Урысыем и Къэралыгъо Думэ идепутатхэу Владислав Резникрэ Хьа­санэкъо Муратрэ тыгъуасэ Кощхьэблэ ыкIи Шэуджэн районхэм ащы­Iагъэх. Илъэситфым Iофэу ашIагъэм изэфэхьысыжьхэр къашIы­гъэх, цIыфхэм шъхьэихыгъэ зэдэгущыIэгъу адыряIагъ, ахэм яупчIэхэм джэуап­хэр аратыжьыгъэх.

ИлъэситфыкIэ узэкIэIэбэжьмэ республикэм щыпсэухэрэм яшIуагъэкIэ депутатэу зэрэха­дзыгъагъэр, цIыфхэм, Адыгеим ипащэхэм цыхьэу къыфа­шIыгъэр къыгъэшъыпкъэжьыным, щыIэкIэ-псэукIэр нахьышIу шIыгъэным, инвестициехэм ыкIи федеральнэ гупчэм къи­кIырэ IэпыIэгъум ахэгъэхъогъэ­ным мы уахътэм анахьэу ынаIэ зэрэтыригъэтыгъэр Владислав Резник пэублэм къыщиIуагъ. Лъэпкъ проектхэм, къэралыгъо программэхэм амалэу къаты­хэрэр шъолъырым зэрифэшъуа­шэу къызфигъэфедагъэх, ари хэхъоныгъэм изы лъэныкъо шъхьаIэхэм ащыщ.

Псауныгъэр къэухъумэгъэным, гъэсэныгъэм, культурэм, физическэ культурэм ыкIи спор­тым, нэмыкI лъэныкъохэм хэ­хъоныгъэ ашIыным пэIухьэгъэ мылъкур фэдэ пчъагъэкIэ на­хьыбэ зэрэхъугъэр Хьасанэкъо Мурат къыIуагъ. Федеральнэ гупчэм къикIырэ IэпыIэгъуми хэпшIыкIэу хэхъуагъ ыкIи илъэситфым къыкIоцI ар сомэ миллиард 68-м нэсыгъ.

Федеральнэ гупчэмрэ рес­публикэмрэ зэгурыIоныгъэ азы­фагу илъэу Iоф зэрэзэдашIэрэм ишIуагъэкIэ шъолъырым ыпашъхьэ итхэ пшъэрылъхэр зэшIохыгъэхэ зэрэхъугъэхэр, шъолъырым социальнэ мэхьанэ зиIэ псэуалъэхэр зэрэщашIыгъэхэр, зэрэщагъэцэ­кIэ­жьыгъэхэр депутатхэм къыхагъэщыгъ.

Непэ дунаир зыгъэгумэкIырэ коронавирусым иIофыгъуи тегущыIагъэх. Владислав Резник къызэриIуагъэмкIэ, апэу вак­ци­нациер зыхалъхьагъэхэм ежь-ри, иунагъуи ащыщых. ЦIыфхэм япсауныгъэ, ящыIэныгъэ къаухъумэным фэшI прививкэ зы­рагъэшIын зэрэфаер хигъэунэфыкIыгъ.

ЗэIукIэгъу-зэдэгущыIэгъум икIэух общественностыр зы­гъэ­гумэкIырэ упчIэхэр депу­тат­хэм афагъэзагъэх, ахэм игъэ­кIоты­гъэ джэуапхэри къаратыжьыгъэх.

ТХЬАРКЪОХЪО Адам.