнымкIэ ыкIи ошIэ-дэмышIэ IофхэмкIэ Ко­ми­тетым къызэритыгъэмкIэ, бэ­дзэогъум и 7-м псыр зэкIэкIонэу ригъэжьагъ нахь мышIэми, ошIэ мыхъо-дэмышIэр къэхъуным фэхьазырых. Бэдзэогъум и 6-м сыхьатыр 10-м къыще­­гъэ­жьагъэу Тэхъутэмыкъое рай­оныр «Гъэлъэшыгъэ шIыкIэм» тет режимым техьагъ.

Мы мафэм ехъулIэу садовэ товариществэмэ адэт унэ 98-мэ ыкIи щагу 56-мэ псыр къа­кIэуагъ. Энем дэт гурыт еджапIэу n 6-р нэбгырэ 500 чIэ­фэнэу агъэхьазырыгъ.

ГумэкIыгъо зыдэщыIэхэ чIыпIэхэм ошIэ-дэмышIэ IофхэмкIэ Министерствэм икъулыкъу­шIэхэр, район администрацием илIыкIохэр ащыIэх, ищыкIэгъэ техникэр аращэлIагъ.

Бэдзэогъум и 7-м сыхьатыр 8-м къыщегъэжьагъэу псы­хъом ианахь чIыпIэ щынагъохэр ауплъэкIунхэу рагъэжьагъ, псыр къызыкIэуагъэхэ унагъохэр къакIухьэх.

Псыр тыгъуасэ ехъулIэу зэ­кIэкIожьыгъ нахь мышIэми, ащ гумэкIыгъохэр къызыдихьыгъэх. Пчэдыжьым сыхьатыр 8-м адэжь унэ 41-мэ ыкIи щагу 78-мэ псыр джыри адэтыгъ.

ДЕЛЭКЪО Анет.