Адыгэ Республикэм и ЛIышъхьэу КъумпIыл Мурат иунашъокIэ бэ­дзэогъум и 2-м Правительствэр зычIэт Унэм мобильнэ шIыкIэм тетэу вакцинациер щызэхащагъ. ГъэцэкIэкIо хабзэм иорганхэм яIофышIэ нэбгырэ 50 фэдизмэ коронавирусым пэуцужьырэ прививкэр («Спут­ник V» зыфиIорэр) ахалъхьагъ.

Коронавирусым пэуцужьырэ вакцинэр зыщахалъхьэрэ чIыпIэхэм етIупщыгъэу Адыгеим Iоф щашIэ. ПстэумкIи вакцинэ хэлъхьагъу мин 62,5-рэ (мы тхьамафэм вакцинэ хэлъхьагъу мини 10) тишъолъыр къыIэ­кIэ­хьагъ.

Прививкэр языгъэшIырэ нэ­бгырэ пчъагъэм хэхъо. Бэдзэ­огъум и 2-м ехъулIэу апэрэ Iахьыр нэбгырэ мин 50,7-м, нэбгырэ мин 32-м ехъурэмэ IахьитIури ахалъхьагъ. Нэбгырэ зырызхэм ямызакъоу, организацие зэфэшъхьафхэу зиIоф­шIэнкIэ цIыфыбэмэ яолIэнхэу хъухэрэр зэхэтхэу вакцинэр зыхарагъалъхьэ.

Вакцинэр языгъэшIынэу къе­кIолIагъэхэм ащыщ АР-м Iоф­шIэнымкIэ ыкIи социальнэ хэ­хъоныгъэмкIэ и Министерствэ иправовой отдел ипащэу Шъы­нэхъо Иринэ.

— ИкIыгъэ илъэсым коронавирусымкIэ хьылъэ дэдэу сысымэджагъ, сымэджэщми сыч­Iэ­лъыгъ. Арышъ, къаIогъэ къо­дыеу щымытэу, мы уз бзаджэм икъиныгъохэр сэ сшъхьэкIэ сыушэтыгъэ. Вакцинэр къыдэ­кIыным сежагъ, ащ ишIуагъэ къэкIонэу сыщэгугъы. Спкъы­нэ-лынэ хэлъ антителахэр макIэ мэхъуфэхэ сежагъ. Джы егъэзыгъэ Iоф хэмылъэу, сэ сыфаеу вакцинацием сыкъекIолIагъ. Къыхэзгъэщымэ сшIоигъу си­Iахьылыбэмэ вакцинэр зэрэ­зыхарагъэлъхьагъэр. Врачэу къысэплъыщтым сипсауныгъэкIэ нахь къекIоу ылъытэрэ вакцинэр къыхэсхыщт, — къыIуагъ Шъынэхъо Иринэ.

Шъугу къэдгъэкIыжьын, непэ Адыгеим коронавирусым пэуцужьырэ вакцинэр зыщашIын алъэкIыщт чIыпIэ 32-рэ къыщызэIуахыгъ ыкIи мобильнэ пунк­титIумэ Iоф ашIэ. Вакцинэр зы­хязыгъалъхьэ зышIоигъохэм чэзыум хэмытынхэм фэшI къэ­ралыгъо фэIо-фашIэхэм япорталкIэ зарагъэтхын амал щыI.

Iэшъынэ Сусан. Сурэтыр Iэшъынэ Аслъан тырихыгъ.