Урысыем и Президентэу Владимир Путиныр тыгъуасэ занкIэу цIыф­хэм адэгущыIагъ. ЗэкIэмкIи упчIэ миллионитIум ехъу къэралыгъом ипащэ къыфагъэзагъ.

Обществэм анахьэу ынаIэ зытыридзагъэхэм ащыщых коронавирусым пэуцужьыгъэныр, ащ епхыгъэ вакцинацием изэ­хэщэн, социальнэ Iофыгъохэр, экономикэм изытет, гъомылапхъэхэм, нэмыкI продукциехэм ауасэ къызэрэхахъорэр, мэкъу­мэщ ыкIи псэупIэ-куммунальнэ хъызмэтхэм ягумэкIыгъохэр, къэралыгъо кIоцIым ихъухьэрэр, нэмыкIхэр.

Непэ Iофыгъо шъхьаIэу цIыф­хэр зыгъэгумэкIыхэрэм ащыщ коронавирусым пэшIуекIогъэныр. Владимир Путиным къызэриIуагъэмкIэ, шIокI имыIэу цIыфхэм вакцинэр зыхалъхьан фаеу зыIохэрэм адыригъаштэ­рэп. Ау узым зыкъызиIэтыкIэ, УФ-м псауныгъэр къэухъумэ­гъэнымкIэ и Министерствэ за­къызэрэфигъэзагъэм диштэу, коронавирусыр къапыхьанымкIэ щынагъо зышъхьащыт цIыф куп зырызхэм шIокI имыIэу вакцинациер акIуным фэгъэхьыгъэ унашъо ашIын алъэкIыщт шъо­лъырхэм япащэхэм.

— Ащ дакIоу узым тапэкIэ зимыушъомбгъуным фэшI хэ­кIыпIэ закъоу щыIэр вакцинациер ары. Ар цIыфхэм къагурыIонэу сыщэгугъы. Непэрэ мафэм ехъулIэу нэбгырэ миллион 20-м ехъумэ прививкэ арагъэшIыгъ, ахэм япсауныгъэ изытет зыпкъ ит, — къыIуагъ УФ-м и Президент.

Ежь къэралыгъом ипащэ вак­цинэу зыхаригъэлъхьагъэм цIыф­хэр бэрэ къыкIэупчIэх. Вла­димир Путиным къызэри­Iуа­гъэмкIэ, «Спутник V» зыфиIорэр ары къыхихыгъэр. ЦIыфым ме­дицинэ къэгъэлъэгъонэу иIэхэмкIэ вакцинациер ыкIу мыхъущтмэ, ар рагъэзын зэрэфимытхэр, ащ фэдэ зекIуакIэр хэбзэгъэуцугъэм зэрэпэшIуекIорэр хигъэунэфыкIыгъ.

ИлъэсыкIэ еджэгъур игъом рагъэжьэжьыщтмэ къыкIэупчIагъ Москва дэс кIэлэеджакIоу Саша Максимовыр.

— Мыщ джэуап гъэнэфагъэ къестыжьыным сыфэхьазырэп. Коронавирусым ылъэныкъокIэ Iофхэм язытет зыфэдэм бэ елъытыгъэщтыр. УблэпIэ классхэм арысхэр еджапIэм зэрэкIощтхэм сицыхьэ телъ, ахэр сыдигъуи зэфэтшIы­гъэхэп. Нахьыжъхэр зэ­реджэщтхэр эпидемиологием ылъэ­ныкъокIэ Iофхэм язытет елъы­тыгъэщт. Ау а уахътэм ехъулIэу коллективнэ иммунитет тиIэнэу сыщэгугъы, — къыIуагъ Владимир Путиным.

Гъомылапхъэхэм ауасэ къызэрэхэхъуагъэм цIыфхэр лъэшэу егъэгумэкIых. Ащ епхыгъэ упчIабэ къатыгъ.

