Законихъухьэхэм я Советэу АР-м и Парламент щызэ­ха­щагъэм тыгъуасэ я V-рэ зэхэсыгъо иIагъ.

Iофтхьабзэм хэлэжьа­гъэх АР-м и ЛIышъхьэу КъумпIыл Мурат, УФ-м Фе­дерациехэмкIэ и Совет исенаторэу Олег Селез­не­выр, УФ-м и Къэралыгъо Думэ идепутатхэу Влади­слав Резник, Хьасанэкъо Мурат, федеральнэ инспектор шъхьаIэу Сергей Дрокиныр, АР-м и Апшъэрэ Хьыкум и Тхьаматэу Шу­мэн Байзэт, АР-м ипро­курор ШъхьаIэ игуадзэу КIыкI Исмахьил, АР-м иминистрэхэм я Кабинет хэтхэр, Парламентым идепутатхэр, нэмыкIхэр. Зэ­хэсыгъор зэрищагъ АР-м и Парламент ыкIи закон­ихъухьэхэм я Совет я Тхьа­матэу Владимир Нарожнэм.

Повесткэм щагъэнэфагъэхэм атегущыIэнхэу ра­мыгъажьэзэ УФ-м и Президент иунашъокIэ АР-м и ЛIышъхьэу КъумпIыл Мурат Щытхъум иорден къызэрэфагъэшъошагъэм пае Парламентым идепутатхэм ыкIи Советым хэтхэм ацIэкIэ ар фэгушIуагъ.

УФ-м и Къэралыгъо Думэ Адыгеим ыцIэкIэ щыIэ Владислав Резникрэ Хьасанэкъо Муратрэ илъэситфым Iофэу ашIа­гъэр мы зэхэсыгъом къыщызэфахьысыжьыгъ. Владислав Резник идоклад а илъэсхэм федеральнэ IэпыIэгъоу республикэм къыфэкIуагъэр, лъэныкъо пэпчъ къыхэлъхьагъэ хъу­гъэр пчъагъэхэмкIэ къыщигъэлъэгъуагъ. Федеральнэ бюджетым къы­хэхыгъэу зы илъэсым рес­публикэм къыфакIорэр фэди 2,5-кIэ нахьыбэ хъугъэ. 2016-м ар сомэ миллиарди 6,5-рэ хъущтыгъэмэ, 2021-рэ илъэсым сомэ миллиард 16,4-м нэсыгъ. ПстэумкIи сомэ миллиард 68-рэ ­федеральнэ Гупчэм къы­тIупщыгъэу мэхъу. Ащ щыщэу сомэ миллиарди 6,7-р блэкIыгъэ 2020-рэ илъэсыр ары къызыкIуагъэр. Ар медицинэм иIофышIэу коронавирусыкIэр къызэолIагъэхэм афэ­гъэзагъэхэм ялэжьапкIэ, ащ пэшIуекIогъэнымкIэ ищыкIагъэ оборудованиехэм якъэщэфын пэIухьагъ. Нэ­мыкI лъэныкъохэм апае ахъщэу къатIупщыгъэр зы­фэдизыми, ащкIэ псэо­лъа­кIэу ашIыгъэхэми, агъэ­цэ­кIэжьыгъэхэми игъэкIо­тыгъэу депутатыр къатегущыIагъ.

Хьасанэкъо Мурат къы­зэриIуагъэмкIэ, илъэситфым къыкIоцI законопроект 14-мэ кIэщакIо афэ­хъугъэхэу УФ-м и Къэ­ралыгъо Думэ халъхьагъ. Ахэм ащыщэу 9-мэ къадырагъэштагъ. Гъогогъу 58-рэ депутатым респуб­ликэм щыпсэухэрэр ри­гъэблэгъагъэх, IофшIэкIо коллективхэм гъогогъу 24-рэ аIукIагъ. ГумэкIыгъо зэфэшъхьафэу къырахьы­лIагъэхэм янахьыбэр дэгъэзыжьыгъэ хъугъэ.

Докладхэм ауж АР-м и ЛIышъхьэ гущыIэр ыштагъ. Депутатхэми сенаторитIуми яIофшIагъэ ащ осэ ин къыфишIыгъ.

