Бэдзэогъум и 3-м Урысые Федерацием и Къэралыгъо автоинспекцие ыныбжь илъэс 85-рэ зэрэхъугъэм фэгъэхьыгъэу мэфэкI Iоф­тхьабзэ ведомствэм щыкIуагъ.

Гъогу автоинспекторхэм афэгушIонхэу къекIолIагъэх АР-м хэгъэгу кIоцI IофхэмкIэ иминистрэу, полицием иполковникэу Иван Бахиловыр, Къэралыгъо Совет — Хасэм хэбзэгъэуцунымкIэ, чIыпIэ зыгъэIорышIэжьыным иIофыгъохэмкIэ и Комитет итхьаматэу Александр Лобода, Адыгеим и Къэралыгъо авто­инспекцие ипащэу Александр Курпас, мы къулыкъум иветеранхэу Александр Сидоровыр ыкIи Александр Киреевыр.

Министрэу Иван Бахиловым закъыфигъазэзэ, гъогурыкIоным хэлэжьэрэ пстэуми ящынэгъончъагъэ офицер пэпчъ аIэ зэкIэ­дзагъэу зэрэзэдэлажьэхэрэм зэ­релъытыгъэр хигъэунэфыкIыгъ.

— Общественнэ рэхьатны­гъэр къэухъумэгъэным илъэныкъохэм ащыщэу анахь къиным шъо Iоф щэшъошIэ. Шъолъырым игъогухэм къатехъухьэхэрэ авариехэр нахь макIэ хъунхэм мафэ къэс шъудэ­лажьэ. Чэщи мафи пшъэдэкIыжь гъэнэфагъэ зыхэлъ Iоф мыпсын­кIэр, щынагъор инспекторхэм агъэцакIэзэ, яIэпэIэсэныгъэ ыкIи ялIыхъужъныгъэ къагъэлъагъо, — къыIуагъ Иван Бахиловым.

Хэгъэгу кIоцI IофхэмкIэ министерствэм ипащэ хэушъхьа­фы­кIыгъэу къызтегущыIагъэхэм ащыщ зимэфэкI подразделениер техническэу зэрэзэтегъэпсыхьагъэр. Хэбзэукъоныгъэхэр дэгъэ­зыжьыгъэнхэмкIэ ыкIи гъогу щы­нэгъончъагъэр гъэпытэгъэнымкIэ полицейскэхэм апашъхьэ итхэ пшъэрылъхэр агъэцэкIэнхэм фэшI мы лъэхъаным диштэрэ амалыкIэхэр къызфагъэфедэх.

Адыгеим и Къэралыгъо Совет — Хасэм илIыкIоу Александр Лобо­да зэрэхигъэунэфыкIыгъэмкIэ, гъогурыкIоныр щы­нэгъончъэнымкIэ автоинспек­цием Iоф щызышIагъэхэм яIэпэIэсэныгъэ джы непэ хэтхэм зэрэхагъахъорэм мэхьанэ иI.

ГИБДД-м и ГъэIорышIапIэ ипа­щэу Александр Курпас мэфэкIымкIэ къулыкъушIэхэм къа­фэгушIуагъ. Псауныгъэ пытэ, гу­псэфыныгъэ яIэхэу, гъэхъагъэ­хэр ашIынхэу ар къафэлъэIуагъ.

Джащ фэдэу рэзэныгъэ гущыIэхэр полицейскэхэм къафэзыIуагъэхэм ащыщых Къэралыгъо автоинспекцием иветеранхэм яорганизацие итхьаматэу Александр Сидоровыр ыкIи об­щественникэу Александр Киреевыр. Тигъогухэм щынэгъончъагъэр ащыгъэпытэгъэнымкIэ техническэ шIыкIакIэхэу къе­жьэхэрэр полицейскэхэм агъэфе­дэнхэм отставкэм щыIэхэ офи­церхэр къыфэджагъэх.

Нэужым тын лъапIэхэмкIэ зы­щафэгушIохэрэ Iофтхьабзэр рагъэжьагъ. Хабзэр ыкIи рэхьатныгъэр къэухъумэгъэнхэм алъэ­ныкъокIэ гъэхъэгъэшIу зышIы­гъэхэм Адыгэ Республикэм и ЛIышъхьэу КъумпIыл Мурат ирэ­зэныгъэ тхылъхэр аратыгъэх полицием иподполковникхэу ПIатIыкъо Ичрам ыкIи Александр Выходцевым, полицием икапитанэу Алексей Тернавщенкэм, старшэ лейтенантэу Байбекэ Ти­мур, лейтенантэу Василий Мироненкэм.

Къэралыгъо Совет — Хасэм ищытхъу тхылъхэр афагъэшъоша­гъэх Тазэ Сурэт, Роман Агарковым, Шэуджэн Аслъан, Григорий Рябушкиным, Тэмы­къое Къэплъан.

Хабзэ зэрэхъугъэу, мыфэдэ мафэм зичэзыу къэсыгъэхэм тэмэтелъхэр аратых. Владимир Александровымрэ Азэщыкъ Артуррэ старшэ лейтенант хъугъэх, Бгъанэ Хьазрэт ыкIи Хъуажъ Рустам — полицием илейтенант.

Ащ ыуж къэзэрэугъоигъэхэр зэхэтхэу зисэнэхьат пшъэрылъхэр зыгъэцакIэзэ фэхыгъэхэ къу­лыкъушIэхэм ямемориал къэ­гъагъэхэр кIэралъхьагъэх, такъикърэ афэшъыгъуагъэх.

Iэшъынэ Сусан.