— Непэ гъомылапхъэхэм ауасэ дунаим лъэшэу къыщыдэкIоягъ. ТыдэкIи арэущтэу щыт. Ащ ушъхьагъу зэфэ­шъхьафхэр иIэх. ТикъэралыгъокIэ анахь лъапIэ хъугъэхэр шъоущыгъур, тыгъэгъэзэ дагъэр. Уасэхэр зыпкъ итынхэмкIэ правительствэм лъэ­бэкъу гъэнэфагъэхэр ышIыгъэх. Урысыем къыщыдагъэ­кIыгъэ продукциер блэкIыгъэ илъэсым тфикъугъэп. Мы илъэсым картоф тонн миллион 22-рэ фэдиз тыугъоижьы­нэу тэгъэнафэ, арышъ, ащ тыщымыкIэнэу сэгугъэ. Ащ да­кIоу 2020-рэ илъэсым мэкъумэщ хъызмэтым хэщагъэ­хэм доллар миллиард 30-м ехъу зытефэрэ продукцие Iэ­кIыб къэралыгъохэм ара­щагъ. Ащ фэдэ къэгъэлъэгъон ыпэкIэ тиIагъэп. Хьалыгъум, нэмыкI гъомылапхъэхэм ауасэ зыкъымэIэтыным фэшI унэшъо гъэнэфагъэхэр тшIыгъэх, — къыхигъэщыгъ къэралыгъом ипащэ.

Инфляцием епхыгъэ упчIэм иджэуап къыритыжьызэ Владимир Путиным къызэриIуагъэмкIэ, ар проценти 4 хъущтыгъэмэ, непэрэ мафэм ехъулIэу проценти 5,9-м нэсэу зыкъиIэтыгъ. Ау а къэгъэлъэгъоныр нахь зыпкъ иуцожьынэу щэгугъых.

Мэкъумэщ хъызмэтым Iэпы­Iэгъоу IукIагъэр сомэ миллиард 350-рэ мэхъу. Ащ щыщэу сомэ миллиард 35-р къоджэ псэу­пIэхэм социальнэ хэхъо­ныгъэ ашIыным пэIуагъэхьагъ. Мы лъэ­ныкъом щылажьэхэрэм яшIуагъэ арагъэкIыныр тапэкIи лъагъэкIотэщт.

Былым зыIыгъхэм хэбзэIахь зэрамытыщтыр къэралыгъом ипащэ хигъэунэфыкIыгъ.

Сабый зэрыс унагъохэм IэпыIэгъу афэхъугъэныри Iоф­тхьабзэм къыщаIэтыгъ. УФ-м и Президент къызэриIуагъэмкIэ, илъэси 6 зыныбжь сабыйхэу мыгъэ еджапIэм мыкIощтхэми сомэ мини 10 аратыщт.

Iофтхьабзэр рамыгъажьэзэ гумэкIыгъохэм ащыщхэр дэгъэ­зыжьыгъэхэ зэрэхъугъэр къа­Iуагъ. УФ-м и Президент зы­къыфэзыгъэзэгъэ Мыекъуапэ щыщ Алый Маликэ волонтерхэр IэпыIэгъу фэхъугъэх. Илъэс 13 зыныбжь Маликэ илъэси 6 ыныбжьэу ынэхэм амылъэ­гъужьы хъугъэ. Урысые народнэ фронтым хэтхэмрэ волонтерхэмрэ пшъэшъэжъыем Iэпы­Iэгъу къыфэхъун зылъэкIыщтхэр къагъотыгъэх, ахэм ямылъкукIэ «дисплей Брайля» зыфиIорэр къыфащэфыгъ.

Маликэ иупчIэ зыфэгъэхьыгъагъэр Урысыем мыщ фэдэу къыщаугупшысыхэрэр ыпкIэ хэмылъэу реабилитацием итехническэ амалхэм яспискэ хагъэуцонхэ алъэкIыщтмэ ары.

Урысыем гумэкIыгъоу илъхэм анэмыкIэу IэкIыб къэралхэм зэфыщытыкIэу адыряIэм, нэ­мыкI Iофыгъохэм япхыгъэ упчIэхэри мэкIагъэп. Сыхьати 3-рэ такъикъ 42-рэ кIогъэ зэдэгущыIэгъу зан­кIэм къатыгъэ упчIэхэм зэ­кIэми Владимир Путиным игъэкIотыгъэ джэуапхэр къаритыжьыгъэх.

ТХЬАРКЪОХЪО Адам.