ЛъэIу тхылъхэр аштэнхэу рагъэжьагъ

Сабый къыфэхъунэу ежэрэ бзылъ­фыгъэхэмрэ изакъоу кIэлэцIыкIур зы­пIухэрэмрэ афагъэнэфэгъэ ахъщэ тыным игъэпсын пае лъэIу тхылъхэр ыштэнхэу УФ-м ПенсиехэмкIэ ифонд ригъэжьагъ.

Мы IэпыIэгъум къыхиубытэхэрэм фондым икъулыкъоу цIыфхэм Iоф адэзышIэрэм е къэралыгъо фэIо-фашIэхэм япортал тхылъхэр ащатынхэ алъэкIыщт.

Сабый къыфэхъунэу ежэрэ бзылъфыгъэу щыIэныгъэм чIыпIэ къин ригъэуцуагъэм мазэ къэс ахъщэ къыфэкIонэу ыгъэпсын фит. Ащ пае жьэу учетым зыщаригъэтхын фае. Ахъщэр къыратынымкIэ унагъом игъот зыфэдизыми мэхьанэ иI. Законым къызэрэщыдэлъытагъэмкIэ, цIыфыр зэрыпсэун ылъэкIыщт ахъщэ анахь макIэу шъолъырым щагъэнэфагъэм ар шIокIынэу щытэп. АдыгеимкIэ ар сомэ 9779-рэ мэхъу. Ащ ызыныкъом фэдиз мазэ къэс ахъщэ тынэу къа­фэкIощтыр.

Бзылъфыгъэр учетым зыхэуцуагъэм ыуж мэфэ 30 нахьыбэ темышIэзэ лъэIу тхылъыр ытыгъэмэ, а мэзэ дэдэм къыщыублагъэу ахъщэр къыфэкIонэу фагъэ­псыщт, нахь кIасэу ытыгъэмэ, а уахътэм къыщегъэ­жьагъэу IэпыIэгъур ыгъотыщт.

ЯтIонэрэ ахъщэ тыныр кIэлэцIыкIоу зыныбжь илъэ­си 8 икъугъэу, ау 17-м шIомыкIыгъэхэр ары къыз­фатыщтыр. Мыщи шэпхъэ гъэнэфагъэхэр пылъых. Нымрэ тымрэ язырэр дунаим ехыжьыгъэмэ, зыдэщыIэр амышIэу кIодыгъэмэ е кIэлэцIыкIур къызэрэхъугъэр къэзыушыхьатырэ тхылъым имытхагъэмэ, адрэ къэнагъэу зыпIурэр ары къэралыгъом IэпыIэгъу къызэритыщтыр.

Сабыир ибэу къэнагъэу, къэралыгъом ымыIыгъэу, лъыплъэн иIэмэ, джа лъыплъэрэр мы законым къыхеубытэ. Джащ фэдэу кIэлэцIыкIум алимент къы­фэкIонэу фаеу хьыкумым рихъухьагъэу щытмэ, ар зыпIурэ ным е тым мазэ къэс ахъщэ тыныр къы­фэкIонэу ыгъэпсын ылъэкIыщт.

КIэлэцIыкIур зэрыпсэун ылъэкIыщт ахъщэ анахь макIэу шъолъырым щагъэнэфагъэм ызыныкъом ар фэдиз. АдыгеимкIэ сабый пэпчъ сомэ 5030-рэ къы­фэкIонэу мэхъу.

Картэу «Мир-м» къихьащтых

Федеральнэ хэбзэгъэуцугъэу «О национальной платежной системе» зыфиIорэм къызэрэщыдэлъытагъэмкIэ, пенсие е нэмыкI ахъщэ тын къыз­факIоу ар банкым къызIэкIигъахьэхэрэм бэдзэогъу мазэм и 1-м къыще­гъэжьа­гъэу картэу «Мир» зыфиIорэр яIэн фае, а ахъщэхэр нэмыкI картэ къы­рагъэхьажьыщтхэп.

Почтэм е нэмыкI организациеу пенсиехэр аIэкIэз­гъахьэхэрэм къызфихьыхэрэм мы шапхъэр анэсырэп.

Арэу щытми, нэмыкI картэкIэ (MasterCard, Visa, нэмыкIхэр) къызIэкIахьэу «Мир-р» зымыгъэпсыгъэхэми яахъщэ тынхэр кIодыщтхэу мыщ къикIырэп. НахьыпэкIэ ар къызщафакIощтыгъэ уахътэм ыуж мэфипшI нахьыбэ тырамыгъашIэу банкым екIуалIэхэмэ, Iэрылъхьэу къаратыжьыщт. А уахътэм емыкIо­лIагъэми, картэр зигъэпсыкIэ е нэмыкIэу ахъщэ тыныр къызэрэIэкIэхьащт шIыкIэр зызэблихъукIэ, къыфатIупщыгъэр ыгъотыжьыщт.

