БзэджэшIагъэ къыжъудызэрахьэмэ, дежурнэ частым лъэIу тхылъыр зэрэIэкIэжъугъэхьагъэм елъытыгъэу талон къышъуатыжьын фае.

Шъуифитыныгъэхэр аукъуагъэхэу шъулъытэмэ, амал зэриIэкIэ нахь псынкIэу полицием макъэ ежъугъэIу.

Административнэ хэбзэукъоныгъэм фэгъэхьыгъэ лъэIу тхылъымкIэ сыд фэдэрэ уахъти мыхэм зафэжъугъэзэн шъулъэ­кIыщт:

— Адыгэ Республикэм и МВД ыкIи Урысыем и МВД ичIыпIэ отделхэм;

— Адыгэ Республикэм и МВД е Урысыем и МВД ичIыпIэ къулыкъухэм яофициальнэ сайтхэмкIэ;

— телефон номерэу 2-мкIэ (мобильнэм – 102-мкIэ).

ШъуилъэIу тхылъ тхыгъэу е жэрыIоу аIэкIэжъугъэхьан шъу­лъэкIыщт.

БзэджэшIагъэхэм е административнэ хэбзэукъоныгъэхэм афэгъэхьыгъэ лъэIу тхылъхэр сыд фэдэрэ уахъти аштэх. Хэгъэгу кIоцI IофхэмкIэ къулыкъухэм яIофышIэхэм япшъэрылъ бзэджэшIагъэхэм е административнэ хэбзэукъоныгъэхэм афэгъэхьыгъэ сыд фэдэрэ тхылъи аштэнэу. Хэбзэгъэуцугъэу щыIэр зэраукъуагъэм фэгъэхьыгъэ къэбарыр икъу-имыкъум емылъытыгъэу зэхафын фае. Полициер ары бзэджэшIагъэр зэрэзэрахьэгъэ шIыкIэр, ащ епхыгъэ зэхэфын Iофхэр, ищыкIэгъэ Iофтхьабзэхэр зезыхьэхэрэр.

Зыщышъумыгъэгъупш бзэджэшIагъэм фэгъэхьыгъэ къэбарыр нахь игъэкIотыгъэу, нахь тэрэзэу къишъуIотыкIыным мэхьанэшхо зэриIэр, сыда пIомэ хэбзэухъумакIохэм Iофэу зэшIуахын фаер ащ нахь къыгъэпсынкIэщт.

Уголовнэ Iоф къыпагъэтэджэным пае бзэджэшIагъэр зыдызэрахьагъэм къэбар икъу аIэкIигъэхьан фае. Шъо шъушъхьэкIэ телефоным шъуафытеуагъэ хъумэ, шъулъэкъуацIэ, шъуцIэ, шъуятацIэ, шъуиадрес, шъуителефон яшъуIон фае. ШъушIэзэ къэбар нэпцI яшъуIуагъэмэ, ащкIэ уголовнэ пшъэдэкIыжь шъу­хьын фаеу зэрэхъущтыр къышъуаIощт.

БзэджэшIагъэм е административнэ хэбзэукъоныгъэм афэгъэхьыгъэ лъэIу тхылъыр ыкIи къэбарыр залъыжъугъэIэскIэ, дежурнэ частым иIофышIэ лъэIу тхылъыр зэраштагъэмкIэ талоныр къышъуитыжьын фае. АщкIэ Iофэу ашIэрэм зыщыжъу­гъэгъозэн шъулъэкIыщт.

Адыгэ Республикэм и МВД ипресс-къулыкъу