«Къэралыгъо автоинспекцием иIофышI» заIокIэ, бэщ къолэныр ыкIи сырынэр зыIыгъ полицейскэр зэу нэгум къыкIэуцо. Ахэр арых гъогу­хэм щынэгъончъагъэр къащызыухъумэхэрэр.

Ом изытет емылъытыгъэу, къещхыми, къесыми, гъэмэфэ фабэми къулыкъур ахьы. Iоф­шIэн мыпсынкIэу ахэм агъэцакIэрэм гъэхъагъэу щашIырэм игугъу тшIынэу затефэрэр ямэфэкI закъоп. Ау мы мафэм нахь игъэкIотыгъэу яIоф­шIэн тытегущыIэ хабзэ. Ясэнэхьат епхыгъэ мафэм ипэгъо­кIэу Урысыем и Къэралыгъо автоинспекцие и ГъэIорышIапIэу Адыгэ Республикэм щыIэм ихэушъхьафыкIыгъэ взвод иинспекторэу, по­лицием икапитанэу Станислав Красновым гущыIэгъу тыфэ­хъугъ.

Гъогум телъ щыIэныгъэ жъу­пIэм ыгузэгу хэтэу илъэс 25-м ехъугъ Станислав Iоф зишIэрэр ыкIи къыхихыгъэ сэнэхьатым рыкIэгъожьэу зы мафи къы­хэкIыгъэп. Лицееу N 19-р къызеухым, гухэлъышIоу зыдиIы­гъыгъэ ГАИ-м иеджапIэ (джы ащ Краснодарскэ юридическэ институт зэреджэхэрэр) чIэхьагъ. Ащ ыуж 1996-рэ илъэ­сым Къэралыгъо автоинспек­цием IофшIэныр щыригъэжьагъ.

— Апэрэ мафэм къыщыублагъэу джы къызнэсыгъэм гъогум сытетэу Iоф сэшIэ, — къеIуатэ С. Красновым. — Хэти щы­гъуаз я 90-рэ илъэсхэм бзэджэшIагъэхэр зэрэжъугъэхэр, машинэхэр рафыжьэхэу, IашэкIэ зыщыфэе чIыпIэм щыохэу зэ­рэщытыгъэр. Ау сыд фэдэрэ къиныгъуи зэрэзэпыпчыщтым зыфэбгъэсэн фае. Ыпэрэ илъэс­хэм мы уахътэр зябгъапшэкIэ, джащ фэдэ зэфэмыдэныгъэхэр къыхэщых. Водительхэм ягугъу пшIымэ, сыдигъуи дысэу гущы­Iэхэрэр щыIагъэх ыкIи щыIэх. ЗэкIэхэмкIи дэгъу ухъун плъэ­кIыщтэп. Джы уахътэм цIыфхэр дэкIох, технологиякIэхэр агъэфедэх. Зэпымыоу тиIофшIэн къылъэплъэх.

Гъогу инспекторым иIофшIэгъу мафэхэр жъотых. Ащ хэхьэх къэлэ кIоцIым, районхэм къулыкъур ащахьыныр.

— Сэ сызыхэхьэрэ хэушъхьа­фыкIыгъэ взводыр гъэнэфагъэу зы чIыпIэ щытырэп. Анахьыбэу авариехэр зыщыхъурэ районхэм тагъакIо, къэлэ шъхьаIэми IэпыIэгъу ищыкIагъэ зыхъукIэ тыкъыдэнэ. Маршрутэу тиIэм елъытыгъэу IофшIэныр тэгъэпсы. ГущыIэм пае, къэлэ кIоцIым анахьэу тынаIэ зытедгъэтырэр — лъэсрыкIохэм,машинэхэм шапхъэхэр амыу­къонхэр, апчхэр гъэушIуцIы­гъэхэмэ, нэфрыгъуазэхэм зэращызекIохэрэр. Гъогушхохэм тызатехьэкIэ — псынкIэ зекIоныр, гъогу тамыгъэхэм зэрары­гъуа­зэхэрэр. Ащ дакIоу, Iоф­тхьэбзэ гъэнэфагъэу тиведомствэ зэхищэхэрэм — «Ешъогъэ водитель», «КIэлэцIыкIу тIысыпIэр», «Такси», «Щынэ­гъончъэ бгырыпхыр», зыфиIо­хэрэм, нэ­мыкIхэми япхыгъэу Iоф тэшIэ.

Гъогу патруль къулыкъум иIофышIэ шэн гъэнэфагъэхэр хэлъынхэу щыт. АпэрапшIэу Станислав къыхигъэщыгъэр ар психологэу зэрэщытын фаер ары. Сыда пIомэ шэн зэфэ­шъхьафыбэ зыхэлъ цIыфхэм аIокIэх, нэбгырэ пэпчъ екIолIэкIэ гъэнэфагъэ къыфэбгъотынэу щыт. ЦIыфэу къэбгъэуцугъэр анахь губжыгъэми, упэгушIуатэзэ, хэукъоныгъэу зэри­хьагъэр гурыбгъэIощт. Красновым зэрилъытэрэмкIэ, IофшIэным угукIэ уфэщагъэу, теубытагъэ пхэлъэу, шэн пытэ уиIэу щытмэ, ар къыбдэхъущт.

Гъогум къулыкъур щыпхьыныр зэрэщынагъор хэткIи шъэ­фэп. Ащи еплъыкIэ гъэнэфагъэ тигущыIэгъу фыриI.

— Шъыпкъэ, щынэгъо чIыпIэхэми тарыфэу къыхэкIы, тиIофшIэгъубэхэми гъогум апсэ щатыгъ. Ахэр тщыгъупшэхэрэп, яшIэжь тэгъэлъапIэ. Къулы­къушIэм сыдигъуи гушхоныгъэ хэлъэу щытын фае. ШъуашэкIи, IашэкIи дэгъоу тызэтегъэ­псыхьагъ, ау щыIэныгъэм къырыкIощтыр къэшIэгъуае, — къы­Iуагъ Станислав Красновым.

ЦIыфыр пшъыгъэу IофышIэ къызикIыжьыкIэ е изыгъэпсэфыгъо уахътэ ыгу къызыщыдищэещтым зигъазэу хабзэ.

— Сэ ащ фэдэу сиIэр си­унагъу, — еIо Станислав. —Сишъхьэгъусэрэ сэрырэ сабыищ зэдэтэпIу. Анахьыжъ шъаор по­лицием иеджапIэу Краснодар дэтым игъогу-патруль отделение ия 3-рэ курс щеджэ. Ащ къыкIэлъыкIорэ пшъашъэм илъэс 14 ыныбжь, гимназиеу N 5-м чIэс, шъэожъые анахьыкIэм илъэси 4 ыныбжь, ар кIэлэцIыкIу IыгъыпIэм макIо.

Илъэс 25-м къыкIоцI щытхъу ыкIи рэзэныгъэ тхылъхэмкIэ, медаль зэфэшъхьафхэмкIэ гъо­гогъу 44-рэ Станислав Крас­новыр къыхагъэщыгъ.