Урысые Федерацием и Президентэу Владимир Путиныр «Урысые Феде­рацием икъэралыгъо наградэхэр афэ­гъэшъошэгъэнхэм ехьылIагъ» зыфи­Iорэ Указым джырэблагъэ кIэтхэ­жьыгъ.

Тын лъапIэхэр зыфа­гъэ­шъошагъэхэм ащыщ Адыгеим и ЛIышъхьэу КъумпIыл Мурат. Адыгэ Республикэм исоциальнэ-экономикэ хэхъоныгъэ иIахьышхо зэрэхишIыхьагъэм пае республикэм и ЛIышъхьэ Щытхъум иорден къыфагъэшъошагъ.

«Мы къэралыгъо тын лъапIэр тиреспубликэ щы­псэурэ пстэуми ягъэхъагъэ къыкIэкIуагъ. Ти Роди­нэ цIыкIу имызакъоу, зэрэ Урысыеу нахь хэхъоныгъэ ин ашIыным, нахь зэтегъэ­псыхьагъэ хъунхэм апае гуетыныгъэ фыриIэу, ыгу етыгъэу зипшъэрылъ зыгъэцэкIэрэ пстэуми ар зэдырягъэхъагъэу щыт. Сэ ренэу къэсэIо, джыри зэ къыкIэсIотыкIыжьыщт: хэгъэгум и Президент къыгъэуцурэ пшъэрылъхэр тызэгъусэхэмэ ары ныIэп дгъэцэкIэнхэ зытлъэкIыщтыр, къалэ, псэупIэ, уна­гъо пэпчъ щыIэкIэ-псэу­кIэ дэгъу щыряIэнымкIэ амалхэр къэдгъотынхэ зытлъэкIыщтыр», — ащ фэгъэхьыгъэу къыIуагъ Адыгеим и ЛIышъхьэу КъумпIыл Мурат.

Республикэм и ЛIы­шъхьэ къызэрэхигъэщы­гъэмкIэ, къэралыгъо программэхэм, лъэпкъ проектхэм, дунэе программэхэу республикэм ихэхъоныгъэ епхыгъэхэм атегъэ­псыхьагъэу тиIофшIэн илъэ­ныкъо пстэухэмкIи Iофыгъохэр зэшIотхынхэу непэкIэ амал щыI. Урысыем и Президент, хэ­гъэ­гум и Правительствэ, Урысые Федерацием и Федеральнэ ЗэIукIэ яIэпыIэгъу хэлъэу зэхъокIыныгъэшIухэр тфэхъух.

Мыщ дэжьым къэIогъэн фае: экономикэм илъэныкъо зэфэшъхьафхэм ты­на­Iэ зэратедгъэтырэм Iоф­шIэпIэ чIыпIакIэхэр щыIэнхэмкIэ, бюджетым иха­хъохэр нахьыбэ хъунхэмкIэ, джырэкIэ кIуачIэ зиIэ социальнэ программэхэр икъоу гъэцэкIэгъэн­хэмкIэ ишIогъэшхо къэ­кIощт.

АР-м и ЛIышъхьэ ипресс-къулыкъу