Къэралыгъо Думэм ыкIи Адыгеим и Къэралыгъо Совет – Хасэм идепутатхэм яхэдзынхэр мэфищэ, Iоныгъом и 17-м къыщегъэжьагъэу и 19-м нэс зэхащэщтых. Роспотребнадзорым къыгъэуцугъэ шапхъэхэм къапкъырыкIыхэзэ ар агъэнэфагъ.

БлэкIыгъэ илъэсхэм хэдзынхэр зы мафэкIэ зэхащэщтыгъэх. Ау 2020-рэ илъэсым бэдзэогъум и 31-м мыщ епхыгъэ хэбзэгъэуцугъэм зэхъокIыныгъэхэр фашIыгъэх. УФ-м и Конституцие хэгъэхъонхэр фэшIыгъэнхэм фэгъэхьыгъэ хэдзынхэр мэкъэтыныр мэфищэ зэхащэгъагъ.

— Пандемием ыпкъ къикIыкIэ хэдзынхэр мэфищэ кIонхэр нахь тэрэз. Санитарнэ-эпидемиологическэ шапхъэхэр зехьэгъэнымкIэ, цIыфхэм япсауныгъэ къэухъумэгъэнымкIэ, чэзыум хэмытынхэмкIэ мэфищ хэдзы­ныр нахь гупсэф, — еIо Урысыем июристхэм я Ассоциацие и Адыгэ шъо­лъыр къутамэ Адыгеим и Общественнэ палатэ, «Независимый общественный мониторинг» зыфиIорэм и Ассоциацие ахэтэу Щыкъ Раситэ.

МэкъэтынымкIэ шIыкIитIу агъэфедэщт, участкэм къекIуалIэхэрэм ыкIи унэм исэу ахэм ахэлажьэхэрэм апае шъхьафыщт. Ащ нэмыкIэу хэдзынхэр зыщыкIощт чIыпIэ зыдэмыт ыкIи транспорткIэ зэмыпхыгъэ псэупIэхэм Iоныгъом и 17-м ыкIи и 18-м хэдзын тедзэхэр яIэщтых.