Дунэе Адыгэ Хасэм и Хэсашъхьэ изичэзыу зэхэсыгъо бэдзэогъум и 3-м Мыекъуапэ дэт Къэралыгъо филармонием щыкIощт, сыхьатыр 10-м рагъэжьэщт.

— Хэсашъхьэм изэхахьэ ты­фэхьазырэу тыпэгъокIы, — къы­тиIуагъ республикэ общественнэ движениеу «Адыгэ Ха­сэм» итхьаматэу, медалэу «Адыге­- им и Щытхъузехьэр» къызы­фагъэшъошагъэу ЛIымыщэкъо Рэмэзан.

ЗытегущыIэщтхэр

— Рэмэзан, Iофыгъуабэмэ шъуатегущыIэщт. Анахь шъхьаIэхэм тащыгъэгъуазэба.

— Мыекъуапэ зэхахьэр зэрэщыкIощтыр къыдалъыти, респуб­ликэ общественнэ движениеу «Адыгэ Хасэм» охътэ хэхыгъэм IофшIагъэу иIэр къэсIотэнэу пшъэрылъ къысфашIыгъ.

— Ащ ыуж сыда шъузытегущыIэщтыр?

— Дунэе Адыгэ Хасэм (ДАХ-м) ия ХIII-рэ Конгресс Iоныгъо мазэм и 20-м Налщык щыкIонэу щыт. Ащи игъэ­кIотыгъэу тытегущыIэщт.

ДАХ-м и Устав зэхъокIы­ныгъэхэр фэшIыгъэнхэм, ДАХ-р зызэхащагъэр мыгъэ илъэс 30 зэрэхъурэм, онлайн шIыкIэм тетэу адыгабзэр IэкIыб къэралхэм арыс тилъэпкъэгъухэм ягъэшIэгъэным, ДАХ-м ехьы­лIэгъэ тхылъым икъыдэгъэкIын, IэкIыб къэралхэм ащыпсэурэ тилъэпкъэгъу кIэлэцIыкIухэр Къэ­бэртэе-Бэлъкъарым, Къэ­рэ­щэе-Щэрджэсым, Адыгеим къы­зэрэкIощтхэм, ягъэмэфэ зы­гъэ­псэфыгъо лъэпкъым ичIыгужъ зэрэщагъэкIощтым, нэмыкIхэм татегущыIэщт.

— Iофыгъо къызэрыкIохэм игъэкIотыгъэу шъуатегущыIэным фэшI сыда IэубытыпIэ шъушIырэр?

— ДАХ-м ипрезидентэу Сэхъурэкъо Хьаутий, гъэцэкIэкIо купым ыкIи Хэсашъхьэм ахэтхэм язэгурыIоныгъэ щыIэныгъэм щэпытэ. Iофым шIыкIэу къыфэдгъотыщтхэм тызэдягу­пшысэ, упчIэжьэгъу тызэфэхъу.

— Хабзэм икъулыкъу­шIэхэм гъусэныгъэу ады­шъуиIэм тыщыбгъэ­гъуазэ тшIоигъу.

— Ащ сэри сыкъытегущыIэнэу гухэлъ сиIагъ. Хабзэм икъулыкъушIэхэр гъусэ умышIыхэу ащ фэдэ лъэпкъ, дунэе политикэ зыхэлъ Iофыгъохэр бгъэцэкIэнхэ плъэкIыщтэп. Тэ къытфэгъэ­хьыгъэу къыхэзгъэщы сшIоигъу Адыгэ Республикэм и ЛIышъхьэу КъумпIыл Мурат тызыщыфаем тызэрэIукIэрэр, тызэгъусэу Iоф­хэр зэрэдгъэцакIэхэрэр.

— Адыгеим лъэпкъыбэ щэпсэу. ЗэгурыIоныгъэ зэрэтхэлъым сыда къепIолIэщтыр?

— Республикэм лъэпкъ Iоф­хэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр Адыгэ Хасэм изэIукIэгъухэм, нэмыкI лъэпкъхэм язэхахьэхэм ахэлажьэ, гумэкIыгъоу яIэхэм защегъэгъуазэ.

Тызэкъотэу Iоф зэрэтшIэщтым, тимамыр щыIакIэ нахьышIу зэрэхъущтым зыкIыныгъэ тхэлъэу тапылъ.

КIэщакIом  елъытыгъ

— Адыгэ Хасэм и Хэса­шъхьэ иIофшIагъэ хи­гъэхъоным фэшI бгъэфе­дэрэ шIыкIэхэм гъэ­зет­еджэхэр къакIэуп­чIэх.

— Адыгэмэ «гущыIэ дахэм гъучIыр къегъэщы» аIо. Ащ мэ­хьанэ еттызэ, гущыIэмрэ щыIэныгъэмрэ зэпхыгъэхэу Iоф­шIэныр зэрэлъыдгъэкIотэщтым ты­пылъ.

— Щысэ къэхьыба.

— Адыгэ Хасэм игъэцэкIэкIо куп хэтхэр кIэщакIо Iофыгъуабэмэ афэхъух. Ягупшысэхэр гущыIэ къодыеу щымытынхэм фэшI кIэщакIо зыфэхъухэрэ Iофыгъохэм язэхэщакIохэу щытых.

