Зэпахырэ узхэм зыщяIэзэхэрэ Адыгэ республикэ клиническэ сымэджэщыр игъорыгъозэ гъэлъэшыгъэ шIыкIэм тетэу Iоф ышIэным техьажьы. Коронавирусыр къызэузыхэрэм япчъагъэ республикэм зыкъызэрэщиIэты хъугъэм ар епхыгъ. Ащ дакIоу, зидунай зыхъожьхэрэм япчъагъи къыщыкIэрэп. ыпшъэкIэ зыцIэ къетIогъэ сымэджэщым иврач шъхьаIэу Лъэустэнджэл Розэ Iофым изытет къедгъэIотагъ.

— Тисымэджэщ госпиталь IофшIакIэм техьагъ, — еIо врач шъхьаIэм. — Чэщ-зымафэм нэбгырэ 20-м къыщымыкIэу сы­маджэхэр къащэх. Ахэм япсауныгъэ изытет зэфэшъхьаф: хьылъэ дэдэхэу реанимацием илъхэри, нахь къызэмыхьы­лъэкIхэу, ау сымэджэщым чIэлъынхэ фаеу щытхэри ахэтых.

ТигущыIэгъу къызэрэхигъэщы­гъэмкIэ, вирусым изэмылIэужыгъуагъэ къызэрэхахъорэм къы­хэкIэу цIыфхэр хьылъэу мэсымаджэх ыкIи ядунай ахъожьы. ТапэкIэ ныбжьыкIэхэм къямы­хьылъэкIэу унэм исхэу загъэ­хъужьыщтыгъэмэ, джы ар зэхъо­кIыгъ. Анахь ныбжьыкIэу сымэ­джэщым чIэлъым илъэс 25-рэ ыныбжь. ГушIуагъо кIэлэцIыкIуи, Iэтахъуи зэрахэмытыр. Ау на­хьыбэу ковидыр къызэутэ­кIы­хэрэр зыныбжь илъэс 60-м шIокIыгъэхэр арых. Процент екIолIакIэмкIэ къызыплъытэкIэ, а ныбжьыр нахь къыхэщы.

Лъэустэнджэл Розэ зэрэхигъэунэфыкIыгъэмкIэ, сымэджэщым зыщяIазэхэрэм индийскэ штаммыр къахагъэщыгъэп. Ау узым нэшэнакIэхэр иIэхэ хъугъэ: техьагъур, чый-Iушъхьэ истыкIыныр, пэпс къичъыныр къы­хэхьагъэх.

COVID-19-р зэрэщынагъом пстэуми щыгъуазэ тыхъугъ. Анахь шъхьаIэр ар игъом къы­хэбгъэщыныр ыкIи уеIэзэныр ары. Унэм исхэу зэIэзэжьынхэр мытэрэзэу елъытэ врач шъхьаIэм. Сыда пIомэ уз мэхъаджэм лъыпцIэныр къыхэкIы, ар илъэс 60-м къехъугъэ­хэмкIэ щынагъоу щыт. Нахь пасэу врачым зыфагъазэмэ, щынагъоу псауныгъэмкIэ къэуцурэр щыгъэзыягъэ хъущт.

Коронавирусым зызэриу­шъомбгъурэм къыхэкIыкIэ сани­тарнэ шапхъэхэу къагъэнэфагъэхэр дгъэцэкIэнхэ фае: нэ­гу­ихъор тIулъыныр, тазыфагу илъ зэпэчыжьагъэр метрэ 1,5-м къыщымыкIэныр, тIэхэр бэрэ ттхьакIынхэр. Пстэуми анахь хэкIыпIэ шъхьаI вакцинациер.

— Сыд фэдэ зэпахырэ узи иIэзэгъур вакцинациер ары, — къеIуатэ Лъэустэнджэл Розэ. — Коронавирусым тыщызыу­хъумэн амал закъоу джыдэдэм щыIэр ащ пэуцужьырэ прививкэр зыхядгъэлъхьаныр ары. ЖъоныгъуакIэм къыщегъэжьагъэу джы къызнэсыгъэм прививкэр зыхэлъ нэбгырэ 11 сы­мэджэщым къычIэфагъ. Ахэм къямыхьылъэкIэу коронавирусыр апэкIэкIыгъ. Уз гъэтIылъыгъэхэр зэряIэм къыхэкIэу сымэ­джэщым щяIэзэнхэ фаеу хъугъэ.

ХэзгъэунэфыкIымэ сшIоигъу, ежь тигущыIэгъу антителахэр зэриIэхэм емылъытыгъэу, вакцинэр зыхаригъэлъхьагъ. Апэрэ Iахьыр ары ыкIугъэр, ипсауныгъэкIэ къехьылъэкIыгъэп, чIыпIэу прививкэр зыхалъхьагъэр тIэкIу узыгъэ ныIэп.

Iэшъынэ Сусан.