СчетыкIэу банкым къыщызэIуахыгъэр электроннэ шIыкIэм тетэу ПенсиехэмкIэ фондым IэкIэбгъэхьан плъэкIыщт, цIыфхэм Iоф адэзышIэрэ къулыкъум уекIуа­лIэми хъущт.

Шъугу къэтэгъэкIыжьы, илъэс заулэ хъугъэу картэу «Мир» зыфиIорэм къэралыгъор техьажьы. 2017-рэ илъэсым ибэдзэогъу мазэ и 1-м ыуж пенсиер зы­фагъэнэфагъэхэм зэкIэми банкым ар къаритыгъ. Адрэхэм нэмыкI картэу агъэфедэрэм ипIалъэ зикIыкIэ «Мир»-кIэ къафызэблахъу.

Зэблэпхъужьын плъэкIыщт

ЦIыфым IофшIэгъэ илъэсэу иIэр зы­щыгъэнэфэгъэ тхылъыр (трудовая книжка) электроннэ шIыкIэм тетэу гъэпсыгъэщтмэ, хьауми зытетым тетэу къэнэжьыщтмэ ежь къыхихын фит.

«Трудовой книжкэр» зыфэдэщтыр теубытагъэ хэлъэу къагъэнэфэнэу блэкIыгъэ илъэсым ыкIэм нэс зэкIэми къыхахын фаеу щытыгъ. Электроннэ шIыкIэм утехьажьыныр егъэзыгъэу щытэп, шъхьадж зэрэшIоигъу. ЦIыфым «итрудовой книжкэ» нахьыпэрэм тетэу къыгъэнэжьыгъэми, нэужым ар зэблихъужьын фит. Адыгеим щыпсэоу къэз­гъэнэжьыгъагъэхэм ащыщэу нэбгырэ 1038-р элект­роннэ шIыкIэм техьажьыгъ.

Лъэхъаным къызыдихьыгъэ шIыкIакIэм шIуагъэу хэлъхэм анахь шъхьаIэхэм ащыщ цIыфыр зыщыфаем ащ итхагъэм еплъын, хэукъоныгъэ горэ фэ­хъугъэмэ аригъэгъэтэрэзыжьын амал зэриIэр. Ащ нэмыкIэу электроннэу шIыгъэ «трудовой книжкэр» зыгъэфедэрэм пэIудзыгъэ шIыкIэм тетэу IофшIапIэм Iухьан ылъэкIыщт. Мыщ фэдэ тхылъым, адрэ тызэсагъэм фэдэу, цIыфыр IофшIапIэу зыIутыри, ащ зыщыIухьагъэри, иIэнатIи, иквалификации, къыIукIы­жьыгъэмэ, къызщыIукIыжьыгъэри, зэрэIутыгъэр зы­фэдизыри итхагъэх.

КъызэрэтIуагъэу, IофшIапIэм Iутэу «трудовой книжкэр» зыгъэпсыгъахэм ежь шIоигъо хъумэ, электроннэу ар ышIыжьынэу 2020-рэ илъэсым ищылэ мазэ и 1-м къыщыублагъэу амал иIэ хъугъэ. 2021-м IофшIапIэм апэрэу Iухьэхэрэм IофшIэгъэ илъэсэу яIэр зыщыгъэнэфэгъэщт тхылъыр электроннэ шIыкIэу афагъэ­псыщт, джы непэ зытетым фэдэ афашIыжьыщтэп.

Нахьыпэрэ шIыкIэм зэрэтетэу тхылъыр къэзгъэ­нэжьыгъэхэм зэблахъужьынэу агу къихьэмэ, Iоф­шIэпIэ чIыпIэр къязытыгъэм лъэIу тхылъкIэ зыфагъэзэн фае. Электроннэ шIыкIэм цIыфыр зытехьажьыкIэ, «книжкэу» нахьыпэкIэ иIагъэм зыпари датхэжьыщтэп, ежь къыратыжьыщт. Ау ар ыгъэкIоды хъущтэп, сыда пIомэ, илъэс IофшIагъэу иIэр зыфэдизыр, 2020-рэ илъэсым нэс IофшIапIэу зыIутыгъэхэр, уахътэу ахэм зэраIутыгъэр, нэмыкIхэр дэтхагъэх. Электроннэ шIыкIэм тетэу гъэпсыгъэм 2020-рэ илъэсыр къызихьагъэм къыщыублагъ щагъэнафэрэр.

