Адыгеим и ЛIышъхьэу КъумпIыл Мурат ты­гъуа­сэ зэрищэгъэ зэIукIэр зыфэгъэхьыгъагъэр лъэпкъ проектэу «Автомобиль гъогу дэгъухэр ыкIи щынэгъончъэу щытхэр» зыфиIорэр гъэцэкIагъэ хъунымкIэ Iофыгъоу зэшIуахыщтхэр ары.

Транспорт инфраструктурэм ихэхъоныгъэкIэ IофшIэнэу зэшIуахыщтхэр, мыщ хэхьэх Мые­къуапэ, псэупIэу Яблоновскэм яавтомобиль гъогухэр ыкIи нэ­мыкI гъогухэу республикэ, чIыпIэ мэхьанэ зиIэхэр гъэцэ­кIэжьыгъэнхэр ары анахьэу анаIэ зытырагъэтыгъэхэр. 2024-рэ илъэсым ыкIэм ехъулIэу республикэ мэхьанэ зиIэ автомобиль гъогухэр нахьыбэ ашIынхэу, транспортэу гъогухэм ары­кIорэм ипчъагъэ къыкIе­гъэчыгъэнэу, гъогухэм къате­хъухьэрэ тхьамыкIагъохэр нахь макIэ шIыгъэнхэу рахъухьагъ.

ЗэIукIэр къызэIуихызэ рес­публикэм и ЛIышъхьэ анаIэ зы­тыраригъэдзагъэр транспорт инфраструктурэм ихэхъоныгъэ­кIэ IофшIэнхэм япсынкIагъэ къыкIемыгъэчыгъэныр ары. Шъу­гу къэтэгъэкIыжьы: лъэпкъ проектэу «Автомобиль гъогу дэгъухэр ыкIи щынэгъончъэу щытхэр» зыфиIорэм игъэцэ­кIэнкIэ Адыгеир анахь шъолъыр дэгъухэм ахалъытагъ. Илъэсэу икIыгъэм лъэпкъ проектымкIэ планым къыдилъытэхэрэм къарагъэхъугъ. 2021-рэ илъэсым агъэцэкIэжьын фэегъэ автомобиль гъогухэр ипIалъэм къыпэу агъэцэкIэжьыгъэх.

Адыгеим и ЛIышъхьэ къызэриIуагъэмкIэ, Урысые Феде­рацием и Президентэу Владимир Путиным партиеу «Единэ Россием» изэфэсэу мэкъуогъум и 19-м щыIагъэм пшъэрылъ ща­фишIыгъ автомобиль гъогухэм ягъэцэкIэжьынкIэ шъолъырхэм джыри мылъку къафыхагъэкIы­­нэу, гъэмафэм ыкIи бжыхьэм а мылъкур зэшIуахын фэе Iоф­хэм апэIуагъэхьан алъэкIыным пае.

«Гъогухэм ягъэцэкIэжьынрэ яшIынрэ апэIухьанэу ахъщэшхо къыхагъэкIы, ащ амал къеты планым къыдилъытэхэрэр дгъэ­цэкIэнхэу, республикэм итранспорт инфраструктурэ хэхъоныгъэ ышIыным пае Iофыгъоу зэ­шIотхыхэрэр нахьыбэ хъунхэу. НепэкIэ чIыопсым изытети ащ фэдэ амал къеты. Ведомствэ пстэуми лъэпкъ проектыр гъэцэкIагъэ хъуным пае акIуачIэ зэхалъхьан фае», — къыхигъэщыгъ КъумпIыл Мурат.

