Адыгэ Республикэм и Президентэу щытыгъэ Шъэумэн Хьазрэт республикэм икъэшъокIо ансамблитIумэ яюби­лейхэм яхъулIэу шIухьафтынхэр афишIыгъэх.

КIэлэцIыкIу ансамблэу «Мыекъуапэ инэфылъэхэр» илъэс 30 зэрэхъугъэр джырэблагъэ игъэкIотыгъэу хигъэунэфыкIыгъ. Дунэе фестиваль-зэнэкъокъоу «Адыгеим ижъогъожъыехэм» шIухьафтын шъхьаIэу Гран-прир къыщыдихыгъ.

— Юбилеим ехъулIэу сомэ миллиони 2 Шъэумэн Хьазрэт ансамблэм къызэ­рэри­тыгъэм фэшI лъэшэу тыфэраз. Къэ­шъуа­кIохэм ахъщэр афэдгощыгъ, — къы­ти­Iуагъ «Мыекъуапэ инэфылъэ­хэм» яхудо­жественнэ пащэу, Урысыем культурэмкIэ изаслуженнэ IофышIэу, Адыгеим ина­роднэ артистэу, КъБР-м изаслуженнэ артистэу Нэныжъ Айдэмыр.

— Адыгэ Республикэм и Къэралыгъо академическэ къэшъокIо ансамблэу «Налмэсыр» зызэхащагъэр мэкъуогъум и 18-м илъэс 85-рэ хъугъэ, — къеIуатэ ан­самблэм ихудожественнэ пащэу, Урысыем, Абхъазым, Пшызэ язаслуженнэ артистэу, Адыгеим инароднэ артистэу Хъоджэе Аслъан. — ТимэфэкI фэгъэхьыгъэу Шъэумэн Хьазрэт сомэ мил­лиони 5 «Налмэсым» къызэрэритыгъэм фэшI «тхьауегъэпсэу» гъэзетымкIи етIожьы тшIоигъу. Ахъщэр ансамблэм иIофышIэ 75-мэ зэфэдизэу атедгощагъ.

«Мыекъуапэ инэфылъэхэм» яюбилей ехъулIэу концерти 2 Мыекъуапэ къыщитыгъ.

Республикэм культурэмкIэ и Министерствэ художественнэ пащэу Нэныжъ Айдэмыр, «Мыекъуапэ инэфылъэхэм» афэгушIуагъ.

Адыгэ Республикэм и ЛIышъхьэу КъумпIыл Мурат «Мыекъуапэ инэфы­лъэхэм» афэгушIуагъ. Адыгэ культурэм хэхъоныгъэ ышIыным, лъэпкъ къашъохэр агу рихьэу кIэлэцIыкIухэр гъэсэ­гъэнхэм ансамблэр зэрэпылъым мэхьэнэ ин иIэу ЛIышъхьэм къыIуагъ.

Адыгэ гъэзетыр къафыретхыкIы

Шъэумэн Хьазрэт илъэс къэс «Адыгэ макъэр» почтэкIэ къафэкIонэу ипчъагъэкIэ 500 хъоу республикэм щыпсэу­хэрэм къафыретхыкIы.

Шъэумэн Хьазрэт зыфыкIэтхагъэхэм ацIэкIэ «Адыгэ макъэм» иIофышIэхэм «тхьауегъэпсэу» гъэзетымкIэ раIожьы ашIоигъу.

Опсэу, Хьазрэт! О уишIушIагъэ цIыфхэм агъэлъапIэ. Тхьэм бэгъашIэ уешI.

ЕмтIылъ Нурбый.