COVID-19-м пэуцужьырэ вакцинацием ишIын епхы­гъэ шIыкIакIэ Урысыем щагъэнэфагъ. Ащ къызэрэдыхилъы­тэ­рэмкIэ, коронавирусыр къызэузыгъэхэр ревак­цинацие е вакцинацие мэзи 6 тешIэ къэс афашIыщт (мыщ къы­хе­у­бытэх ыпэкIэ вакцинэр зыхалъхьагъэхэр).

Джащ фэдэу цIыфым вакцинацием зыфигъэ­хьазыр зыхъукIэ ипкъынэ-лынэ иммуноглобули­нэу G ыкIи M зыфиIохэрэр хэлъхэмэ къэзгъэ­лъэ­гъорэ лабораторнэ уплъэ­кIуныр ышIын имыщыкIагъэу шIыкIакIэм къыщеIо. Ау зыгорэкIэ коронави­русымкIэ сымаджэ хъу­гъэм (аужырэ мэфэ 14-м) IукIагъэу щытмэ е ежь къэ­сы­мэджагъэу къышIо­шIы­мэ, ПЦР уплъэкIуныр ышIымэ хъущт.

ШIыкIакIэу къежьагъэм тетэу Адыгэ Республикэм псауныгъэр къэухъу­мэгъэ­нымкIэ иминистрэу Мэрэтыкъо Рустем COVID-19-м пэуцужьырэ вакци­нэр республикэм апэу икIэрыкIэу зыхаригъэлъхьагъ. 2020-рэ илъэсым иIоныгъо апэрэ вакцинациер ыкIугъагъ.

— Прививкэр язымыгъэшIырэ цIыфыр ежь ыкIи къыпэблэгъэ цIыфхэм япсауныгъи, ящыIэныгъи щынагъо зэрэхидзэхэрэм дакIоу, вирусым изэмы­лIэужыгъуагъэ хэхъонымкIэ амал щыIэ ешIы, — къыIуагъ министрэм.

УФ-м и Президент зэхищэгъэ «ЗэдэгущыIэгъу занкIэм» апэрэ такъикъхэм къащегъэжьагъэу цIыф­хэр зыгъэгумэкIыхэрэ упчIэу фагъэзагъэхэр вакцинацием епхыгъэх. Владимир Путиным къызэрэхигъэщыгъэмкIэ, эпидемием изыушъомбгъун къызэтезгъэуцощт закъоу щыIэр вакцинациер ары. Ежь къэралыгъом ипащэ вакцинациер зэрикIугъэм къытегущыIагъ ыкIи цIыфым медицинэ къэгъэ­лъэгъонэу иIэхэм ялъы­тыгъэу вакцинациер ыкIу мы­хъущтмэ, ар рагъэзын зэрэфимытхэр.

Шъугу къэдгъэкIыжьын, непэ Адыгеим корона­вирусым пэуцужьырэ вак­цинэр зыщашIын алъэ­кIыщт чIыпIэ 32-рэ къыщызэIуахыгъ ыкIи мобильнэ пунктитIумэ Iоф ашIэ. Мы тхьамафэм вакцинэ хэлъхьагъу мини 10 ти­шъолъыр къыIэкIэхьагъ.

Мы уахътэм ехъулIэу Урысыем нэбгырэ миллион 23-мэ прививкэр ахалъ­хьагъ, Адыгеим —нэбгырэ 48442-рэ. Мы пчъагъэхэм мафэ къэс ахэхъо.

Iэшъынэ Сусан.