Адыгэ Республикэм псэо­лъэшIынымкIэ, транспортымкIэ, унэ-коммунальнэ ыкIи гъогу хъыз­мэтымкIэ иминистрэ иапэ­рэ гуадзэу Лафышъэ Рэмэзан къызэриIуагъэмкIэ, километрэ 75,624-рэ зикIыхьэгъэщт гъогу 54-рэ 2021-рэ илъэсым ехъу­лIэу агъэцэкIэжьынэу рахъухьагъ, джащ фэдэу автомобиль гъогоу «Инэм — БжыхьэкъоякIэр» зы­фиIорэм итранспорт зэхэ­кIыпIэ 2021 — 2023-рэ илъэсхэм агъэ­псыщт. Мы илъэсымкIэ рахъу­хьэгъагъэхэр зэкIэ икIыгъэ илъэсым агъэцэкIагъэх.

Адыгэ Республикэм и ЛIы­шъхьэ пшъэрылъ зэрафишIы-гъэм тетэу гъогухэм ягъэцэ­кIэ­жьынкIэ пIалъэу агъэнэфагъэм нахь псынкIэу Iофхэр зэшIуахыщтых. 2022-рэ илъэсымкIэ программэу зэхагъэуцуагъэм тетэу гъогу 46-рэ шапхъэхэм адиштэхэу ашIыщтых. 2021-рэ илъэсым Iоныгъом и 1-м ехъу­лIэу а IофшIэнхэр зэкIэ аухынхэу мэгугъэх.

Ащ нэмыкIэу гъогухэм атетыщт псэолъэ инхэми яшIын лъагъэкIуатэ. ГущыIэм пае, «Инэм — БжыхьэкъоякIэр» зы­фиIорэ гъогум транспорт зэ­хэкIыпIэ щашIыщт. 2023-рэ илъэсым ар аухынэу ары зэрэгугъэхэрэр. Джащ фэдэу Мые­къуапэ къэзыухьащт гъогум иятIонэрэ чэзыу мы илъэсым аухыщт, ящэнэрэ чэзыур — 2022-рэ илъэсым.

Проект документацием игъэ­хьазырын, ахъщэр нахь шIуагъэ хэлъэу гъэфедэгъэным тэрэзэу алъыплъэнхэу Адыгеим и ЛIы­шъхьэ пшъэрылъ къафишIыгъ, анахьэу анаIэ зытырагъэтын фаеу къыхигъэщыгъэр псэупIэу Яблоновскэм игъогухэр ары.

Гъогухэу анахь щынагъоу щытхэр къыхэгъэщыгъэнхэм ыкIи ахэм ящыкIэгъэ гъэцэ­кIэ­жьынхэр ащызэшIохыгъэнхэм апае ГИБДД-м гъусэныгъэ пытэ дыряIэн зэрэфаер КъумпIыл Мурат къыхигъэщыгъ. Ащ нэмы­кIэу гъогухэм хьылъэхэр зыщащэчыщтхэ пунктхэр ащыгъэпсыгъэнхэ зэрэфаери къыхигъэ­щыгъ. МВД-м и ГИБДД Адыгэ РеспубликэмкIэ и ГъэIорышIапIэ ипащэ игуадзэу Мамыекъо Каз­бек игъэкIотыгъэу ащ фэ­гъэхьыгъэу къыIотагъ.

«Лъэпкъ проектым епхыгъэ Iофыгъохэу зигугъу тшIыхэрэр зэшIохыгъэ зыхъухэкIэ, амалышIухэр щыIэ хъущтых. Непэ анахь лъэшэу тынаIэ зытедгъэ­тын фэе лъэныкъохэм ахэр ащыщых. Гъогухэм къатехъу­хьэрэ тхьамыкIагъохэр нахь макIэ шIыгъэнхэм, гъогузекIоныр щынэгъончъэу щытыным, цIыфхэм япсауныгъэ къэухъу­мэгъэным зэкIэми тыфэгумэкIыныр типшъэрылъ. Экономи­кэм ихэхъоныгъэкIи, цIыфхэм ящыIэкIэ-псэукIэ нахьышIу шIы­гъэнымкIи гъогухэм яхэхъо­ныгъэ ишIогъэшхо къэкIощт», — къыхигъэщыгъ КъумпIыл Мурат.

Адыгэ Республикэм и ЛIышъхьэ ипресс-къулыкъу