Хабзэр мыукъогъэнымкIэ Адыгэ Республикэм и Координационнэ зэIу­кIэ изэхэсыгъо Адыгэ Республикэм и Правительствэ зычIэт унэм тыгъуасэ щыкIуагъ. Адыгеим и ЛIышъхьэу КъумпIыл Мурат ар зэ­рищагъ.

Зэхэсыгъом Iофыгъо шъхьаIэу зыщыхэплъагъэхэр лъэпкъ, федеральнэ проектхэр Адыгэ Республикэм щагъэцакIэхэ зыхъукIэ хэбзэукъоныгъэхэр амышIынхэр ыкIи ащ фэдэхэр зышIыхэрэм ягъогупэ пыбзыкIыгъэныр ары.

Адыгэ Республикэм и УплъэкIу­-лъытэкIо палатэ итхьаматэу Павел Стаценкэм, Феде­ральнэ казначействэм Адыгэ РеспубликэмкIэ и ГъэIорышIапIэ ипащэ ипшъэрылъхэр пIэлъэ гъэнэфагъэкIэ зыгъэцакIэу Жэ­нэ Мурат, къэралыгъо финанс уплъэкIунхэмкIэ Адыгэ Респуб­ликэм и ГъэIорышIапIэ ипащэу Насыф Мариянэ зэхэсыгъом докладхэр къыщашIыгъэх.

Лъэпкъ проектхэр дэгъоу Адыгэ Республикэм зэрэща­гъэцакIэхэрэр зэхэсыгъом къы­щаIуагъ. УплъэкIунхэм афэгъэзэгъэ къулыкъухэмрэ хэбзэу­хъумэкIо къулыкъухэмрэ уплъэ­кIун, эксперт-аналитикэ Iоф­тхьабзэхэр зэгъусэу ренэу зэрахьэх. Псэолъапхъэхэр, оборудованиер нахь лъапIэу ащэнхэу, зэзэгъыныгъэхэм ягъэцэ­кIэнкIэ пIалъэхэр аукъонхэу фежьагъэхэу хэбзэукъоныгъэ заулэ къыхагъэщыгъ ыкIи ахэм ягъогупэ пабзыкIын алъэкIыгъ.

Адыгеим и ЛIышъхьэ зэрэ­хигъэунэфыкIыгъэмкIэ, уплъэ­кIун­хэм якIэуххэр ведомствэ гъэнэфагъэхэм афагъэхьых, лъэпкъ проектхэр агъэцакIэхэ зыхъукIэ ахэр къыдалъытэщтых. Республикэм ипащэ пшъэрылъ зэрафишIыгъэм тетэу ведомствэ заулэмэ ялIыкIохэр зыхэхьэрэ куп зэхащагъ, ащ изэхэсыгъохэм Iофыгъо шъхьаIэхэм щахаплъэх, ахэм язэшIохыкIэ хъущтхэр щагъэнафэх.

«Пшъэрылъхэр икъоу гъэцэкIэгъэнхэ, Урысые Феде­рацием и Президентэу Владимир Путиным къыгъэнэфэгъэ пшъэрылъхэу лъэпкъ проектхэм къащыдэлъытагъэхэр зэшIохыгъэнхэ, федеральнэ мылъкур шIуагъэ къытэу, шъхьэихыгъэу агъэфедэн фае. Ащ пае щыкIагъэу тиIэхэр зэхэтэфых, ахэм ядэгъэзыжьынкIэ амалхэр зе­тэхьэх. УплъэкIунхэр зэхэзыщэ­рэ къулыкъухэм ахэтхэм тя­лъэIу мы IофшIэным къыхэлэжьэнхэу, консультациехэр зэхащэнхэу», — къыIуагъ КъумпIыл Мурат.

ГъогурыкIонымкIэ шапхъэхэр зыукъохэрэм тазырхэр зэра­рагъэтырэм епхыгъэ Iофыгъо­хэми зэхэсыгъом щатегущы­Iа­гъэх. ГъогурыкIоныр щынэ­гъон­чъэнымкIэ республикэ Гуп­чэм ипащэу Даур Аргун, АР-м и МВД и ГИБДД ипащэу Александр Курпас, хьыкумышI приставхэм я Федеральнэ къулыкъу Адыгэ РеспубликэмкIэ и ГъэIорышIапIэ ипащэу Александр Ихно докладхэр зэхэсыгъом къы­щашIыгъэх.

Лъэпкъ проектэу «Щынэгъончъэ, джырэ шапхъэхэм адиштэрэ автомобиль гъогухэр» зыфиIорэм къыдыхэлъытагъэу 2020 — 2024-рэ илъэсхэм видеокамерэ 99-м ехъу Адыгеим щагъэуцущт. Ахэм ащыщэу мыгъэ камерэ 19 агъэуцунэу щыт. Джыдэдэм республикэм игъогухэм ащ фэдэ камерэ 95-рэ ащагъэфедэ.

2021-рэ илъэсым мэкъуогъум и 18-м ехъулIэу гъогурыкIонымкIэ шапхъэхэр зэраукъуагъэхэм епхыгъэу унэшъо мин 234,5-рэ зэхагъэуцогъагъ. Сомэ миллиони 140-м ехъурэ тазыр атыралъхьагъ. ГъэрекIорэм елъытыгъэмэ, мыгъэ тазырхэр нахь икъоу аугъоижьыхэ хъугъэ, про­цент 81,6-м ар нэсыгъ.

ЧIыфэхэр къаIыхыжьыгъэнхэмкIэ Iофэу ашIэрэми зыкъи­Iэтыгъ. Ведомствэхэм электрон амалхэр къызфагъэфедэхэзэ фэIо-фашIэхэр зэхащэх. Тазырэу амытыгъэхэр къаIыхыгъэным фэгъэхьыгъэ материалхэр хьыкумышI приставхэм я Федеральнэ къулыкъу автоматизированнэ шIыкIэм тетэу IэкIагъэхьанхэ алъэкIы.

«Тэ пшъэрылъ шъхьаIэу тиIэр цIыфхэм ящынэгъончъагъэрэ япсауныгъэрэ къэтыухъумэнхэр ары. ГъогурыкIонымкIэ шап­хъэхэр зэраукъуагъэхэм ехьы­лIэгъэ унашъо пэпчъ агъэцэкIэным, тазырхэр икъоу къатынхэм лъэшэу тынаIэ тедгъэтын фае. Хабзэр зыукъохэрэм пщыныжь зэрарагъэхьыщтыр ашIэн фае. Джащыгъум гъогухэм авариехэр нахь макIэу атехъухьащтых», — къыIуагъ АР-м и ЛIышъхьэ.

ЦIыфхэр зэрэкощыхэрэм, IэкIыб къэралыгъохэм къарыкIыжьыхэрэм коронавирусыр хэгъэгум къырамыхьаным, лэ­жьапкIэм икъэтынкIэ цIыфхэм яфитыныгъэхэр къэухъумэгъэнхэм япхыгъэ Iофыгъохэми зэ­хэсыгъом щахэплъагъэх.

Зэхэсыгъом икIэух хабзэр мыукъогъэнымкIэ Адыгэ Рес­пуб­ликэм и Координационнэ зэ­IукIэ хэтхэм 2021-рэ илъэсым иапэрэ кIэлъэныкъо Iофэу ашIагъэр щызэфахьысыжьыгъ, ятIо­нэрэ кIэлъэныкъомкIи агъэцэ­кIэщтхэр агъэнэфагъэх.

АР-м и ЛIышъхьэ ипресс-къулыкъу