УФ-м и Президент зэхищэгъэ «Зэдэгущы­Iэгъу занкIэм» еплъыгъ ыкIи ищыкIагъэ хъумэ шъолъырым фэгъэхьыгъэ упчIэхэм джэуап къаритыжьыным фэхьазырыгъ Адыгэ Рес­пуб­ликэм и ЛIышъхьэу КъумпIыл Мурат. ЩыкIагъэу, гумэкIыгъоу щы­Iэхэр дэгъэзыжьыгъэнхэмкIэ хабзэм илIыкIохэр цIыфхэм занкIэу адэгущыIэнхэм мэхьа­нэшхо зэриIэр Владимир Пу- тиным къыхигъэщыгъ. А IофшIэныр зэрифэшъуашэу чIыпIэ­хэм ащызэхащэнэу закъыфи­гъэзагъ.

Адыгеим и ЛIышъхьэ ащ ды­ригъэштагъ ыкIи къяолIэрэ цIыф­хэм яIофыгъохэр зэхэфыгъэнхэм анаIэ зэрэтетыр хи­гъэунэфыкIыгъ. Ащ фэдэ шIыкIэр шъолъырым бэшIагъэу щагъэфедэ, ащ ишIуагъэкIэ Iофы­гъуабэхэр зэшIуахых, цIыфхэм IэпыIэгъу арагъэгъоты.

ГущыIэм пае, 2019-рэ илъэсым республикэм ипащэ «ЗэдэгущыIэгъу занкIэ» зэхищэгъагъ. Джащ фэдэу АР-м и ЛIы­шъхьэ цIыфхэр регъэблагъэх, къоджэ псэупIэхэм адэсхэм заIуегъакIэ. Социальнэ хъытыум, шъолъыр гъэIорышIэнымкIэ Гупчэм яшIогъэшхо къэкIо.

— «ЗэдэгущыIэгъу занкIэм» къыщаIэтыгъэ упчIэхэр зэфэ­тхьысыжьыщтых, IофшIэнымкIэ щыкIагъэ зыдэщыIэ лъэныкъохэр къыхэдгъэщынхэм ыкIи ахэр дэгъэзыжьыгъэнхэм тынаIэ тед­гъэтыщт. Мыекъуапэ щыщ Алый Маликэ иIофыгъо джыри зэ къыфэдгъэзэжьыщт ыкIи сэ­къатныгъэ зиIэхэм IэпыIэгъу афэхъугъэнымкIэ пшъэрылъхэм ягъэцэкIэн шIуагъэу къытырэр джыри зэ зэхэтфыщт. ГумэкIыгъохэр дэгъэзыжьыгъэнхэмкIэ мэхьанэшхо иI федеральнэ гупчэр IэпыIэгъу къызэрэтфэ­хъурэм, — къыIуагъ КъумпIыл Мурат.

Адыгеим щыпсэухэрэм яшIоигъоныгъэхэр къыдалъытэзэ хабзэм икъулыкъушIэхэм Iоф­шIэныр зэхащэныр, цIыфхэм адэгущыIэнхэр пшъэрылъ шъхьа­Iэу республикэм ипащэ къы­гъэуцугъ.