Ахъщэ тынхэр

УФ-м и Президентэу Владимир Путиным имыгъэрэ Джэ­псалъэ зигугъу къыщишIыгъэгъэ ахъщэ тынхэм афэгъэхьыгъэ хэбзэгъэуцугъэм мазэу къи­хьагъэм и 1-м къыщыублагъэу кIуачIэ иIэ хъугъэ.

Ащ тетэу сабый къыфэхъунэу ежэрэ бзылъфыгъэу щыIэныгъэм чIыпIэ къин ригъэуцуагъэм мазэ къэс ахъщэ тын къыфэкIонэу ыгъэпсын ылъэкIынэу хъугъэ. Джащ фэдэу изакъоу сабыир зыпIурэ нэу е тэу чIыпIэ къин итхэм хэушъхьафыкIыгъэу джы IэпыIэгъу къаратыщт. Сабыим ыныбжь илъэс 17 мэхъуфэкIэ мазэ къэс ахъщэ къафэкIонэу ахэми агъэпсын амал яIэ хъугъэ.

Хэгъэгум фэшъыпкъэнхэу

Къэралыгъо ыкIи муниципальнэ пащэхэм, къэралыгъо ыкIи чIыпIэ зыгъэIорышIэжьыпIэ органхэм яIофышIэхэм, УIэшыгъэ КIуачIэхэм, Росгвардием, ФСБ-м, IэкIыб разведкэмкIэ къулыкъум, дзэ прокуратурэм ыкIи следствиехэмкIэ дзэ комитетым, хэгъэгу кIоц IофхэмкIэ органхэм, мэшIогъэкIосэ къулыкъум, бзэджэшIагъэ зезыхьа­гъэхэм пшъэдэкIыжь ягъэхьы­гъэнымкIэ системэм ахэтхэм, лIыкIохэм (посолхэм) ыкIи пол­номочнэ лIыкIохэм, Гупчэ бан­кым, ЛъытэкIо палатэм япащэ­хэм, ахэм ягуадзэхэм, аудитор­хэм, шъолъыр пащэхэм, депутатхэм IэкIыб къэрал гражданствэ щагъэпсынэу е ащ зыщыфаехэм ихьанхэу, щыпсэунхэу фитыныгъэ къязытырэ тхылъыр ашIынэу 2021-рэ илъэсым ибэ­дзэогъу мазэ къыщегъэжьагъэу фитыныгъэ яIэжьэп.

ФэгъэкIотэнхэр

ЦIыфым фэгъэкIотэнэу къытефэхэрэр къэралыгъо фэIо-фашIэхэм япортал имызакъоу, телефон зыкIымкIи джы зэри­гъэшIэнхэ ылъэкIыщт. Ащ фэгъэ­хьыгъэ законым бэдзэогъум и 1-м къыщыублагъэу кIуачIэ иIэ хъугъэ.

Ипотекэр

ФэгъэкIотэнхэр къыздэлъы­тэгъэ ипотекэр проценти 6,5-рэ тегъэхъуагъэу ары нахьыпэкIэ къызэратыщтыгъэр. Бэдзэогъум и 1-м къыщегъэжьагъэу ар проценти 7 хъугъэ, анахьыбэу къа­тыщтыр сомэ миллиони 3 мэхъу.

Джащ фэдэу «унэгъо ипоте­кэкIэ» заджэхэрэми шапхъэу къыдэлъытагъэхэм зэхъокIыныгъэхэр афэхъугъэх. НахьыпэкIэ унагъоу сабыитIу е нахьыбэ зиIэхэр ары ныIэп проценти 6 зытегъэхъогъэ чIыфэм хафэ­щтыгъэхэр. Джы зы кIэлэцIыкIу зэрыс унагъохэми, ар 2018-рэ илъэсыр къызихьагъэм ыуж къэ­хъугъэмэ, мы ипотекэр анэсы.

Уасэхэм къахэхъощт

Хабзэ зэрэхъугъэу, бэдзэ­огъум и 1-м къыщыублагъэу псэупIэ-коммунальнэ фэIо-фа­шIэхэм ауасэ къыхэхъуагъ. Къэ­ралыгъор зэрэщытэу пштэмэ, гурытымкIэ лъытагъэу, проценти 4-кIэ нахьыбэ хъугъэ.

Къэбар дэгъур джы псэу­пIэ-коммунальнэ фэIо-фашIэхэм апае субсидие къыфэкIонэу зыгъэпсымэ зышIоигъохэм ащ ыпкIэ зэратыгъэ квитанциехэмрэ чIыфэ зэратемылъыр къэ­зыу­шыхьатырэ тхылъхэмрэ атын­хэ зэримыщыкIэгъэжьыр ары.

«Мир-р» агъэпсын фае

Пенсие е нэмыкI ахъщэ тын къызыфакIоу ар банкым къыз­IэкIигъахьэхэрэр бэдзэогъу ма­зэм и 1-м къыщыублагъэу картэу «Мир» зыфиIорэм те­хьа­жьынхэ фае. Сыда пIомэ, а зы картэр ары ахъщэхэр джы къы­зэрагъэхьащтхэр, нэмыкI мы лъэныкъомкIэ агъэфедэнхэ алъэкIыжьыщтэп.

IофшIэпIэ чIыпIэ имыIэу къы­зэрэнагъэм пае пособие къызэ­ратыхэрэми, сабый ежэу, иза­къоу кIэлэцIыкIур зыпIоу Iэпы­Iэгъу джы зыфагъэнэфагъэхэми мы картэр ары ахэр къызэра­фэкIощтхэр. Къыхэгъэщыгъэн фаер пенсиехэм афэдэу пособиехэр почтэмкIэ къызэрамытыщтхэр ары. Арышъ, «Мир-р» зимыIэхэр ащ игъэпсын охътэ благъэм ыуж ихьанхэ фае.

Мы картэм ылъэныкъокIэ щы­Iэныгъэм джыри зы зэхъокIыныгъэ къыхэхьагъ. Бэдзэогъу мазэу къихьагъэм къыщыублагъэу щапIэу сомэ миллион 20-м, нахьыпэкIэ ар сомэ миллион 40-гъ, нахь мымакIэу къызIэ­кIа­хьэхэрэм щэфакIоу картэу «Мир-мкIэ» товарым ыпкIэ къэзытымэ зышIоигъохэм ащ фэдэ амал аратынэу пшъэрылъ афашIыгъ.

Мыхэм ыкIи нэмыкI хэбзэ­гъэуцугъэхэм, шапхъэхэм мы мазэу къихьагъэм кIуачIэ яIэ мэхъу.

Хэутыным фэзыгъэхьазырыгъэр

ХЪУТ Нэфсэт.