Урысыемрэ Беларусымрэ яшъолъырхэм яя VIII-рэ Форумэу щыIагъэм анахьэу анаIэ зыщытырагъэтыгъэр цифрэ шапхъэхэм ялъэ­хъан научнэ-техническэ зэдэпсэуныгъэм изы­тет ары. Пленарнэ зэхэсыгъоу тыгъуа­сэ щыIагъэм хэлэжьагъэх Урысыем и Прези­дентэу Владимир Путинымрэ Беларусым и Президентэу Александр Лукашенкэмрэ.

Урысые Федерацием и Федеральнэ ЗэIукIэ ФедерациемкIэ и Совет, Беларусым и Лъэпкъ ЗэIукIэ РеспубликэмкIэ и Совет, хэгъэгуитIумэ япра­вительствэхэм ыкIи яшъолъыр­хэм япащэхэр зыхэлэжьэгъэхэ форумыр зэрищагъ Урысые Федерацием ФедерациемкIэ и Совет и Тхьаматэу Валентина Матвиенкэм. Ащ къызэрэхи­гъэщыгъэмкIэ, Урысыемрэ Беларусымрэ яшъолъырхэм зэ­дашIыгъэ зэзэгъыныгъэ 20-м ехъумэ адызэдыкIэтхэжьыгъэх. Джащ фэдэу университетхэм, культурэм иучреждениехэм ыкIи нэмыкI структурэхэм япащэхэм ащ фэдиз хьазыр зэзэгъыны­гъэхэу аIапэ зыкIадзэжьыгъэр. Адыгеим ыцIэкIэ видеоселектор шIыкIэм тетэу Iофтхьабзэхэм ахэлэжьагъэх Адыгэ Респуб­ликэм и ЛIышъхьэу КъумпIыл Мурат, Адыгэ Республикэм и Премьер-министрэу Геннадий Митрофановыр, Адыгэ Респуб­ликэм и Вице-премьерэу Сапый Вячеслав, министерствэхэу экономикэм, гъэсэныгъэм, циф­рэ шапхъэхэм ыкIи нэмыкIхэм япхыгъэ Iофыгъохэм афэгъэзагъэхэм яIэшъхьэтетхэр.

Iофыгъо шъхьаIэу зытегущы­Iэхэрэм къызыщэуцум Урысыем и Президентэу Владимир Путиным къыхигъэщыгъ наукэм ыкIи техникэм алъэныкъокIэ бэшIагъэу хэгъэгуитIури гъэ­хъагъэ хэлъэу зэрэзэдэлажьэ­хэрэр, научнэ-технологическэ шъолъыр зыкIым ихэхъоныгъэ епхыгъэ стратегическэ пшъэ­рылъыр зэрэзэшIуахырэр.

«Мы лъэхъаным Урысыемрэ Белоруссиемрэ яправительствэхэм анаIэ зытырагъэтырэр цифрэ шапхъэхэм япхыгъэ унэшъо зыкIхэр зэдаштэнхэр ары. Ахэм хэпшIыкIэу яшIуагъэ къэкIощт хэбзэIахьхэм ятын, таможеннэ Iофхэр гъэпсыгъэнхэм япхыгъэ Iофыгъохэр нахь псынкIэу зэшIохыгъэнхэмкIэ, хьылъэхэу гъогухэм ащызэращэхэрэм алъыплъэгъэнымкIэ.

А пстэуми яшIуагъэ къэкIощт хэгъэгуитIумэ яунэе предпринимательствэ зэфэдэ лъапсэм тетэу хэхъоныгъэ ышIынымкIэ», — къыхигъэщыгъ Владимир Путиным.

Медицинэм, гъэсэныгъэм, атомнэ энергетикэм, геологоразведкэм, джащ фэдэу ин­формационнэ-вычислительнэ технологиехэм алъэныкъокIэ хэгъэгуитIумэ азыфагу зэдэлэ­жьэныгъэ-гъусэныгъэ пытэ зэрилъыр къыхагъэщыгъ. Урысыем и Президент ипсалъэ зыщиухыщтым дэжь Респуб­ликэу Беларусь ишъхьафитыныгъэ и Мафэу бэдзэогъум и 3-м ха­гъэунэфыкIырэм — къалэу Минскэ нэмыц-фашист теха­кIохэр зыдафыжьыгъэхэм и Мафэ фэшI афэгушIуагъ.

Беларусым и Президентэу Александр Лукашенкэр къызэгущыIэм мы форумыр Союзнэ къэралыгъом ипроект шъхьа­Iэхэм ащыщэу ылъытагъ.

«Космосым иушэтынкIэ ти­зэ­дэлэжьэныгъэ зетэгъэушъомбгъу, къэбархэр обработкэ зэ­рашIырэ системэхэр къызэдыхэтэхых, медицинэм иIофыгъохэм тадэлажьэ ыкIи а лъэныкъохэмкIэ гъэхъэгъэшIухэр тшIыгъэх. Беларусым шIэныгъэ­хэмкIэ и Академие иинститутхэм шIуагъэ хэлъэу адэлажьэ РАН-м и Сыбыр къутамэ. Ащ джыри зэ къеушыхьаты тизэ­дэлэжьэныгъэ нахьышIу хъузэ зэрэлъыкIуатэрэр», — къыIуагъ Александр Лукашенкэм.