Ветеранхэм ясатырэ бэмышIэу хэуцуагъ ГъукIэлI Теуцожь. ИщыIэны­гъэ щыщ илъэс 40-м ехъурэр гъогурыкIоныр щынэгъончъэнымкIэ ин­спек­цием щигъэкIуагъ. Младшэ лейтенантым къыщыригъажьи, полков­никым нэсын ылъэкIыгъ.

0— Дзэ къулыкъум сыкъызекIыжьым колхозым тIэкIурэ Iоф щысшIагъэу, 1982-рэ илъэсым милицием сыхэхьанэу ис­хъухьагъ. Ащ дэжьым Тэхъу­тэмыкъуаерэ Адыгэкъалэрэ зэхэтыгъэх. Конвойнэ подразделением милицие къызэрыкIоу IофшIэныр щезгъэжьагъ. Ахэр зызэхэкIыжьхэм, Адыгэ­къалэ къэзгъэзэжьыгъ, Къэралыгъо автоинспекцием IофшIэныр щыпысыдзагъ. 2009-рэ илъэсхэм хэушъхьафыкIыгъэхэу МРЭО-хэр зызэхащэхэм, Адыгэкъалэ къыщызэIуахыгъэм ипащэу сагъэнэфагъ. Илъэси 10-рэ ащ Iоф щысшIагъэу 2018-рэ илъэсым итыгъэгъазэ Мые­къуапэ щыIэ регистрационнэ-­экзаменационнэ отделэу N 1-м ипащэу сыкъащэжьыгъ. Джы бэмышIэу, сыныбжь илъэс 60 зэхъум, сэ сишIоигъоныгъэкIэ пенсием сыкIуагъ, — къе­Iуатэ Теуцожь.

Мыщ фэдэ подразделением пэщэ IэнатIэр илъэс 12 щыпIыгъыныр IэшIэхэп. IофшIакIэм зэкIэри псынкIэу щыгъуазэхэу хъурэп. Ау тигущыIэгъу сы­дигъуи ыпэ зэрэригъэхъущтым пылъыгъ. Ащ пае нахьыжъхэм ядэ­Iущтыгъ, акIырыплъыщтыгъ, ымышIэрэмкIэ яупчIыжьыщтыгъ. ЯIофшIэн лъэныкъо зэфэшъхьа­фэу зэрэзэхэтыр игъорыгъозэ ыIэ къыригъэхьагъ.

— ЛъэгэпIэ гъэнэфагъэхэм санэсынымкIэ сызэныбжьыкIэм коммунистическэ пIуныгъэу къысхалъхьагъэм ишIуагъэ къы­сэкIыгъэу сэлъытэ. IофшIэным пылъ къиныгъохэм тыкъагъащтэщтыгъэп. ТаужкIэ къикIырэ IофышIэхэм ар ахэслъхьаным сыдигъуи сыпылъыгъ. Тэ тилъэ­хъан нахьыжъхэм тызаIофытэкIэ тыгушхощтыгъ, цыхьэ къызэрэтфашIыгъэм пае нахь тегугъущтыгъ, псынкIэу Iофыр зэ­шIотхыщтыгъ. Iоф сэшIэфэ больничнэ сыкIуагъэу къэсшIэжьырэп, сымаджэ сыхъу­гъэми, слъакъо сытетэу сы­хъу­жьыщтыгъ, — еIо ГъукIэлI Теуцожь.

IофшIэныр къыбдэхъуным пае пстэуми анахь шъхьаIэу тигущыIэгъу къыхигъэщыгъэр ар шIу плъэгъуныр ары. УгукIэ узыфэщэгъэ сэнэхьатыр къызыхэмыхыкIэ IофшIэныр пфэ­гъэцэкIэщтэп.

Ащ дакIоу, пэщэ IэнатIэ уIут зыхъукIэ, IофышIэ купыр зэбгъэ­кIун, ори зыкъябгъэштэн фае. Теуцожь отделым пэщэныгъэ дызэрехьэфэ ащ ыкIуачIэ фигъэIорышIагъ, нэбгырэ пэпчъ екIолIэкIэ гъэнэфагъэ къыфи­гъо­тын ылъэкIыгъ. Чыжьэу плъэ­рэ пащэхэм ащыщэу, зыщищыкIагъэм пхъэшагъи хэлъэу, щытхъуми шъхьамысэу игъогу къырыкIуагъ.

— Сызщытхъужьэу арэп, илъэс 25-м къыкIоцI пэщэ Iэ­натIэ зысэIыгъым, сызхэтхэм ягукъауи, ягушIуагъуи, мэфэкI­хэри адэзгощыгъэх, — къеIуатэ ащ. — Зы нэбгырэ IофшIапIэм IуязгъэгъэкIыгъэп, хэу­къуагъэр гъогу занкIэ зэрэ­тесщэжьыщтым сыпылъыгъ. Илъэс пчъагъэкIэ узэ­кIэ­Iэ­бэ­жьымэ, Iоф зыдэсшIэгъабэхэр къыс­фытеох, сикъэбар къыкIэупчIэх. Сэ ащ лъэшэу уасэ фэсэшIы.

ГъукIэлI Теуцожь илъэс зэкIэ­лъыкIохэм щытхъу тхылъ ыкIи медаль зэфэшъхьафхэу бэ къы­фагъэшъошагъэхэр, ар IофшIэным иветеран, къуаджэу Ас­къэлае ицIыф гъэшIуагъ.

IофшIэным дакIоу Теуцожь унэгъо дахэ ышIагъ. Ишъхьэ­гъу­сэу Разыетрэ ежьыррэ кIа­лэ­рэ пшъашъэрэ зэдапIугъ. Ра­зыет «Сбербанкым» икъутамэу Пэнэжьыкъуае дэтым ипащэу илъэс пчъагъэрэ Iоф ышIагъ, джы къылэжьыгъэ зыгъэпсэ­фыгъом щыс. Азэмат ятэ илъа­гъо рыкIожьыгъ. Адыгэкъалэ щыIэ МРЭО-у N 2-м ипащэ игуадз, полицием имайор. Ипшъа­шъэу Заремэ унагъо ис, Шъаомэ яныс. Инэм администрацием бухгалтерэу Iоф ще­шIэ. Нэнэжъ–тэтэжъмэ ямафэ­хэр къафэзыгъэчэфыхэрэ пхъо­рэлъф-къорэлъфищ яI.

Адыгеим и Къэралыгъо автоинспекцие ыныбжь илъэс 85-рэ зэрэхъурэмкIэ тигущы­Iэгъу иIофшIэгъухэм афэгушIо. IофшIэн мыпсынкIэу агъэца­кIэрэм халъагъорэ къиныр шIу­кIэ къафызэкIэкIожьэу, псауныгъэ пытэ яIэу, ябынхэм адатхъэхэу бэрэ щыIэнхэу афэлъаIо.