ШъунаIэ тешъудзэгъэн фае, тигъэзетеджэ лъапIэхэр, непэ анахь тызыгъэгумэкIырэ Iо­фыгъом — коронавирусым пэуцужьырэ вакцинэр зыхягъэлъхьэгъэным — еплъыкIэу фы­ряIэр республикэм щызэлъашIэрэ цIыфхэм къызэрядгъаIорэм. А лъэIур тиIэу бэ­мышIэу зыфэдгъэзагъ адэбз узым зыщеIэзэхэрэ Адыгэ республикэ диспансерым иврач шъхьаIэу Бэрэтэрэ Сэфэр.

— Тидиспансер къин хэтыгъ пандемием илъэхъан, ар зэфэтшIыгъагъ, шапхъэхэр пхъашэу дгъэцэкIагъэх, сы­мэджэ хьылъэхэр арых чIэдгъэгъуалъхьэщтыгъэхэр, — еIо тигущыIэгъу. — ТиIофышIэхэм япроцент 70-м а узыр къяутэкIыгъ, зыхэр хьылъэ дэдэу ыгъэ­сымэджагъэх. ЧIэнэгъэшхуи тшIыгъэ, тиврачитIу — КIэсэбэжъ Аслъанрэ Аванян Альбертрэ — ящыIэныгъэ а узым зэпигъэугъ. Тиныбджэгъу шIагъуи чIэтынагъ — Боджэкъо Адами ащ къы­IэкIахын алъэкIыгъэп. СиунагъокIи ты­сымэджагъ, сэ хьылъэкIаеу, ащ фэдэ джыри зэ зэпысчынэу сыфаеп. Джы антителахэр сиIэхэу анализым къыгъэ­лъэгъуагъэу прививкэр сшIыгорэп, ма­зэкIэ джыри сыуплъэкIущт, ахэм къащыкIагъэ хъумэ, щэч хэлъэп вакцинэр зэрэзыхязгъэлъхьащтым. Сицыхьэ телъ тикъэралыгъо къыщашIыгъэ вакцинэм. Нэбгырэ пэпчъ пшъэдэкIыжь иIэу а Iофым къекIолIэн фае. Сэ непэ цIыфхэр згъэдэIонхэу арэп мырэущтэу къы­зыкIасIорэр, сиеплъыкI шъузыщызгъэгъуазэрэр. Сыд фэдэрэ Iофыгъуи цIыф­хэм дисциплинэ ахэлъэу къекIолIэнхэ фае. Тисымэджэщ чIэтхэм зэкIэми ан­тителахэр яIэ-ямыIэр тыуплъэкIугъ, ахэр зимыIэхэм е зимакIэхэм вакцинэр зыхарагъэлъхьагъ.

ЖакIэмыкъо Аминэт.