IофшIэгъэ илъэсхэр зыфэдизхэр, нэмыкIэу ащ епхыгъэу цIыфым ищыкIагъэр ПенсиехэмкIэ фондым иинтернет нэкIубгъо щыгъэпсыгъэ «унэе кабинетым» е къэралыгъо фэIо-фашIэхэм япортал щызэригъэшIэнхэ ылъэкIыщт. «Трудовой книжкэр» тхьапэм тетымэ, IофшIапIэр къезытыгъэм екIолIэн фае, ПенсиехэмкIэ фондым е МФЦ-м зафигъазэми хъущт.

Адыгеим щыпсэоу нэбгырэ 31733-мэ зыфаер къыхахыгъах. Ахэм ащыщэу электроннэ шIыкIэм техьагъэр нэбгырэ 10846-р ары.

Ахъщэ тыныр зэрэбгъэпсыщтыр

Нэжъ-Iужъхэм, цIыфхэу IэпыIэгъу зищыкIэгъэ зэпытхэм е зыныбжь илъэс 80-м шIокIыгъэхэм алъыплъэхэрэм компенсацие къафэкIонэу агъэпсын алъэкIыщт.

Ахъщэ тыныр сомэ 1200-рэ мэхъу. Пенсионерым пенсиеу къыратырэм игъусэу ари къыфэкIощт, цIыфэу къылъыплъэрэм ежь ритыжьыщт.

Мы компенсациер зэкIэми атефэрэп. Ар къызэратыхэрэр Iоф ашIэн алъэкIынэу, ау IофшIапIэ Iумытхэу ыкIи ащ пае пособие къызфэмыкIохэрэр ары. Ау ар нэжъ-Iужъым иIахьылын е дэпсэун ищыкIагъэп.

Нэжъ-Iужъым, цIыфэу IэпыIэгъу зищыкIэгъэ зэпытым е зыныбжь илъэс 80-м шIокIыгъэм лъыплъэрэм ПенсиехэмкIэ фондым ичIыпIэ органэу зыпэблагъэм тхылъхэр зыщыритыгъэ мазэм къыкIэлъыкIорэм къыщыублагъэу ахъщэ тыныр къыфэкIощт. А уахътэу зыщылъыплъэрэр иIофшIэгъу илъэсхэм ахэхьэ ыкIи пенсионнэ коэффициентхэр зэIокIэх.

Мары тхылъэу ищыкIагъэхэр:

— зылъыплъэщтхэми лъыплъэщтыми ялъэIу тхылъхэр;

— нэбгыритIуми япаспортхэр;

— яIофшIэгъэ илъэсхэр зыщыгъэнэфагъэхэ тхылъхэр.

Зылъыплъэщтыр нэжъ-Iужъмэ:

— ащ ипсауныгъэ изытет, ренэу зыгорэ лъыплъэн зэрищыкIагъэр зыщыгъэнэфэгъэ тхылъэу IэзэпIэ учреждением къытыгъэр.

КIэлэцIыкIум лъыплъэнхэ фаеу щытмэ:

— ным, тым е ыпIунэу зыштагъэм, зыныбжь имы­къугъэхэм алъыплъэрэ органхэм фитыныгъэ ­къызэратырэр къэзыушыхьатырэ тхылъыр;

— кIэлэцIыкIур зычIэс еджапIэм къытыгъэр.

ЛъэIу тхылъыр зэрэптхыщтыр УФ-м ПенсиехэмкIэ ифонд иинтернет нэкIубгъоу pfrf.ru зыфиIорэм ибгъо­тэщт. Мары зэкIэлъыкIуакIэу узэрихьащтыр: «Главная — Жизненные ситуации — Социальные выплаты — Как оформить компенсацию / ежемесячную выплату по уходу за нетрудоспособным гражданином».

Джащ фэдэу «Унэе кабинетыр» бгъэфедэзэ электроннэ шIыкIэм тетэуи лъэIу тхылъыр птын плъэ­кIыщт. Ащ пае къэралыгъо фэIо-фашIэхэм япортал зыщябгъэтхын ыкIи къэушыхьатыгъэу «учетнэ запись» уиIэн фае. Ар фондым къыщябгъэушыхьатын плъэкIыщт, МФЦ-м е почтэм иотделение уякIуалIэми хъущт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.