Къэралыгъо Думэм ыкIи Адыгеим Къэралыгъо Совет – Хасэм идепутатхэм  якъыхэхын фэгъэхьыгъэ  хэдзынхэр мэфищэ, Iоныгъом и 17-м къыщегъэжьагъэу и 19-м нэс зэхащэщт. Роспотребнадзорым къыгъэуцугъэ шапхъэхэм ауж ар агъэнэфагъ.

БлэкIыгъэ илъэсхэм  хэдзынхэр зы мафэкIэ зэхащэщтыгъэх. Ау 2020-рэ илъэсым бэдзэогъум и 31-м мыщ епхыгъэ хэбзэгъэуцугъэм зэхъокIыныгъэх фашIыгъэх. УФ-м и Конституцие зэхъокIыныгъэхэр фэшIынхэм фэгъэхьыгъэ хэдзынхэр  мэфищэ зэхащэгъагъ.

- Пандемием ыпкъ къикIыкIэ хэдзынхэр мэфищэ кIонхэр нахь тэрэз.  Санитарнэ - эпидемиологическэ шапхъэхэр зехьэгъэнымкIэ, цIыфхэм  япсауныгъэ къэухъумэгъэнымкIэ, чэзыум хэмытынхэмкIэ мэфищ хэдзыныр нахь гупсэф, - еIо Урысыем юристхэм я Ассоциацие и Адыгэ шъолъыр отделение, Адыгеим и Общественнэ палатэ, «Независимый общественный мониторинг» зыфиIорэм и Ассоциацие ахэтэу Щыкъ Рэситэ.

Хэдзынхэм мэкъэтынымк1э шIыкIитIу агъэфедэщт, участкэм къекIуалIэхэрэм ыкIи унэм макъэ щызытыхэрэм апае шъхьафыщт. Ащ нэмыкIэу хэдзынхэр зыщыкIощт чIыпIэ зыдэмыт ыкIи транспортнэ  сообществэ зэмыпхыгъэхэм Iоныгъом и 17-м ыкIи и 18-м  хэдзынхэмкIэ шIыкIэ тедзэ яIэщт.