БлэкIыгъэ бэрэскэшхом Шэуджэн районым гурыт еджа­пIэр мыгъэ дэгъу дэдэу къэзыухыгъэхэр щагъэшIуагъэх.

Муниципальнэ образованием ипсэупIэу Зарям щыкIогъэ мэфэкI Iофтхьабзэм хэлэжьагъэх АР-м и Къэралыгъо Совет — Ха­сэм и Тхьаматэу Владимир Нарожнэмрэ гъэсэ­ны­гъэмкIэ, наукэмкIэ, ныб­жьыкIэхэм яIофхэмкIэ, псауныгъэм икъэухъумэн­кIэ ыкIи спортымкIэ икомитет ипащэу Шэуджэн Темботрэ.

АР-м и ЛIышъхьэ, Парламентым идепутатхэм ацIэкIэ, ежь ышъхьэкIэ шIуфэс къарихыгъ Владимир Нарожнэм. ЕджапIэр дэгъу дэдэу къэзыухыгъэ ныбжьыкIэхэм ар къа­фэгушIуагъ, кIэлэегъаджэ­хэмрэ ны-тыхэмрэ зафигъазэзэ, сабыйхэм кIуа­чIэу, IофшIагъэу, шIэны­гъэу ахалъхьагъэм пае ирэзэныгъэ къыриIотыкIыгъ.

Гъэсэныгъэм исистемэ лъэхъаным диштэу гъэ­кIэ­жьыгъэным къэралыгъо ыкIи республикэ пащэхэм сыдигъокIи анаIэ зэрэ­тетыр ащ къыхигъэщыгъ. Зэпахырэ узэу дунаир зэ­лъызыкIугъэм ыпкъ къи­кIыкIэ илъэсыкIэ еджэгъоу кIуагъэр къызэрыкIоу зэрэщымытыгъэм къыкIигъэтхъызэ, кIэлэегъаджэхэм япшъэрылъхэр ифэшъуа­шэм тетэу зэрагъэцэкIа­гъэхэм пае хэушъхьафыкIыгъэу «тхьашъуегъэпсэу» къариIуагъ.

Нэужым еджапIэхэм япа­щэхэу, якIэлэегъаджэ­хэу АР-м и Парламент ирэ­зэныгъэ тхылъхэр зыфагъэшъошагъэхэм аритыжьыгъэх. Ащ фэдэу къыхагъэщыгъэхэм ащыщых къуаджэу Мамхыгъэ игурыт еджапIэ ипащэу Мэрэтыкъо Зарэ, Крас­нобашненскэ гурыт еджапIэм ипащэу Александр Кондратьевыр, урысыбзэм­рэ литературэмрэкIэ кIэлэегъаджэу Ацумыжъ Ларисэ, хьисапымрэ физи­кэмрэкIэ езыгъаджэхэрэ Марина Деревянкэр, тарихъымкIэ кIэлэегъаджэу Бгъошэ Ритэ, нэмыкIхэр.

Мы Iофтхьабзэм хэлэ­жьагъэх ыкIи еджапIэр дэ­гъоу къэзыухыгъэу агъэ­шIорэ ныбжьыкIэхэм, кIэлэегъаджэхэм, ны-тыхэм къафэгушIуагъэх АР-м гъэ­сэныгъэмрэ шIэныгъэм­рэкIэ иминистрэу КIэрэщэ Анзаур, псауныгъэр къэухъумэгъэнымкIэ ми­нистрэу Мэрэтыкъо Рус­тем, мэкъу-мэщымкIэ министрэм игуадзэу Сергей Шопиныр, Шэуджэн район администрацием ипащэу Аулъэ Рэщыдэ.

КIэрэщэ Анзаур псалъэу къышIыгъэм ыуж еджапIэр къэзыухыгъэхэм медальхэр аритыжьыгъэх. Шэуджэн районым иеджапIэхэр мыгъэ къэзыухыгъэ нэбгырэ 52-м щыщэу 15-мэ медаль къахьыгъ.

Ахэм янэ-ятэхэри район администрацием ирэзэныгъэ тхылъхэмкIэ къыхагъэщыгъэх. Ахэр Аулъэ Рэщыдэ аритыжьыгъэх.

ХЪУТ Нэфсэт.