— Хэбзэихъухьан Iофэу агъэцакIэрэм имыза­къоу, республикэм ищы­Iэныгъэ лъэшэу яIахьышхо хашIыхьагъ, Iофыгъо зэфэшъхьафыбэм язэшIохын къыхэлэжьагъэх, IэпыIэгъу къытфэхъугъэх. ЦIыфхэу хэзыдзыгъэхэм сыдигъокIи зэпхыныгъэ зэрадыряIагъэми мэхьанэшхо иI. УФ-м и Президент пшъэ­рылъ шъхьаIэу къытфи­шIыхэрэм ар ащыщ, — къыIуагъ КъумпIыл Мурат.

Депутатхэмрэ сенатор­хэмрэ яшIушIэкIэ респуб­ликэм иIофыгъо зэфэ­шъхьафыбэ федеральнэ Гупчэм лъыгъэIэсыгъэ ыкIи дэгъэзыжьыгъэ зэ­рэхъугъэри ЛIышъхьэм къыхигъэщыгъ, Iофэу ашIагъэм пае лъэшэу зэра­фэразэр кIигъэтхъыгъ.

Депутатхэм ыкIи се­наторхэм афэгъэзагъэу ярэзэныгъэ къыраIоты­кIыгъ АР-м и Парламент ипащэхэу Владимир Нарожнэмрэ Шъэо Аскэррэ. Лъэныкъо пстэумкIи зэпэблагъэхэу Iоф зэрэзэдашIагъэр, ахэм яшIу­шIэкIэ шъолъыр депутатхэр кIэщакIо зыфэхъу­гъабэ пхырыщыгъэ зэрэ­хъугъэр ахэми къыха­гъэщыгъ.

Нэужым зэхэсыгъом иповесткэ щыгъэнэфагъэу лъэпкъ проектэу «Демографием» къыдыхэлъы­тагъэу сабый зэрыс унагъохэм, сэкъатныгъэ зи­Iэхэм IэпыIэгъоу аратырэм фэгъэхьыгъэ докладэу АР-м IофшIэнымкIэ ыкIи социальнэ хэхъо­ныгъэхэмкIэ иминистрэу Мыр­зэ Джанбэч къышIыгъэм едэIугъэх.

Джащ фэдэу АР-м и Къэралыгъо Совет — Ха­сэм идепутатэу Цэй Эдуард УФ-м оборонэмкIэ иминистрэу Сергей Шойгу фэгъэзэгъэ джэпсалъэу Парламентым идепутатхэм къагъэхьазырыгъэм нэIуасэ фишIыгъэх. Грузиемрэ Абхъаз Респуб­ликэмрэ азыфагу къитэ­джэгъэгъэ зэо-зэпэуцу­жьым хэлэжьагъэхэр ащ фэдэ заохэм яветеранхэм ахэлъытэгъэнхэм ар фэгъэхьыгъ.

Хьыкум приставхэм чIыфэ зытелъым ар къызыIахыжьыкIэ, цIыфыр зэ­рэпсэун ылъэкIыщт ахъ­щэ анахь макIэм къыщымыкIэу мазэм къыфагъэ­нэн фаеу къызщиIорэ зэ­хъокIыныгъэу УФ-м и Гражданскэ кодекс ыкIи «Исполнительнэ произ­водством фэгъэхьыгъ» зы­фиIорэ федеральнэ хэ­бзэгъэуцугъэм афашIы­гъэхэми зэхэсыгъом щатегущыIагъэх. Ахэм къащыдэлъытагъэхэм къатегущыIагъэх АР-м и Парламент идепутатэу Шэу­джэн Темботрэ хьыкум приставхэм я Федеральнэ къулыкъу и ГъэIоры­шIапIэу АР-м щыIэм ипащэу Александр Ихнорэ.

Законихъухьэхэм я Со­ветэу АР-м и Парламент щызэхащагъэм 2021-рэ илъэсымкIэ гухэлъэу иIэ­хэм яплани мы зэхэсы­гъом щаштагъ. ХЪУТ Нэфсэт.