— ГущыIэмрэ Iофымрэ зэпхыгъэх.

— Джары тиIофшIэн зыгъэлъэшырэр.

Тиадыгабз

— КIэлэцIыкIу зыгъэ­сапIэу «Щыгъыжъыем» Адыгэ Хасэм…

— «Щыгъыжъыем» зыщигъэсэнэу унэ иIагъэп. Художест­веннэ пащэу Уджыхъу Марыет Адыгэ Хасэм хэт. Хасэр зычIэт унэм «Щыгъыжъыем» зыщигъасэу ригъажьи, цIэрыIо хъугъэ.

— Республикэм и Къэралыгъо премие илауреат хъугъэ.

— Адыгабзэр зымышIэхэрэр «Щыгъыжъыем» къэкIох, бэ тырамыгъашIэу гущыIакIи, еджа­кIи зэрагъашIэ.

— КIэлэцIыкIу IыгъыпIэхэм адыгабзэр ащызэрагъашIэ, ау щыкIагъэ­хэр афэхъух.

— Ащи тегупшысэ. ЯщыкIэгъэ тхылъхэр, нэрылъэгъу IэпыIэгъухэр яIэх шъхьае, егъэ­джэн-пIуныгъэ Iофыр лъэхъаным диштэу зэхащэгорэп, щыкIагъэхэм ядэгъэзыжьын тыпылъыщт.

— Шы лъэпкъхэм якъэгъэлъэгъон Санкт-Петербург зэрэщыкIуагъэр тшIогъэшIэгъон.

— Адыгэ Хасэм игъэцэкIэкIо куп хэтэу Тхьапшъэкъо Аль­берт кIэщэкIо чан, «Шыу Хасэм» ипащ. Адыгеим ращыгъэ шэу Налмэсым ятIонэрэ чIыпIэр къэ­гъэлъэгъоным къыщыдихыгъ. «Иппосфера-2021-м» щытхъур къыщихьыгъ.

Адыгэ бэнакIэр

— Адыгэ бэнакIэмкIэ шъолъырхэм язэнэкъо­къу Мыекъуапэ игъэкIотыгъэу апэрэу щыкIуагъ.

— Урысыем, Адыгеим язаслуженнэ тренерэу, Адыгэ Ха­сэм игъэцэкIэкIо куп хэтэу Хъот Юныс зэнэкъокъум кIэщакIоу иIагъ. Джырэблагъэ тхэквон­домкIэ Урысыем и Кубок къыдэ­хыгъэным ыкIи хэгъэгум икоман­дэхэм язэнэкъокъу Мыекъуапэ щыкIуагъ. Хъот Юныс зэхэщэкIо шъхьаIэхэм ащыщыгъ.

— СССР-м изаслуженнэ тренерэу Кобл Якъубэ фэгъэхьыгъэ шIэжь зэ­нэкъокъум укъытегущы­Iагъэп.

— Адыгэ Хасэм хэтхэр, тиныбджэгъу кIэщакIохэр ащи чанэу хэлэжьагъэх. Кобл Якъубэ дунаим щашIэрэ цIыф лъэшэу зэрэщытыгъэр гъашIэм хэ­кIуакIэрэп.

Мурад шъхьаIэхэр

— ДАХ-м и Конгресс, нэмыкI зэхахьэхэм шъуа­хэлэжьэщт. Мурад шъхьаIэу шъуиIэр къы­хэ­гъэщыба.

— Адыгабзэм, тарихъым, лъэпкъ шэн-хабзэхэм язэгъэшIэн, ныбжьыкIэхэм пIуныгъэ дэгъу ятыгъэным тапылъ. Тиму­радхэр гощыгъэхэу дгъэпсы­хэрэп. Адыгэмэ зэраIоу, узэ­къотмэ — улъэш. Тэ, адыгэхэм, титэкъухьагъэу дунаим тыщэпсэуми, зыкIыныгъэу тхэлъым кIуачIэ къытхелъхьэ, шIы­кIэшIухэр тызэгъусэу къэтэгъотых. Мыекъуапэ щыкIощт зэ­Iу­кIэм упчIэжьэгъу тыщызэфэ­хъущт.

Хэлэжьэщтхэр

— Урысыем ишъолъырхэм, Иорданием, Тыркуем, Европэм ихэгъэгухэм къарыкIыщтхэр, хабзэм икъулыкъушIэхэр, нэ­мыкIхэри ДАХ-м и Хэсашъхьэ изэIукIэ хэлэжьэщтых, — къе­Iуатэ ЛIымыщэкъо Рэмэзан. — Сирием, Израиль ащыпсэурэ тилъэпкъэгъухэр онлайн шIы­кIэм тетэу тизэхахьэ зыщагъэгъозэщт.

— ДАХ-м изэхахьэ дэ­гъоу Мыекъуапэ щыкIо­нэу, шъуимурадхэр къы­жъудэхъунхэу шъуфэтэIо.

— Тхьауегъэпсэу.

ЕмтIылъ Нурбый.