Хабзэ зэрэхъугъэу, ТIопсэ районым кIэлэцIыкIу IыгъыпIэхэм ащагъэсэхэрэ сабыйхэр зыхэлэжьэгъэ фестивалэу «Топ-топ каблучок» зыфиIорэр щыкIуагъ. Гала-концертым нахь дэгъоу зыкъыщызгъэлъэгъогъэ кIэлэцIыкIу коллективхэр къыщыхахыгъэх. ТекIоныгъэр къыдэзыхыгъэхэм призхэр ыкIи шIухьафтынхэр районым ипащэу Виталий Мазниновым къаритыжьыгъэх.

КIэлэцIыкIу IыгъыпIэ 42-мэ къарыкIыгъэхэ сабыйхэр фестивалым хэлэжьагъэх, ахэр ТIуапсэ, Жьыубгъо, Новомихайловскэм, Гъуакъо, Ныбыгъу, Шъэпсы ыкIи Псыбэ къарыкIыгъагъэх.

Фестивалым идевизыгъэр «Тэ тишIэжьыр – ТекIоныгъ, Тызгъэгушхорэр – Урысыер! Тиунэр – ТIопсэ район».

Къэгъэлъэгъонхэр Хэгъэгу зэошхом хэтыгъэхэм, зэо ужым чанэу Iоф зышIагъэхэм, апэрэ космонавтэу Юрий Гагариным, Пшызэ шъолъырым ыкIи ТIопсэ районым къащыхъугъэхэ хъугъэ- шIагъэхэм афэгъэхьыгъагъэх.

Фестивалым щатекIуагъэхэм Агуе къикIыгъэ хореографическэ ансамблэу «Колобок» зыфиIорэр ахэфагъ, ащ «ЭльбрускIэ» зэджэгъэхэ къашъор къышIыгъ.

— Фестивалым тишъыпкъэу зызэрэфэдгъэхьазырыгъэм ишIуагъэ къэкIуагъ, — къыIотагъ «Колобокым» изэхэщакIоу Аллало Хъарет. – ТикъэшъокIо цIыкIу­хэр фестивалым фэзгъэхьазырыгъэр Ачмыз Марин. — Фестивалыр зэхэзыщагъэхэми, кIэлэцIыкIухэм янэ-ятэхэу IэпыIэгъу къытфэ­хъугъэхэми тафэраз.