УФ-м и Президентэу Владимир Путиным зынэхэм амылъэгъухэрэм апае ашIыгъэ псэуалъэу «дисплей Брайля» зыфиIорэр реабилитацием ищыкIэгъэхэ пкъыгъохэм ахагъэхьанэу УФ-м и Правительствэ унашъо фишIыгъ.

«Линие занкIэу» къэралы­гъом ипащэ джырэблагъэ зэхищэгъа­гъэм упчIэ щезытыгъэхэм ащыщ илъэс 13 зыныбжь пшъэ­шъэжъыеу Мыекъуапэ щыпсэурэр. Малика Алиевам илъэсих ныIэп ыныбжьыгъэр ынэхэм амылъэгъужьэу къызэнэм. «Линие занкIэр» щыIэным ыпэкIэ Урысые народнэ фронтым хэт­хэм спонсор къагъоти ащ мы дисплеир фащэфыгъ. Реабилитацием пае тихэгъэгу къыщашIыгъэу, ыпкIэ хэмылъэу зищыкIагъэхэм аIакIагъахьэхэрэм яспискэ ар хэбгъэуцон плъэкIыщтмэ пшъэшъэжъыер Президентым еупчIыгъ.

Владимир Путиным зипсауныгъэ пыч фэхъугъэхэм ящыкIагъэхэр зыщыгъэнэфэгъэ спискэ зэрэщыIэр къыушыхьатыжьыгъ. Ары пакIошъ, джы электроннэ шIыкIэм тетэу ящыкIэгъэ пкъыгъор къыхахышъунэу шIыгъэным ыуж итыхэу ары къызэриIуагъэр. Пшъэшъэжъыем ишIоигъоныгъэ зэрагъэцэкIэщтым кIигъэтхъызэ, Премьер-министрэм игуадзэу Татьяна Голиковам ар фигъэзагъ.

«Дисплей Брайля» Малика къыфэзыщэфыгъэр компаниеу «Исток Аудио» зыфиIорэм ипащэу Иван Климачевыр ары. Зынэхэм амылъэгъухэрэм компьютерыр агъэфедэн алъэкIынэу ащ къешIы.